[23] Aisea 38

¹Ena siga o ya sa tauvi mate o Esekaia ka sa voleka ni mate. Sa qai lako mai vua o Aisea na parofita na luvei Emosi ka tukuna vua, "Sa tukuna vakaoqo o Jiova: 'Mo tuvana vakavinaka nomu vuvale, ni o na mate ga ka sega ni bula.'"

²Sa qai vuki na matana ki lalaga, ka masu vei Jiova,

³Ka sa tukuna, "Au masuti kemuni, Jiova, mo ni nanuma mada na noqu dau lako voli e matamuni ena yalodina kei na yaloqu taucoko, kei na noqu caka vinaka e matamuni." Ka sa tagi vakalevu sara o Esekaia.

⁴Sa qai yaco mai na vosa i Jiova vei Aisea, ka vaka,

⁵"Mo lako vei Esekaia ka tukuna, 'sa vosa vakaoqo o Jiova na Kalou i Tevita na nomu qase: "Au sa rogoca na nomu masu, Au sa raica na wai ni matamu; ka raica Au na tomana na nomu gauna ni bula me tini kalima tale na yabaki.

⁶"Au na sereki iko kei na koro levu oqo mai na ligai tui Asiria, au na taqomaka na koro levu oqo."'

⁷"Oqo nai vakatakilakila vei iko mai vei Jiova, ni na vakayacora e dua na ka oqo, ena ka sa cavuta:

⁸"Raica, ka'u na vakasuka tale ki muri na yaloyalo sa lako sobu ena i vakatakilakila ni matanisiga nei Easi, me tini na tikina. A sa suka tale ki muri na matanisiga me tini na tikina." A tikina oqori ka sa lako sobu kina.

⁹Oqo na nona volavola o Esekaia na tui Juta, ena gauna ni nona tauvimate kei na nona bula tale mai na mate:

¹⁰Au tukuna, "Ena gauna e tu donu kina na noqu bula au na lako ka curuma na matamata ki Etesi, sa vakayali vei au na noqu yabaki sa vo tiko."

¹¹Au tukuna, "Au na sega ni na raici Yawe, o Jiova ena nodra vanua na bula, au na sega ni raica tale na tamata kei ira na lewe i vuravura.

¹²Noqu gauna ni bula sa oti, e kau tani vei au me vaka na vale laca nona nai vakatawa ni sipi; au sa gutuva na noqu bula me vaka nona wa na dautali i sulu; o ni na vakaotia na noqu bula ena mataka me yacova na bogi.

¹³Au a vakasama tiko me yacova ni sa mataka me vaka na laione, sa vakaramusutaka taucoko o koya na suiqu, mai na siga me yacova na bogi o ni sa vakaotia noqu bula.

¹⁴Au a vaka na kakabace se na belo ena noqu rorogo ni tagi vakamamakeukeu; au tagi rarawa me vaka na ruve; sa oca na mataqu ena noqu rai cake tiko. Kemuni Jiova, ka'u sa bitaki sara; mo ni vukei au mai!

¹⁵"A cava tale me'u na tukuna? Sa vosa oti mai vei au o Koya, ka sa vakayacora talega o Koya, au na qarauna na noqui lakolako ena noqu veiyabaki ena vuku ni rarawa ni lomaqu.

¹⁶Kemuni Jiova, ena veika oqo ena bula na tamata; ena vuku ni ka kecega oqo sa bula na yaloqu; Kemuni na vakabulai au me'u sa bula kina.

¹⁷E dina na noqu rarawa bibi sa vakayacori au me'u vakacegu kina, o ni a vakabula na yaloqu ka vakabula mai nai keli ni rusa, ni Kemuni sa biuta ki Dakumuni na noqui valavala ca kecega.

¹⁸Ena sega ni vakavinavinaka vei Kemuni nai bulubulu, se vakacaucautaki kemuni o mate; o ira sa lako sobu ki nai keli era na sega ni nuitaka na nomuni vosa ni dina.

¹⁹O koya sa bula, na tamata sa bula, me vakavinavinakataki Kemuni, me vakataki au ena siga oqo, ena tukuna na dina me baleti Kemuni o ira na qase vei ira na gone.

²⁰"Sa vakarau tu o Jiova me vakabulai au, o koya oqo me da qai lagata vata noqu sere e nai vakatagi vakawa ena vale i Jiova, ena veisiga ni noda bula."

²¹Sa tukuna oti tu o Aisea, "Me ra kauta e dua nai buli lolo, ka ubia kina na bo ena qai bula o koya."

²²Sa tukuna talega o Esekaia, "A cava nai vakatakilakila ni'u na lako cake ki na vale i Jiova?"