[1] Vakatekivu 40

¹Sa qai yaco ena dua na gauna, o koya na dauvakarau mena waini kei koya na dau vavi kakana nei Fero, e rau sa caka cala vua na nodrau turaga na tui Ijipita.

²O Fero sa cudruvi rau vakalevu na nona dauveiqaravi oqo, na i liuliu ni caka waini kei nai liuliu ni dauvavavi.

³Sa biuti rau ena ligai koya nai liuliu ni mata yadra ni valeniveivesu. Ena vanua sa vesu tiko kina o Joseva.

⁴Nai liuliu ni mata yadra sa beitaki Joseva vata kei rau, ka sa qaravi rau. E ratou s vesu tiko vakawawa.

⁵O koya na dauvakarau waini kei koya na dauvavavi nei Fero, e rau sa tadra ruarua, na nodrau tadra yadudua ena dua ga na bogi, ka duidui na kena i balebale.

⁶Sa lako mai vei rau o Joseva ena mataka, ka raici rau, sa raica ni rau sa rarawa sara vakalevu.

⁷Sa tarogi rau sara ka vaka: "Na cava drau sa rui rarawa kina vakalevu ena siga oqo?"

⁸E rau sa tukuna vua, "Keirau sa dui tadra na tadra e duidui, ka sa sega na kena i vakavakadewa." Sa tukuna o Joseva, "Sa sega beka ni nona ga na Kalou na vakavakadewa? Drau tukuna mai vei au."

⁹Nai liuliu ni dauvakarau waini sa tukuna vei Joseva na nona tadra ka vaka: "Ena noqu tadra, sa tu e mataqu e dua na vaini,

¹⁰"Na vaini oqo sa tolu na tabana, sa kubu mai, sa vakadrauna sara, sa se ka kauta mai na vuana sa dreu tu.

¹¹"Sa tu e ligaqu na bula nei Fero, au sa taura na vaini dreu ka lobaka ena bilo nei Fero, ka au sa kauta sara na bilo ka solia ena ligai Fero."

¹²Sa tukuna vua o Joseva, "Oqo na kena i vakavakadewa, na tolu na tabana sa tolu na siga.

¹³"Ena tolu na siga oqo, o Fero ena laveti iko cake tale, ka vakatikori iko lesu tale ki na nomu i tutu, ka o na dau soli mena gunu tale na Fero me vaka ga o sa dau cakava e liu.

¹⁴"Mo qai nanumi au mai ni o sa tiko vinaka, ka mo vakaraitaka vei au na nomu yalovinaka; mo dau tukuni au vei Fero, ka mo kauti au tani mai na vale oqo.

¹⁵"Ni sa ka dina, na noqu kau tani mai vakaukauwa mai na nodra vanua na Iperiu; au sa sega talega ni cakava e dua na ka e ganita na noqu mai tu oqo."

¹⁶Ni sa raica na i liuliu ni dau vavavi ni sa vinaka nai vakamacala nei Joseva, sa tukuna sara yani, "O au talega, ena noqu tadra, sa tolu na i su vulavula e uluqu.

¹⁷"Nai su sa tiko duadua e cake, sa tiko kina na veikakana vavi me kei Fero, era sa mai kania na manumanu vuka, mai na uluqu."

¹⁸Sa sauma vua o Joseva ka vaka: "Oqo na kena i balebale, e tolu na i su, sa tolu na siga.

¹⁹"Ena tolu na siga oqo, o Fero ena vakaliliga na domomu ena dua na vunikau, mai kea, era na kania kina na lewemu na manumanu vuka."

²⁰Sa qai yaco ena i ka tolu ni siga, na siga talega ni vakananumi ni sucu nei Fero, sa cakava kina e dua na kakana levu vei ira na nona dauveiqaravi; sa vakaturi rau cake na nona i liuliu ni daucaka waini kei koya nai liuliu ni dau vavavi e matadra na dauveiqaravi.

²¹Sa vakatikora lesu na nona dau caka waini, ka sa dau biuta na waini ena ligai Fero.

²²Sa vakakukunataki koya na dau vavavi, me vaka nai vakamacala nei Joseva vei rau.

²³Nai liuliu ni dau vakarau waini sa sega ni nanumi Joseva, ka sa guilecavi koya.