[28] Osea 1

¹A vosa i Jiova sa yaco vei Osea na luvei Pieri, Ena gauna i Usaia, kei Jocame kei Easi, kei Esekaia, o iratou na Tui Juta, kei na gauna i Jeropoami na luvei Joasi na Tui Isireli.

²Oqo nai vakatekivu ni vosa i Jiova vei Osea, sa tukuna o Jiova vei Osea: "Mo laki kauta e dua na yalewa dautagane me watimu, kei iratou na luve ni dautagane me luvemu, ni sa dautagane vakalevu na lewe ni vanua ka ni ra sa vuki tani vei Jiova."

³Sa qai lako o koya ka kauti Komera na luvei Tipiliemi, a sa kunekune o koya ka vakasucuma e dua na luvena tagane.

⁴A sa vosa vua o Jiova, "Mo vakatoka me yacana o Jesirieli, ni na dua na gauna lekaleka ga oqo, Au na qai cudruvaka na dra i Jesirieli kina mataqali i Jeu ka vakaotia na matanitu ni mataqali i Isireli.

⁵Ena yaco ena siga o ya, au na musuka na dakai i Isireli ena buca o Jesirieli."

⁶Ena kunekune tale o koya, ka na vakasucuma e dua na luvena yalewa. Sa tukuna tale vua o Jiova: "Mo vakatoka me yacana o Loruama, ni'u na sega ni lomani ira tale na mataqali i Isireli, ia au na kauti ira laivi sara ga.

⁷Au na lomani ira ga na mataqalii Juta, ena vakabulai ira na liga i Jiova na nodra Kalou, au na sega ni vakabulai ira ena dakai, se nai seleiwau, se nai valu, se na ose, se vei ira era dauvodo ose."

⁸Ni sa yaco na gauna me sa kali kina o Loruama, sa tekivu kunekune tale o koya ka vakasucuma e dua na luvena tagane.

⁹Sa vosa vua o Jiova, "Mo vakatoka na yacana o Lo-ami, ni o kemudou sa sega ni noqu tamata, oi au talega sa sega ni Nomudou Kalou.

¹⁰"Io na kedra i wiliwili na Isireli ena vaka na mata ni nuku ni waitui, ena sega ni vakarautaki, se wiliki rawa. Ena qai yaco dina mai, na vanua era a rogoca kina, 'Ni o kemudou dou sa sega ni noqu tamata,' na vanua vata o ya, era na rogoca kina, 'Ni o kemudou sa luve ni Kalou bula.'

¹¹Era na qai soqoni vata mai na Juta kei na Isireli, mera na lesia e dua me na liutaki ira, era na qai lako cake tani mai kina, ni na ka levu sara na siga i Jesirieli!