[15] Esera 5

¹Oi rau na parofita o Akeai kei Sakaraia na luvei Ito, e rau sa parofisai vei ira na Iperiu era sa tiko mai Juta kei Jerusalemi ena yaca ni Kalou sa tiko mai Jerusalemi, kei ira talega na parofita sa tiko vata kei ira me vukei ira.

²O Serupepeli na luvei Sialitieli kei Josua na luvei Josateki e rau sa tucake ka tekivuna na tara tale ni vale ni Kalou sa tiko mai Jerusalemi; o ira na parofita ni Kalou sa tiko vata kei ira ka vukei ira.

³E na gauna vata o ya o Tatinai na Kovana ena vanua vaka ki na Uciwai levu kei Seca-Bosanai kei ira na nonai tokani sa lako cake mai vei ira ka tukuna vaka oqo, "O cei sa tukuna vei kemuni mo ni tara na vale ni soro oqo ka vakaotia na kena lalaga?"

⁴Keimami sa tukuna vei ira na yacadra sa tara tiko na vale.

⁵Ia na mata i Jiova sa vakaraici ira tikoga na nodra qase na Iperiu, me ra kua ni tarovi kina, e dina ga ni sa lako vei Taraiasi nai tukutuku. Sa kau lesu mai e dua na kena i sau.

⁶Oqo na lewe ni vola sa vola lesu mai o Tatinai na Kovana: Na kovana mai na veivanua me sivia yani na Uciwai levu o Seca-Bosanai kei ira na nonai tokani, o Perisia era sa tiko ena vanua sivia na Uciwai levu, kivei Taraiasi na tui.

⁷(Era sa vakauta vua nai vola ka sa volai vaka oqo:) Kivei Taraiasi na Tui; Mo ni vakacegu tiko.

⁸Mo ni kila tiko na tui ni keimami a lako ki na yasana vaka Jutia, ki na vale ni soro ni Kalou levu, o koya sa tara tiko ena vatu lelevu, sa vakadavori talega na kau me kena lalaga; sa caka vakavinaka sara tikoga ka sa uasivi cake tiko ga na ligadra.

⁹Keimami sa tarogi ira na qase ka vosa vaka oqo vei ira, "O cei sa vakaroti kemuni mo ni tara na vale oqo kei na kena lalaga talega?"

¹⁰Keimami sa taroga talega na yacadra me rawa ni o ni kila, keimami sa vola talega na yacadra nai liuliu.

¹¹Era sa vakauta lesu mai e dua na kenai sau ni vola ka vaka: "Keimami sa nona tamata na Kalou levu kei lomalagi kei vuravura, keimami sa tara tale tiko oqo na vale ni soro e a tara ena dua na gauna sa oti, me vaka ni a tara ka vakaotia na tui kei Isireli.

¹²"Baleta ga ni ra sa vakacudruya na Kalou kei lomalagi na neimami qase, na Kalou sa qai soli ira kina ligai Nepukanesa na tui Papiloni na Kalitia, o koya sa vakarusa na valenisoro oqo ka qai kauti ira na tamata ki Papiloni.

¹³"Io, ena matai ni yabaki i Sairusi na tui Papiloni, sa solia o Sairusi na tui e dua na lewa, o ya me tarai tale na vale ni Kalou oqo.

¹⁴"Na siliva, na Koula, kei nai yaya kece ni vale ni Kalou, e a kauta tani o Nepukanesa mai na valenisoro mai Jerusalemi ka kauta ki na vale ni soro mai Papiloni, sa qai soli vei Sesibasari na kovana.

¹⁵"Sa qai tukuna vua, 'Kauta na veika kece oqo, lako, kauta na veika oqo ki na valenisoro mai Jerusalemi ka tara na vale ni Kalou me tara tale ena kenai tutu makawa.'

¹⁶"O Sesibasari sa lako mai ka vakadavora na yavu ni vale ni Kalou mai Jerusalemi, mai na siga o ya me yacova na siga oqo, sa tara tikoga ka e se bera ni oti."

¹⁷O koya oqo, kevaka sa vinaka vei kemuni na tui, me caka e dua na vakasaqaqara ena vale ni yau ni tui Papiloni se sa dua nai vakaro vakaoqo sa solia o Sairusi na tui me baleta na kena tara tale na vale ni Kalou e Jerusalemi, ka me qai vakauta mai na tui na lewa ena vuku ni ka oqo.