[23] Aisea 5

¹Me'u lagasere mada vua na noqu Daulomani na sere baleti Daulomani ena vuku ni nona loga ni vaini: na were ni vaini nei koya na noqu Daulomani e tiko ena dua na delana bulabula.

²E kelia vinaka ka biuta tani na vatu ka tea kina na vaini vinaka sara, ka tara e dua na vale cecere e loma, a sa kelia kina na i keli waini; ka sa qai nuitaka me vua mai kina na vaini vinaka, sa qai vuataka mai na vaini ca.

³"Ia oqo oi kemudou na kai Jerusalemi kei na tamata i Juta, dou lewa mada mai vei au kei na noqu loga ni vaini.

⁴A cava tale me caka ena Noqu loga ni vaini ka'u a sega ni cakava kina? Na cava Ni'u nuitaka me vuataka na vaini vinaka, sa qai vuataka tu na vaini ca?

⁵Oqo ka'u na tukuna mada vei kemudou na ka Au na kitaka kina noqu loga ni vaini: Au na kauta tani na kena veiwa dautubu tu i sau me na qai kama; me basuki na kena bai me qera sobu.

⁶Au na biuta me i benubenu ena sega ni samaki se vakatoroicaketaki, me na tubura na kau votovotoa kei na soni. Au na qai vakarota na o me kakua ni tauca mai na uca."

⁷Ni sa loga ni vaini i Jiova ni lewe vuqa na mataqali i Isireli, kei na tamata i Juta era nona kau talei. Sa qara na lewa dodonu, ia na veivakararawataki; sa qara na bula dodonu raica sa rogoci ga na tagi ni veivuke.

⁸Ena ca o ira era veisematitaka na vale kina dua tale na vale; ka kuria na teitei kina teitei, me yacova ni sa sega ni dua na vanua e vo ka okati me ra qai tiko yadua ena loma donu ni vanua!

⁹E rogoca tiko na daligaqu ni vosa tiko o Jiova ni lewe vuqa, "E dina e vuqa na vei vale ena lala, na veivalevale lelevu totoka ena sega e dua me vakatawa.

¹⁰Na loga ni vaini e tini na eka ena rawata ga e dua na ka lailai, kei na kaburaki ni vuqa na sore ni tei ena takiveiyaga sara ena rawa mai."

¹¹Era na ca o ira sa souta na gunu yaqona ena mataka caca ka bogicaka me yacova ni ra sa mateni ena waini!

¹²Ia na api kei na wai ni vakatagi na tiberieli kei na bitu ni vakatagi, kei na waini sa ka ni nodra soqo; ia na cakacaka i Jiova era sega ni bau kauwai kina, kei na veika e cakava na ligana me ra wilika.

¹³O koya oqo era na kau vakabobula kina na noqu tamata, ni sa sega vei ira na kila ka; nodra vei Turaga era na viakana kei na nodra lewe vuqa era na karamaca ena via gunu wai.

¹⁴O koya oqo sa vakalevutaki koya kina o bulubulu ka dolava tu vakalevu na gusuna; na kedra totoka na nodra rogo na kedra lewe levu kei na marau ena ka wale era na tini taucoko kina.

¹⁵Era na biu sobu na tamata, ka yaco me ra vakamalumalumutaki ira, kei na mata viavialevu ena malumalumu ga mai.

¹⁶Ia ena vakacerecerei o Jiova ni lewe vuqa ena siga ni veilewai, na Kalou ena vakarokorokotaki ena dodonu savasava.

¹⁷Na lami ena kana ena veico drokadroka na vulagi ena kania na vanua sa biu tani vakatikitiki.

¹⁸Ena ca o ira era kauta mai na i valavala ca ena wa ni lasu ka caka ca me vaka na dali dreta na qiqi;

¹⁹Dou tukuna, "Me totolo cake ka vakusakusataka na Nona cakacaka, meda raica; me toso mai ka lako mai, na lewe Dua Savasava ni Isireli me rawa nida qai kila."

²⁰Era na ca o ira era vakatoka na ca me vinaka kei na vinaka me ca; era tukuna sa rarama na butobuto ka butobuto na rarama; era tukuna sa kamikamica na ka gaga ka gaga na ka kamikamica!

²¹Ena ca o ira sa bau nanuma ni ra vuku, ni ra kila tiko ni ra yaloqaseqase!

²²Ena ca o ira era daugunu waini tu ga vakasivia, kei ira na daulosea vata na waini,

²³Era vakadonuya na tamata ca me dua na kena i wase me nona, ka ra qai kauta tani mai vua na tamata dodonu na nona dodonu!

²⁴O koya oqo ena kama kina na vuni sila, ena yameyame ni buka ka sa yavu sara na co, ni sa caucaudre ena vuca sara vaka kina na wakadra, ia na sedra ena vuka cake me vaka na kuvu ni soso, baleta ni ra sa vakanadakuya na i vunau nei Jiova ni lewe vuqa, ka beca na vosa nei Koya na le Dua

²⁵O koya oqo sa waqa mai kina na cudru i Jiova vei ira na Nona tamata; ka dodo yani na ligana ka samuti ira, e yavavala na vei delana na yagodra sa vaka na soqosoqo ena loma ni gaunisala. Ni sa yaco tiko na ka oqo e sega ni oti tikoga na Nona cudru, se dodo tikoga na ligana vei ira.

²⁶Ena qai vakarewataka o Koya na kuila vei ira na matanitu tu vakayawa, ena qai kaluvi ira mai na i yalayala kei vuravura; ka raica era na vakusakusa, ka vakatotolo na nodra lako mai.

²⁷Ena sega ni dua vei ira me na malumalumu se bale se sosovu se moce; sega ni dua me na kasere na i vau ni tolona, se na nodra i vesu ni vava me cavuka;

²⁸Na nodra gasau e motomoto vinaka, ka sa vakarau tu na nodra dakai titi na nodra yava ni ose sa vaka mai na vatu qiwa, kei na nodra qiqi ni valu sa vaka na covulaca.

²⁹Na nodra rorogo ena vaka na laione, ena vaka na rorogo ni luve ni laione, io, era na tagi era na kudru ni ra sa toboka; era vakamareqeta vakavinaka, ni ra sa kauta ena sega ni dua me na bula.

³⁰Ena siga o ya sa na kacabote mai na domodra vakataki ira ga me vaka na rorogo ni vadugu ni ua mai wasawasa, kevaka me dua e qai rai mai kina vanua, ka raica, na butobuto kei na rarawa; ka sa vakabutobutotaki na rarama ena o.