[15] Esera 7

¹Ni sa oti na veika oqo ena gauna nei Atekisekise na tui Perisia, o Esera na luvei Seraia, na luvei Asaraia na luvei Ilikaia,

²Na luvei Salumi, na luvei Setoki, na luvei Aitubu,

³Na luvei Amaraia, na luvei Asaraia, na luvei Meraioci,

⁴Na luvei Seraia, na luvei Usi, na luvei Buki,

⁵Na luvei Abisua, na luvei Finaisi, na luvei Iliesa, na luvei Eroni na bete levu”

⁶O Esera oqo sa lako cake mai Papiloni, sa dua na vu ni vunau ni I vola I Mosese vuku ka matau, me vaka sa solia o Jiova, na Kalou kei Isireli. Na tui sa solia vua na ka kecega sa kerea, me vaka na ligai Jiova sa tiko ga vua.

⁷Eso vei ira na luvei Isireli, na bete, na livai, o ira na daulaga sere, na dau vakatawa ni matamata kei ira na Necenimi era sa lako cake mai Jerusalemi e nai ka vitu ni yabaki nei tui Atekisekise.

⁸Sa lako mai o Esera ki Jerusalemi e nai ka lima ni vula e nai ka vitu ni yabaki nei Atekisekise na tui.

⁹E nai matai ni siga ni matai ni vula sa tekivu nai lakolako mai Papiloni, ena matai ni siga ni kalima ni vula sa lako mai ki Jerusalemi, me vaka na liga vinaka ni Kalou sa tiko vua.

¹⁰Ni sa vakarautaka oti na lomana o Esera me dauvakasaqaqara e nai vunau ni Kalou, me cakava talega ka me dau vakatavuvulitaka na vosa ni Kalou vei ira na Isireli.

¹¹Oqo nai vola nei Atekisekise vei Esera na bete, na vu ni vunau, ka sa kena dau ena vosa sa vakarota o Jiova kei na nona lewa e Isireli:

¹²Oi au o Atekisekise na nodra tui na tui, kivei Esera na bete, na vu ni vunau, na kena dau ni vosa ni Kalou ni lomalagi: Na taucoko ni vakacegu ka lako yani.

¹³Au sa solia e dua nai vakaro vei ira kece na Isireli, na bete, na livai kei ira era sa tiko ena vanua au sa lewa, o ira kece era sa soli ira me ra lako cake ki Jerusalemi, me ra sa lako vata kei iko.

¹⁴Ena vanua o sa talai kina mai vua na tui kei iratou na nona lewe vitu na daunivakasala me vakataroga me baleti Juta kei Jerusalemi ena vuku ni Kalou kei nai vunau ni Kalou sa tiko oqori e ligamu;

¹⁵Ena vuku ni siliva kecega kei na koula o koya sa soli wale tu ga mai vua na tui kei iratou na nona daunivakasala, ki vua na Kalou ni Isireli o koya sa tiko mai Jerusalemi;

¹⁶Ena vuku ni siliva kei na koula o rawa ni kunea mai na yasana taucoko o Papiloni vata kei na solisoli loloma kecega mai vei ira na tamata kei ira na bete, me ra solia wale yani ki na vale ni nodra Kalou mai Jerusalemi”

¹⁷O koya oqo, mo qarauna, mo volia e nai lavo oqo na bulumakau yadru kei na sipi tagane, na lami, nai soro sila, nai soro laugunu me ra vakacabora oqori, e nai cabocabo ni soro ena vale ni nomu Kalou mai Jerusalemi.

¹⁸Na veika ga sa vinaka vei iko kei ira na tacimu mo dou cakava ena siliva kei na koula, dou cakava me vaka ga na lewa ni nomudou Kalou.

¹⁹Na veika kecega sa soli vei kemudou ena vuku ni veiqaravi ni nomudou Kalou ena vale ni Kalou, dou cakava taucoko ena mata ni Kalou kei Jerusalemi.

²⁰Na veika kece dou gadreva sa vo me baleta na vale ni nomudou Kalou, o koya dou sa rawa ni sauma ga, dou sauma oqori mai na nona i votavota na tui.

²¹Oi au mada ga o Atekisekise na tui, au sa solia nai vakaro vei ira kece na dauniyau sa tiko ena vanua ka sivia yani na uciwai, me kila, na veika kece sa vinakata o Esera na bete, na vu ni vunau, ena vosa ni Kalou ni lomalagi me vinakata mai vei kemudou, me sa caka vakavinaka vua,

²²Me rua na drau na udolu na dola na siliva, me dua na udolu rua na drau ruasagavulu ka lima nai vakarau witi, me ciwa na drau ciwasagavulu na qaloni na waini, me levu sara na masima, me drau talega na qaloni waiwai.

²³Na veika sa lewa mai na Kalou ni lomalagi, me sa caka vakavinaka yani ki na vale ni Kalou ni lomalagi. Ena cava me na cudruvi kina na tui kei ira na luvena?

²⁴O ni sa vakananumi yani ni sa tabu me ra saumi vakacavacava se ka vakavanua se soli cava ga o ira na bete, livai, na daunisere, vakatawa, na Necinimi se o ira na dauniveiqaravi e na vale ni Kalou.

²⁵Vei iko Esera, me vaka na nomu Kalou sa dau solia na vuku kei na yalomatua, mo tuvana na mataveilewai kei na kena turaganilewa, me ra lewa vei ira kecega na tamata sa tiko ena vanua kei na vanua vakayawa mai na uciwai levu, o ira kece sa kila na lewa ni Kalou, ka me ra vakavulici talega o ira sa lecaika.

²⁶O ira vakayadua sa sega ni via rogoca na lewa ni Kalou kei na nona lewa talega na tui, me lewai vakatotolo o koya oqo, me vakamatei, se biu ki valeniveivesu, se tauri vakaukauwa na nona veika sa volia oti se vakautani.

²⁷Me vakacaucautaki o Jiova na Kalou ni neimami qase o koya sa biuta na veika vaka oqo ki na yalona na tui me vakaukuukutaka kina na vale ni Kalou sa tiko mai Jerusalemi,

²⁸Ka sa vakatetea na nona yalololoma ki vei au ena matana na tui kei ira na nona daunivakasala kei ira kece na nona bati na tui. Au sa vakayaloqaqataki kina, me vaka na ligai Jiova na noqu Kalou sa tiko ga vei au; kei na nodra vakasoqoni vata mai na turaga e Isireli me ra lako cake vata mai kei au.