[1] Vakatekivu 27

¹Sa yaco na gauna ni sa qase mai o Aisake ka sa buwawa sara na matana “ sa sega kina ni rai rawa, sa kacivi Iso mai, na nona ulumatua ka tukuna vua, "Na luvequ," sa sauma mai o Iso, "Sai au oqo."

²Sa tukuna tale, "Raica, au sa qase sara, au sa sega talega ni kila na noqu siga ni mate.

³"Oqo mo kauta mada na nomu i yaragi, na taga ni gasau kei na veqa ni dakai, lako yani ka vakasasataka mada mai e dua na kequ manumanu.

⁴"Mo tavuna vakaveiwaki mai, me vaka au sa dau vinakata, kauta mai, me'u mai kania, me vakalouvinakataki iko kina na yaloqu ni bera ni'u mate."

⁵Sa vakarorogo tu o Rapeka ni sa vosa tiko o Aisake vei Iso na luvena. Sa lako yani o Iso ki vanua me vavana ka me kauta lesu mai.

⁶O Rapeka sa vosa vei Jekope na luvena ka vaka: "Au sa rogoci tamamu ni sa vosa oti vei Iso na tacimu ka vaka,

⁷'Kauta mai e dua na manumanu, mo tavuna veiwaki ka kauta mai me'u kania ka vosa vakalouvinakataki iko ena mata i Jiova ni bera ni'u mate.'

⁸"Na luvequ mo rogoca na noqu vosa, me vaka au sa vakarota vei iko.

⁹"Lako ka kauta mai e rua na luve ni me vinaka, au na tavuna veiwakitaka me kania o tamamu me vaka e dau vinakata.

¹⁰"Mo qai kauta vei tamamu, me kania, ka vosa vakalouvinakataki iko ni bera ni mate yani."

¹¹Sa tukuna o Jekope vei tinana “ "Raica, o Iso e vutivutia na yagona, o au, e sega.

¹²"De qai vakayamoca o tamaqu na ligaqu, ka kilai au “ ena qai tukuna ni'u tamata dauveivakaisini, oqo au na kauta ga mai kina vei au na kalouca ka sega na kalouvinaka."

¹³Sa tukuna vua o tinana, "Na nomu kalouca me noqu na luvequ, cakava ga na veika au sa tukuna oti vei iko, lako, kauta mai na manumanu."

¹⁴Sa lako yani o Jekope, ka kauta mai na manumanu vei tinana. Sa vakarautaka o tinana me vaka sara ga sa dautaleitaka o Aisake.

¹⁵Sa kauta mai o tinana nai sulu vinaka nei Iso sa tiko ga vua e vale, ka sa vakasulumi Jekope kina.

¹⁶Sa vakabira tu e ligana na vuti ni me kei na domona talega.

¹⁷Sa solia na kakana kei na madrai ea vakarautaka mai ki na ligai Jekope na luvena.

¹⁸Sa lako yani o Jekope vei tamana ka tukuna, "Tamaqu," sa sauma mai, "Oi au oqo, o cei o iko na luvequ?"

¹⁹Sa tukuna o Jekope vei tamana, "Oi au o Iso, na nomu ulumatua, au sa cakava mai oqo, me vaka o sa tukuna mai, au kerea mo duri cake, mo dabe, mo kania na ka au sa vakarautaka mai. Me vakalouvinakataki au kina na yalomu."

²⁰Sa tukuna mai o Aisake vei luvena, "O sa kunea vakacava, sa rui totolo na veika o cakava?" Sa sauma yani o Jekope, "Na Kalou o Jiova sa kauta mai vei au."

²¹Sa tukuna tale o Aisake, "Toso voleka mai me'u yamoca na ligamu, se o iko dina o Iso se sega."

²²Sa toso voleka yani vei tamana o Jekope, ka sa yamoci koya sara o tamana ka tukuna, "Na domo sa domo i Jekope, ia, na ligana sa ligai Iso ga."

²³Sa sega ni kilai koya baleta ni sa vutivutia na ligana me vaka na ligai Iso. Sa qai vosa vakalouvinakataki koya.

²⁴Sa qai tukuna yani, "Sai iko dina oqo, Iso na luvequ?" Sa sauma mai o Jekope, "Sai au."

²⁵Sa tukuna o Aisake, "Kauta mai, me'u mai kania na ka o sa vakarautaka mai “ me vakalouvinakataki iko kina na yaloqu." Sa kauta mai o Jekope, sa kana sara o Aisake, sa kau talega mai vua na waini ka sa gunu talega.

²⁶O Aisake na tamana sa tukuna vua, "Toso voleka mai ka reguci au, na luvequ."

