[1] Vakatekivu 25

¹Sa vakawati tale o Eparaama, na yaca i watina o Ketura.

²Sa sucu kina o Simirani, Jokesani, Medani, Mitiani, Isibaki kei Sua.

³O Jokesani sa vakasucumi vua o Seba kei Didani. Na luvei Didani o Asurimi, Letusimi, kei Liumimi.

⁴Na luvei Mitiani o Efa, Eferi, Anoti, Ebida, kei Eledae. O ira kece oqo na gone mai vei Ketura.

⁵O Eparaama sa solia na veika kece sa nona vei Aisake.

⁶O Eparama sa solia talega na veika vei ira na luvena ni watina talai. Ni se bula tikoga o Eparaama, sa vakatalai ira tani yani oqo, mai vei Aisake ki na tokalau.

⁷Na veiyabaki sa bula kina o Eparaama sa dua nadrau vitusagavulu ka lima na yabaki.

⁸Sa ceguva nai otioti ni nona i cegu o Eparaama ka sa mate yani ni sa qase sara. Sa lako yani vei ira na kai nona.

⁹E rau sa buluti koya na luvena o Aisake kei Isimeli ena qaravatu mai Makapila, e Mamire, ena veiwere nei Efironi na luvei Soa na Itaiti;

¹⁰na vanua sa volia o Eparaama mai vei ira na luvei Eci. E rau sa bulu mai kea o Eparaama kei Sera na watina.

¹¹Sa yaco ni sa mate oti o Eparaama, na Kalou sa vosa vakalouvinakataki Aisake na luvena. O Aisake sa tiko mai Bea-Laei-Roi.

¹²Oqo na kawa nei Isimeli na luvei Eparama vei Eka na yalewa dauveiqaravi ni Ijipita nei Sera.

¹³Oqo na yacadra na luvei Isimeli “ na dui yacadra kei na nodra dui kawa: na ulumatua nei Isimeli o Nebajoci; sa qai Kedari, Adibili, Mibisami,

¹⁴Misama, Duma, Masa,

¹⁵Adari, Tema, Jeturi, Nafisi kei Kedema.

¹⁶Sai ira oqori na luvei Isimeli, oqo talega na yaca ni nodra vei koro kei nai tikotiko vagalala, e tinikarua na ravouvou me vaka na nodra dui vanua.

¹⁷Oqo na veiyabaki nei Isimeli, e dua na drau tolusagavulu ka vitu na yabaki; sa ceguva nai otioti ni nona i cegu ka mate yani, sa soqoni yani vei ira na nona tamata.

¹⁸(Era sa tiko mai Avila me yaco sara ki Suri, oqori ena tokalau kei Ijipita ni o lako yani vaka ki Asiria.) Sa mate ena matadra na tacina.

¹⁹Oqo na kawa nei Aisake, na luvei Eparaama. o Eparaama sa vakasucumi vua o Aisake.

²⁰O Aisake sa yabaki vasagavulu ni rau sa veiwatini kei Rapeka na luvei Petueli na kai Siria mai Padani-Arami, na ganei Lepani na kai Siria.

²¹O Aisake sa vakamamasu vei Jiova ena vuku i Rapeka na watina, ni sa yava (sega ni vakaluveni), o Jiova sa sauma na masu nei Aisake, ka sa kunekune sara o Rapeka.

²²E rau sa yavavala vakalevu na gone e ketei tinadrau, ka sa tukuna kina “ "Kevaka sa vinaka oqo, na cava sa yaco tiko kina na yavavala e ketequ?" Sa lako yani me vakatarogi Jiova.

²³Sa tukuna vua o Jiova, "E rua na matanitu sa tiko oqori e ketemu, e rua na tamata e rau na tawase mai yagomu; e dua ena kaukauwa mai vua tale e dua “ o koya na qase ena qaravi koya e gone."

²⁴Ni sa yaco mai na nona siga ni vakasucu, sa tiko ena kato e dua na drua.

²⁵O koya e liu mai e damusa, sa vaka e dua nai sulu vutivutia na yagona kece: sa vakayacani me o Iso.

²⁶Sa qai muri mai o tacina, na ligana sa vesuka tiko mai na bukubuku ni yavai Iso. Sa vakayacani me o Jekope. Sa yabaki onosagavulu o Aisake ni rau sa sucu mai na luvena drua oqo.

²⁷E rau sa tubu cake na gone. Sa dau vakasasa manumanu o Iso ka tamata ni veiwere. O Jekope sa tamata malumu tuga ka dau tiko ga e vale.

²⁸O Aisake sa dau lomani Iso, baleta ni sa dau kania na nona manumanu ni vakasasa. Ia, o Rapeka sa lomani Jekope vakalevu. Sa Volitaka O Iso Na Nona I Tutu Vakaulumatua

²⁹O Jekope sa vakasaqa kakana vakarakara tiko ena nona lesu mai na veiwere o Iso, ka sa wawale sara vakalevu.

³⁰Sa kerea yani o Iso vei Jekope me kania mada na kakana vakarakara damudamu sa vakarautaka tiko, ni sa rui wawale vakalevu. Sa vakayacani sara kina me o Itomi.

³¹Sa tukuna yani o Jekope, "Mo volitaka na dodonu ni nomu ulumatua vei au ena siga oqo."

³²Sa tukuna mai o Iso, "Raica au sa voleka ni mate, na cava na kena yaga vei au na ulumatua oqo?"

³³Sa tukuna mai o Jekope, "Mo bubului vei au e dai." Sa bubului o Iso ena siga o ya vei Jekope ka volitaka na nona dodonu vakaulumatua vei Jekope.

³⁴O Jekope sa vakarautaka sara na kakana vakarakara damudamu kei na madrai vei Iso. Sa kana ka gunu o Iso ka tucake ka sa lako yani. O Iso sa vakawaletaka na dodonu ni nona ulumatua.