[23] Aisea 26

¹Ena siga o ya ena qai lagati ena vanua o Juta na sere oqo; "Sa dua na noda koro kaukauwa; o Jiova ena lesia na veivakabulai me bai kei na bai ni valu.

²Dolava na matamata ni koro, me ra curu mai na veimatanitu e ra maroroya tu na dina.

³O ni na maroroi koya ena vakacegu e sega yalani, ni nona vakanananu sa tu ga vei Kemuni ni sa vakabauti Kemuni.

⁴Mo vakararavi tikoga vei Jiova me kua ni mudu, vei YAWE na Kalou, sa sega ni yalani rawa na Nona kaukauwa.

⁵Ni sa daukauti ira sobu o ira e ra dauviavakaceceretaki ira, na koro levu cecere, sa biu sobu ki ra, e biu sobu kina qele, ka biu sara kina kuvu ni qele.

⁶Ena butuki sobu ena yavadra io ena yavadra na dravudravua kei na nodra i kalawa na vakaloloma."

⁷Na nona sala na yalododonu sa dodonu sara; vei Kemuni na yalododonu sara, o ni vakarautaka na nona sala na yalododonu.

⁸Io ena Nomuni lewa dodonu, i Jiova keimami waraki Kemuni; na loma i keimami sa gadreva na Yacamuni kei na ka o Ni nanumi kina.

⁹Ena lomaqu au sa gadrevi Kemuni ena bogi, io ena yaloqu au na vakasaqarai Kemuni ni se qai mataka caca; ni sa tiko e vuravura na Nomuni cudru e ra na qai vulica na dodonu na lewe ni vanua.

¹⁰Ni lomani tiko na tamata i valavala ca, e na sega ni rawa ni vulica tiko na i valavala dodonu; e na nodra vanua na tamata dodonu o koya e na bula tu ga vakaveitalia, ka na sega ni rawa ni raica na i ukuuku i Jiova.

¹¹I Jiova, sa laveti cake na Ligamuni e ra na sega ni raica. Ia ni ra na raica e ra na madua ena nodra loma ca vei ira na tamata; ia na bukawaqa nodra na nomu meca ena vakaoti sara.

¹²Jiova o ni na vakadeitaka vei keimami na vakacegu, ni Kemuni sa cakava kecega vei keimami na cakacaka me yaga vei keimami.

¹³Kemuni Jiova o ni sa neimami Kalou e ra a lewai keimami o ira na Turaga tani; ia na Vukumuni duadua ga keimami na vakacaucautaka na Yacamuni.

¹⁴E ra sa mate, e ra na sega ni bula tale; e ra sa yali yani e ra na sega ni tucake tale. O koya Kemuni sa vakarusai ira ka vakaotia na ka me ra nanumi kina.

¹⁵I Jiova o ni sa vakatubura cake na matanitu, o ni sa rokovi o ni sa vakarabailevutaka na i yalayala kece ni vanua.

¹⁶I Jiova, ni ra sa tiko leqa e ra sa qai lako mai vei Kemuni, e ra sova na masu vuni ni Kemuni sa cudruvi ira.

¹⁷Me vaka na yalewa bukete ni tagi ka mosi, ni sa roro tiko mai na nona gauna ni vakasucu keimami a vaka kina e Matamuni, Jiova.

¹⁸Keimami sa tiko vaka gone, keimami sa kune rarawa; sa vaka ni keimami a bukete ka vakasucuma na cagi; keimami a sega ni vakabula rawa na vanua, ka sega ni dua na lewe i vuravura me vakabalei.

¹⁹Ena bula o ira na nomu mate; e ra na tucake vata kei ira na noqu mate, yadra ka sere, o iko ka vaka i tikotiko ena kuvu ni qele; ni sa vaka na tegu ena co na nomu tegu kei na qele ena biuti ira tani na mate.

²⁰Dou lako mai noqu tamata ka curuma nomudou yasana vuni, ka sogota na nomudou katuba; dou vunitaki kemudou vakalailai mada ga, me yacova ni sa oti na veicudruvi.

²¹Ka raica, sa lako tani mai o Jiova ena Nona yasana me cudruvi ira na lewe i vuravura ena nodra i valavala ca; o vuravura ena sega ni rawa ni ubia tiko na nona dra, ka na sega ni vunitaki ira tiko na moku mate.