[48] Kalatia 1

¹Oi au o Paula, nai apositolo (e sega ni mai vei ira na tamata, se ena i lesilesi vakatamata, ia ena i lesilesi ga i Jisu Karisito kei na Kalou na Tamana, o Koya ka vakaturi Jisu cake tale mai na mate),

²kei ira taucoko na mata veiwekani era tiko vata oqo kei au, ki na soqosoqo lotu mai Kalatia

³Me nomudou na nona loloma kei na vakacegu ni Kalou o Tamada kei na noda Turaga o Jisu Karisito,

⁴O koya ka mai soli Koya ena vuku ni noda i valavala ca, me vakabulai keda kina mai na vuravura ca oqo, me vaka na Nona lewa na Kalou o Tamada,

⁵Me Nona tikoga na vakarokoroko me sega ni mudu. Emeni.

⁶Au rui kurabui vei kemudou, ena nomudou biuti Koya ka kacivi kemudou, ena loloma vaKarisito, ka dou qai goleva e dua tani tale nai tukutuku,

⁷E sega ni duatani tale, ia sa so ga era vinakata mera vakaleqai kemudou, ena nodra kauta vakatani nai tukutuku vinaka kei Karisito.

⁸Ia kevaka mada ga e dua vei keitou, se dua na agilosi mai lomalagi, me la'ki vunautaka yani e dua tani nai tukutuku vinaka, ka sega ni vaka keitou dau vunautaka, dou taura ka vakarusa.

⁹Me vaka na ka keitou sa dau tukuna oti vei kemudou, au na baci tukuna tale, kevaka e dua me laki vunautaka vei kemudou e dua tani nai tukutuku vinaka, ka sega ni vaka keitou a vunautaka vei kemudou, dou taura ka vakarusa.

¹⁰O cei au via vakalomavinakataka na tamata se na Kalou? Se mera taleitaki au ga na tamata? Kevaka me'u vakalomavinakataka na tamata, au sa qai sega ni talatala i Karisito.

¹¹Ia ka mo dou kila na veiwekani, nai tukutuku vinaka au vunautaka e sega ni ka vakatamata.

¹²E sega ni solia vei au e dua na tamata, se me dua e vakatavulica vei au, ia e yaco ga mai, ena nona vakatakila vei au o Jisu Karisito.

¹³Dou sa rogoca ka kila vinaka, nai valavala ni noqu lotu vaka Jiu e liu, ena noqu dau saga vakaukauwa, mera vakararawataki vakaca ka vakarusai vakadua, nai soqosoqo lotu ni Kalou.

¹⁴E sega ni dua vei ira na kai noqu me siviti au rawa, ena muria nai vakarau ni lotu vaka Jiu, sa dua na ka na noqu taura vakabibi nai tovo ni nodra lotu na noqu qase.

¹⁵Ia ni sa vinaka vua na Kalou, o koya sa tawasei au mai na kete i tinaqu, ka qai kacivi au ena nona loloma,

¹⁶Sa qai vakaraitaka na Luvena vei au me'u raica, me'u na vunautaki Koya vei ira na kai matanitu tani, e sega ni'u lako tale kina matabose, mera solia mai na veivakadeitaki ena ka au raica,

¹⁷E sega ni'u lako cake ki Jerusalemi, vei ira sai apositolo e liu vei au; ia au lako ga ki Arapea, ka lesu tale ki Tamasiko.

¹⁸Ni oti vinaka e tolu na yabaki, au sa qai lesu cake tale ki Jerusalemi, me'u laki raici Pita, kau mani tiko vata kei koya e kea me tinikalima na yabaki.

¹⁹Ia e sega ni bau dua mada ga nai apositolo me'u raica, ka vakavo ga o Jemesa, na tuakana na noda Turaga.

²⁰(Oqo me baleta na veika au vola yani vei kemudou, ena mata ni Kalou, me'u tukuna vei kemudou, ni'u sega ni lasu).

²¹Ni oti o ya, au sa qai lako kina vei yasana vaka Siria kei Silisia.

²²Vei ira nai soqosoqo lotu mai Jutia era tu vata kei Karisito, era se bera ni taura vakavinaka tiko na kequi rairai.

²³Ia era sa rogoca tikoga, "Ni o koya e a dau vakararawataki keda vakaca, sa vunautaka tale tiko na vakabauta ka a dau via vaqeavutaka."

²⁴Ara sa vakarokorokotaka na Kalou ena vukuqu.