[48] Kalatia 3

¹Kemudou na kai Kalatia lialia! O cei e mai veisautaki kemudou mai na nomudou muria tiko na dina, dou sa vakadinadinataka ka kila, ni o Jisu Karisito e mai vakoti ena kauveilatai?

²E dua ga na ka oqo au vinakata me'u kila mai vei kemudou; dou a rawata beka na Yalo Tabu ena cakacaka ni vunau, se mai na nomudou rogoca ka vakabauta?

³Na cava dou sa rui lialia kina vaka oqo? Ni dou a tekivu ena Yalo Tabu, oqo dou sa mai bula tale tu ena ka vakayago?

⁴E levu na ka dredre dou sa sotava mai “ na cava sa sega ni rawa kina oqo?

⁵Ena vuku ni ka oqo, o Koya e solia vei kemudou, na veivakakaukauwataki ni Yalo Tabu kei na vei cakacaka mana ena kemudou maliwa, e rawati ena cakacaka ni vunau, se ena rogoci ni vakabauta?

⁶"Me vaka nona vakabauta na Kalou o Eparaama, sa okati vua mei valavala dodonu."

⁷O koya mo dou kila, ni o ira ga era sa vakabauta era luvei Eparaama.

⁸Ni sa tukuna makawa nai Vola Tabu, ni na yaco na gauna, ena vakadonui ira na kai matanitu tani na Kalou ena vuku ni vakabauta, e a vunautaki talega vei Eparaama nai tukutuku vinaka ka vaka, "ena vakalouvinakataki na veimatanitu ena vukumu."

⁹O koya oqo, o ira ga sa vakabauta, era na vakalouvinakataki vata kei Eparaama.

¹⁰O ira kece era se bula tiko ena i vunau, era sa cudruvi oti, ni sa volai; "ena cudruvi vakayadua o ira sa sega ni muria tiko na veika sa volai e nai vunau “ me ra cakava."

¹¹Ia ena mata ni Kalou, e sega ni rawa me dua e vakadonui ena i vunau, ni sa volai, "ena bula na tamata yalododonu ena vuku ni vakabauta."

¹²Nai vunau e sega kina na vakabauta, "ia o koya e muria me bulataka tiko."

¹³O Karisito e vakabulai keda mai na cudru ena vuku ni vunau, e mai mate ena vukuda (ni sa volai, "ena cudruvi o ira kece sa vakaliligi ena kau")

¹⁴Me nodra kina na kai matanitu tani na veivakalouvinakataki mai vei Eparaama ena vuku i Karisito Jisu, meda rawata talega na Yalo Tabu sa yalataki ena vuku ni vakabauta.

¹⁵Kemudou na veiwekani, au vosa tiko oqo vei kemudou ena noda bula vakatamata, e dina ni veiyalayalati oqo e vakaitavi kina na tamata, kevaka sa yaco na kena veivakadeitaki, ena sega ni rawa me kau tani se vakaikuritaki.

¹⁶Na yalayala e vakayacori vei Eparaama kei ira na nona kawa, e sega ni tukuni, "na veikawa tale eso," oqori na veikawa taucoko, ia e dua ga na kawa, "Na nomu kawa ga," sai koya na Karisito.

¹⁷Au tukuna vei kemudou, nai vunau e qai soli mai ni sa oti e va na drau ka tolusagavulu na yabaki, ka sega kina ni rawa me mai kauta tani na veiyalayalati sa vakayacora tu mai na Kalou ena vuku i Karisito, e sega kina ni rawa me mai vakamalumalumutaki kina, na yalayala sa vosa tu mai kina na Kalou.

¹⁸Kevaka sa noda nai votavota ena vuku ni vunau, sa qai sega yaga na yalayala; ia na Kalou sa solia vei Eparaama, ni sa vosa yalayala vua.

¹⁹Na cava mada nai naki ni vunau? E soli mai baleta na talaidredre ni tamata, me yacova na gauna sa lokuci tu, me basika mai kina na kawa ka yalataki; a ra sa tusanaka o ira na agilosi ena ligana na dauveisorovaki.

²⁰Na dauveisorovaki e sega ni sorovaka ga e dua, ia na Kalou sa dua ga.

²¹E veicoqacoqa beka na vunau kei na vosa yalayala ni Kalou? E sega sara! Kevaka sa rawa ena vunau na bula, e dina sara na yalododonu sa rawa ena vunau.

²²Ia nai Vola Tabu e tukuna ni da sa tamata i valavala ca kece, na ka sa yalataki me soli ga vei ira era vakabauti Jisu Karisito, ena nodra vakabauta.

²³Ia ni se bera mai na vakabauta, na vunau e taqomaki keda tu, me yacova na gauna ni vakabauta sa lokuci tu.

²⁴O koya oqo, na vunau e noda dauniveivakavulici tiko mai, me da mai sota kina kei Karisito, me rawa kina ni da vakadonui ena vuku ni vakabauta.

²⁵Ia ni da sa mai vakabauta, sa sega ni qai yaga tale vei keda na vunau me noda qasenivuli tiko.

²⁶Oi kemudou sa luve ni Kalou kece ena vuku ni vakabauti Karisito Jisu.

²⁷Vei kemudou kece ni dou sa papitaisotaki vei Karisito, ka dou sa tokara na bula va Karisito.

²⁸Sa sega ni qai dua me Jiu se kai Kirisi, sa sega ni dua me bobula, se nai taukei, sa sega na tagane se yalewa; ni dou sa dua ga ena vuku i Jisu Karisito.

²⁹Kevaka sa tu vei kemudou o Karisito dou sa kawa dina i Eparaama, ka sa nomudou dina na vanua yalataki me vaka na vosa ni yalayala.