[58] Iperiu 8

¹Oqo na usutu ni veika keitou sa tukuna tiko. Sa dua na noda Bete Levu, o koya sa dabe tiko ena liga i matau i Koya sa Cecere Sara ena yasana vakalomalagi, ena Nona i tikotiko vakaturaga,

²Na Dauveiqaravi ena i tikotiko tabu ni vale ni soro dina, sa tara na Kalou ka sega ni tamata.

³O ira na bete levu kece era sa digitaki me ra vakacabora na ka ni loloma kei nai soro talega. Sa dodonu kina me vakacabora o Koya oqo e dua na ka.

⁴Kevaka sa tiko e vuravura o Koya, sa sega ni bete o Koya, ni ra sa tiko na bete mera vakacabora nai soro me vaka nai vunau;

⁵O koya sa qarava nai yaloyalo ni veika vakalomalagi, me vaka sa vakasalataki kina vakalou o Mosese ni sa vakarau tara na vale vakacevaceva. Ni sa tukuna, "Mo raica me caka na veika kecega me vaka na i tuvatuva sa vakaraitaki vei iko mai na ulunivanua."

⁶Oqo, sa rawata o Koya e dua na veiqaravi vinaka sara, ni sai Koya talega e lewa na veiqaravi ni veiyalayalati e vinaka cake, o koya sa vakatekivutaki ena yalayala e vinaka cake.

⁷Kevaka sa sega ni cala nai matai ni veiyalayalati, ena sega ni yaga na kenai ka rua.

⁸Ni sa kune tiko na cala vei ira, sa tukuna kina o Koya,"Sa lako tiko mai na siga sa tukuna na Turaga, Ni'u na cakava kina e dua na ka vou vei ira na Isireli, na Juta talega,

⁹Sa sega ni vaka na veiyalayalati Au a caka vata kei ira na nodra qase, ena Noqu a taura mai na ligadra ka kauti ira tani mai na vanua oijipita; baleta ni ra sa sega tiko ni muria na Noqu veiyalayalati. Au sa besetaki ira kina, sa tukuna o Jiova.

¹⁰Oqo na veiyalayalati Au na cakava vei ira na vale ni Isireli, ni sa oti na veisiga oqo, sa tukuna o Jiova. Au na biuta na Noqu i vunau ki na nodra mona ka vola ki yalodra; ena yaco Me'u nodra Kalou ka mera Noqu tamata.

¹¹Ena sega e dua me vakavulica na wekana se na tacina me tukuna vaka oqo, "mo kila na Kalou,"ni ra na kilai Au kecega, o koya sa lailai sara kei koya sa cecere sara.

¹²"Au na yalololoma ki na nodra tawadodonu kei na nodra i valavala ca kei na nodra caka ca kecega, Au na sega ni via nanuma tale."

¹³Ena veika oqo, sa tukuna kina o Koya, "Ena veiyalayalati vou" sa cakava kina o Koya na i matai ni veiyalayalati, me sa mai cava. Oqo, na veika sa mai cava ka sa qase mai sa vakarau me yali yani vakadua.