²⁷Sa toso voleka mai o Jekope ka reguci tamana. Sa boica na nona i sulu o Aisake, ka vosa vakalouvinakataki koya ka vaka: "Nai boi kei na luvequ, sa vaka nai boi ni vanua sa vakalouvinakataka o Jiova.

²⁸O koya oqo me solia kina vei iko o Jiova na tegu mai lomalagi, na vuavuai vinaka kei vuravura, me levu na sila kei na waini.

²⁹Me ra qaravi iko na tamata, ka cuva vei iko na veimatanitu, o na turaga vei ira na tacimu, o ira na luvei tinamu era na cuva vei iko, era na kalouca o ira era na vakaloucataki iko, era na kalouvinaka o ira era na vakalouvinakataki iko!"

³⁰Ni sa oti na nona vakalouvinakataki Jekope o Aisake ka sa curu yani ki tuba mai vei Aisake na tamana “ sa basika mai o Iso ena nona lesu tiko mai na vakasasa.

³¹Sa vakarautaka sara mai vakavinaka na nona lewe ni vakasasa ka kauta mai vei tamana ka tukuna, "Me duri mada na tamaqu ka kania mada na lewe ni vakasasa na luvena, me rawa ni vakalouvinakataka kina na luvena mai na yalona."

³²Sa tarogi koya o Aisake na tamana, "O cei o iko?" Sa sauma mai, "O au na luvemu ulumatua, o Iso."

³³Sa kidacala o Aisake ka sautaninini, ka tukuna, "O cei? Sa E vei o koya sa vakasasa oti ka liu mai, ka sa kauta oti mai vei au? Au sa kana oti ni se bera ni o lako mai, au sa vakalouvinakataki koya “ sa vakalouvinakataki dina o koya."

³⁴Ni sa rogoca oiso na vosa nei tamana, sa tagi vakararawa sara ka tukuna vei tamana "O au talega tamaqu, mo vakalouvinakataki au?"

³⁵Sa tukuna o Aisake, "Sa lako mai o tacimu ena veivakaisini, ka sa kauta tani na nomu vakalouvinakataki."

³⁶Sa tukuna tale o Iso, "Sa sega li ni vakayacani donu o Jekope? Ni sa vakaisini (Jekope) au vaka rua oqo “ Sa kauta tani na noqu i tutu vakaulumatua, oqo, sa kauta talega na noqu vakalouvinakataki!" Sa tukuna talega, "Ka o sega ni bau biuta tu vei au edua na ka me noqui votavota?"

³⁷Sa sauma mai o Aisake ka tukuna vei Iso, "Raica, au sa cakava me nomu turaga o koya, o ira kece na tacina, me ra nona i talai, na sila kei na waini me maroroi koya “ na cava tale me'u cakava vei iko na luvequ?"

³⁸Sa tukuna o Iso vei tamana, "Sa tu beka ga vei iko e dua na vosa ni veivakalouvinakataki? E sega ni rawa vei iko mo vakalouvinakataki au talega tamaqu!" Sa tagi vakadomoilevu sara o Iso.

³⁹Sa sauma mai o Aisake na tamana ka tukuna vua, "Raica na nomu i tikotiko, ena vanua vuavuai e vuravura, kei na kena tegu mai lomalagi e na lutu tiko ga mai.

⁴⁰O na bula ena nomu i seleiwau, ka o na qaravi tacimu; Ena yaco na gauna ni o sa sega ni kunea na vakacegu, - o na musuka tani na nona i vua mai na domomu."

⁴¹O Iso sa cati Jekope vakalevu ena vuku ni veivakalouvinakataki sa solia vua o tamana (Aisake), sa tukuna kina e lomana o Iso, "Sa voleka oqo na siga ni so mate vei tamaqu, ni oti o ya, au na qai vakamatei Jekope."

⁴²Sa tukuni vei Rapeka na vosa oqo nei Iso. Sa kacivi Jekope mai ka tukuna vua, "Raica sa vakamalumalumutaki koya tiko o Iso ena vukumu “ ni sa nakita tiko me vakamatei iko.

⁴³"Oqo na luvequ “ rogoca na noqu vosa, tucake, dro ki vei Lepani na ganequ ki Arana.

⁴⁴"Tiko mai kea me vica na siga, qai lesu mai ni sa oti na nona cudru,

⁴⁵"Ni sa oti na nona cudru ka sa guilecava talega, au na qai talatala yani mo lako mai. Na cava me'u rarawa kina vakalevu ena dua ga na siga?"

⁴⁶O Rapeka sa tukuna vei Aisake, "Au sa rarawa tiko vakalevu ena vukudra na luvei Eci yalewa; kevaka sa wati Jekope e dua na luvei Eci “ me vakataki ira na goneyalewa ni vanua oqo. Ena vinaka vakacava na noqu bula vei au?"