[23] Aisea 49

¹"Dou vakarorogo vei Au, na veiyanuyanu, ka vakatudaliga mai oi kemudou mai na vanua yawa! O Jiova sa kacivi Au mai na kato ni gone ka sa vakayacani Au mai na loma ni kete i tinaqu.

²Ka sa bulia na gusuqu me vaka nai seleiwau gata; ka qai vunitaki Au ena i yaloyalo ni ligana, ka qai lumuti Au me'u caliva tu me vaka na kaukamea, ka qai vunitaki Au ena nona taga ni gasau."

³"Sa qai tukuna vei au o Koya, 'O iko na Noqu tamata, Isireli, mai vei iko Au na vakacaucautaki.'

⁴Au a qai tukuna, 'Au sa oca ka sega na betena, Au vakayalia na noqu kaukauwa ka sega ni dua na ka au taura lesu, io na kequi sau dodonu dina ga sa tu vei Jiova, kei na noqu cakacaka sa tu vua na noqu Kalou.'"

⁵"Oqo sa tukuna o Jiova, o koya ka buli Au mai na kato ni gone me'u nona tamata, me'u kauti ira na Jekope lesu mai vei Koya, me ra vakasoqoni vata vei Koya o ira na Isireli (me rawa ni'u lagilagi kina ena matai Jiova, ni sa vuni Noqu kaukauwa na Noqu Kalou.)'

⁶Oqo na Nona vosa dina ni tukuna, 'Sa ka lailai mo Noqu tamata mo vueta cake na veimataqali i Jekope, ka vakasuka lesu na ka maroroi nei Isireli, Au na soli iko talega mo nodra rarama na Veimatanitu tani, Mo yaco talega mo vu ni bula ena Vukuqu kina i yalayala kei vuravura.'"

⁷Sa tukuna vakaoqo o Jiova, nai Vakabula ni Isireli, na nodra Yalo Savasava, era na beci Koya na tamata, era na vakasisilataki Koya na lewe ni vanua, o Koya na tamata nodra na Turaga, "O ira na tui era na raica ka tucake mai, o ira talega na ravouvou era cuva ka vakarokoroko vua, ena vuku i Jiova o Koya sa dau yalodina, o Koya na Yalosavasava ni Isireli; o Koya sa digitaki Iko."

⁸Sa tukuna vakaoqo o Jiova; "Ena gauna sa lokuci Au a rogoci iko, kei na siga ni veivakabulai Au a vukei iko; Au na maroroi iko ka soli iko mo veiyalayalati kei ira na tamata, mo vakatoroicaketaki vuravura, me rawa ni tawani tale na veivanua sa lala tu;

⁹Mo tukuna talega vei ira na vesuki, 'Dou lako yani,' vei ira ka tiko ena butobuto, 'Dou lako mai ka vakaraitaki kemudou,' "Era na kana ena gaunisala, na nodra veico drokadroka ena tu mai ena veiyasana cecere.

¹⁰Era na sega ni viakana se viagunu, ena sega ni vakacacani ira na katakata se na siga, ni o Koya ka lomani ira e liutaki ira tiko, ena tuberi ira talega kina mata ni wai vure.

¹¹Au na cakava na Noqu veiulunivanua me gaunisala, ena vakaceceretaki na veisala buli kece.

¹²E dina ni ra na lako vakayawa sara mai, raica o ira mai na vualiku kei na ra, kei ira vata kece mai na vanua o Sainimi."

¹³Mo lagasere mai, na lomalagi! Ka reki, na vuravura! Ka kacabote mai na lagasere, na ulunivanua! Ni sa vakacegui ira na nona tamata o Jiova, ena lomani ira o ira era vakaleqai.

¹⁴Ia sa tukuna o Saioni, "O Jiova sa biuti au, ka sa guilecavi au talega na noqu turaga."

¹⁵"E na rawa li vua e dua na yalewa me na guilecava na luvena se qai sucu, me kua ni lomana na luvena na lewe ni ketena? E dina sara e rawa ni guilecava, io, oi Au, au na sega sara ni rawa ni na guilecavi iko.

¹⁶Mo raica, Au sa ceuti iko tu ena qeteqete ni ligaqu; a nomu bai sa tikotiko ga e mataqu.

¹⁷O ira na luvemu tagane era na lako kusarawa mai; o ira na dau vakacacani iko kei ira na dau butakoci iko era na lako tani mai vei iko.

¹⁸Mo tacake, ka veiraiyaki, o ira kecega oqo era sa soqoni vata mai, era sa lako mai vei iko me vaka na kena dina ni Noqu bula," sa tukuna o Jiova; "O ira kecega oqo o na vakaisulutaki iko kina, me vaka na ka ni ukuuku ka vauca vei iko me vaka sa ia na yalewa sa qai vakawati.

¹⁹"Ena nomu vanua sa lala ka vakarusai tu, e sa na lailai ka sega ni veirauti vei ira na lewe ni vanua; kei ira era via tilomi iko era na yawa sara.

²⁰O na tauri ira na gone, ni o sa vakayalia eso vei ira, era na vosa e daligamu, ka vaka 'Sa lailai vei keimami na vanua oqo, mo solia vei au e dua na vanua me'u na tiko kina.'

²¹O na qai vosa e yalomu, 'O cei ka vakatuburi ira oqo me noqu, ni ra sa mai yali taucoko na luvequ ka'u sa tu wale tu ga oqo, na bobula, ka dau veilakoyaki vaka ka vaka? O cei sa susugi ira cake oqo? Au a biu laivi tu; ia o ira oqo era a tiko mai vei?'"

²²Sa tukuna o Jiova na Kalou, "Raica Au sa laveta cake na ligaqu me vakadinadina vei ira na veimatanitu, ka vakaduria na Noqu kuila vei ira na tamata; era na keveti ira mai na luvemu tagane ena ligadra, kei na luvemu yalewa ena laveti mai e tabadra;

²³O ira na luvemu era na susugi mai vei ira na tui, kei ira na nodra marama era na mai veiqaravi vei iko; Era na mai cuva sobu e matamu ka vakanamata ki na qele, ka quraka laivi na kuvu mai na yavamu. Mo na kila kina ni sai Au o Jiova, ni ra na sega ni madua o ira era dau waraki Au."

²⁴Me na kau tani li nai toki ni valu mai vua na qaqa, se o ira era bobula ni yalododonu me ra na sereki?

²⁵Ia sa tukuna o Jiova; "O koya mada ga e vesuki tu vei koya na qaqa ena kautani, kei nai toki ni valu vei koya na tamata rerevaki duadua ena sereki ga, Au na valuti koya o koya e via valuti iko, Au na vakabulai ira na luvemu.

²⁶Au na vakani ira o ira era via vakasaurarataki iko ena yagodra, era na mateni ni ra gunuva ga nodra dra, me vaka na waini kamikamica, me ra na kila na tamata kecega ni oi Au o Jiova na nomui vakabula, ka voli iko, sai Au na kaukauwa i Jekope."