[23] Aisea 41

¹"Dou vakadirorogo vei Au, na veiyanuyanu, ka me ra vakavoui tale mada na lewe ni vanua na nodra kaukauwa! Me ra toro voleka mai, me ra qai vosa; me da mai ia vata na veilewai.

²"O cei sa vakatubura e dua mai na tokalau? Ena nona yalododonu e kacivi koya mai ki na yavana ka solia na veimatanitu vua, ka lesi koya me lewai ira na tui? O cei ka soli ira me vaka na kuvu ni soso kina no nai selewau ka vukataka na dakai titi me vaka na vuni sila cagina?

³Sa vakasevi ira o koya, ka sa lako vakavinaka voli yani ena sala sa sega ni butuka na yavana?

⁴O cei sa vakaraitaka ka cakava, ka kaciva na veitabatamata mai liu sara? 'Oi Au o Jiova nai vakatekivu; Oi Au talega nai vakataotioti.'"

⁵O ira ena baravi era raica ka ra qai rere, nai yalayala kei vuravura era sa domobula; era toro voleka ka lako mai.

⁶Era sa vukei ira yadua na wekana, ka tukuna vei ira na tacidra, "Mo yaloqaqa tiko!"

⁷Na dauceuceu sa vakayaloqaqataki koya na matai ni koula; kei rau na dauvakayagovinakataka nai tukituki kei na dautukia e nai tuki kaukamea, e rau sa tukuna, "Sa drega vinaka oqo" ka rau sa vakadeitaka e nai vako, me kakua ni yavala.

⁸"Ia o iko, Isireli, na Noqu tamata, o iko Jekope Ka'u sa digitaka, na kawa i Eparama na Noqui tokani vinaka.

⁹O iko Ka'u a kauta mai nai yalayala kei vuravura, ka kaciva mai ena sauka ni vanua, ka tukuna vei iko, 'O iko Noqu tamata, ka'u a digitaki iko ka sega ni biuti iko:

¹⁰Kakua ni o rere, Ni'u sa tiko vata kei iko: Kakua ni o taqaya Ni'u sa nomu Kalou. Au na vakaukauwataki iko, io Au na vukei iko, io Au na tokoni iko ena ligaqu i matau sa dau dina.'

¹¹"Raica, era na madua ka yaluma mai o ira kecega era yaloca vei iko; era na vaka na ka walega, era na rusa ga o ira era veileti kei iko.

¹²O na qarai ira ka sega ni kunei ira o ira”era dau via veicudruvi kei iko. O ira era veivala kei iko era na vaka na ka walega, sa sega ni vakavotukana.

¹³Ni sai Au, o Jiova na nomu Kalou, ka'u na taura na ligamu i matau, ka tukuna, 'Mo kakua ni rere, Au na vukei iko.'

¹⁴"Mo kakua ni rere, o iko Jekope na wadamele kei kemudou na Isireli! Au na vukei iko," sa tukuna o Jiova kei na nomui Vakabula, na Yalosavasava ni Isireli.

¹⁵"Raica, Au na vakayacori iko mo vaka e dua na yava ni qiqi vou ka gatagata na batina; o na samuta na veiulunivanua ka butuqaqia mematailalai, kei na veidelana mo vakatautauvatataka kei na qa ni sila.

¹⁶O na iriva ena qai cagina tani ena cagi, ena qai mai veibiuyaka na covulaca; o iko mo rekitaki Jiova, o na vakacaucautaki Koya na Yalosavasava ni Isireli.

¹⁷"O ira na dravudravua kei na vakaloloma era vakasaqara na wai, ia sa sega, ni sa mamaca na yamedra ena via gunu, oi Au, o Jiova, Au na rogoci ira; Oi Au na nodra Kalou na Isireli, Ka'u na sega ni laivi ira.

¹⁸Au na vakadavea na uciwai ena vanua talasiga, kei na mata ni wai ena loma ni vei buca; Au na cakava na vanua dravuisiga me vei tobu ni wai, kei na vanua mamaca me vurevure ni wai.

¹⁹Au na tea ena talasiga na sitari kei na sitimi, kei na mateli kei na olive; Au na tea vata ena vanua dravuisiga na nokonoko na damanu kei na dilo,

²⁰Me rawa ni ra raica ka kila, ka vakasamataka me rawa ni ra kila vata, ni sa cakava na ka oqo na liga i Jiova, ni sa bulia kecega o Koya na Yalosavasava ni Isireli.

²¹"Dou vakaraitaka mai nomudou kisi," sa tukuna o Jiova, "Dou vakamacalataka mai na nomudou i le," sa tukuna na Tui i Jekope.

²²"Me ra tukuna mada mai ka vakatakila vei keda na ka ena yaco, mera vakaraitaka na veika sa oti me kilai, me rawa ni da vakalewa vinaka, me da kila na kena i tinitini; me rawa ni qai vakaraitaka vei keda na veika se bera ni yaco.

²³Dou vakaraitaka mai na ka ena yaco mai muri me keitou kila ni dou sa kalou; io ni dou cakava na ka vinaka se na ka ca, me keitou taqaya ka raica vata.

²⁴E dina ga dou sa ka walega, kei na nomudou cakacaka sa ka wale; o koya sa digitaki kemudou sa tamata vakasisila dina.

²⁵"Au sa vakatubura e dua mai na vualiku, ena qai lako mai, mai nai cadracadra ni matanisiga, ena kaciva mai na Yacaqu,ena lako mai me saqati ira na ravouvou me vaka na vanataki ni dakai levu mai na vanua cecere, me vaka na dautuli kuro ni babia na tete.

²⁶O cei beka sa tukuna mai nai vakatekivu me keimami kila? Se na gauna sa oti yani, me keimami tukuna, 'Sa dodonu o Koya'? E dina ni sega ni dua me vakaraitaka, e dina e sega ni dua me cavuta, e dina e sega ni dua me rogoca nomu vosa.

²⁷Nai matai ni gauna Au tukuna vei Saioni, 'Raica o ira sa tu o ya!' Au na qai solia ki Jerualemi o koya sa kauta mai nai rogorogo vinaka.

²⁸Ni'u rai yani, Au sega ni raica e dua na tamata, Ni'u vakaraici ira Au sega ni kunea rawa e dua na daulewa, na gauna Me'u tarogi ira kina sega e dua vei ira me vosa.

²⁹Sa dina sara sa ka walega, nodra cakacaka e maumau walega; na nodra matakau ceuti sa cagi walega ka veilecayaki.