[24] Jeremaia 1

¹Na vosa i Jeremaia na luvei Ilikaia, e dua vei ira na bete era tiko mai Anacoci e na vanua o Penijamini,

²Sa yaco kivua na vosa i Jiova ena gauna i Josaia na luve i Emoni na tui Juta, e nai ka tinikatolu ni yabaki ni nona lewa.

³A sa yaco talega ena gauna i Jioiakimi na luve i Josaia na tui Juta, ka yacova ni sa oti nai ka tinikadua ni yabaki i Setekaia na luvei Josaia na tui Juta, me yacova na siga sa kau vakabobula kina o Jerusalemi ena i kalima ni vula.

⁴Sa qai yaco vei au na vosa i Jiova, ka vaka,

⁵"Ni'u a bera ni buli iko ena kete Au sa kilai iko; ni bera ni o sucu mai Au sa vakatabui iko, ka lesi iko mo parofita ki na veimatanitu."

⁶Au a qai tukuna, "Isa, noqu Turaga Jiova! Raica, au sa sega ni kila vosa, ni'u sa gone ga oi au."

⁷Ia sa tukuna vei au o Jiova: "Mo kakua ni cavuta, 'Au sa gone ga oi au,' ni o na lako vei ira kecega Au sa talai iko kina, ia na ka kece talega Au sa vakarota vei iko, mo na tukuna.

⁸Mo kakua ni rerevaka na matadra, Ni'u sa tiko vata kei iko me'u na vakabulai iko," sa tukuna o Jiova.

⁹Sa qai dodoka mai na ligana o Jiova, ka tara na gusuqu, ka sa tukuna vei au o Jiova: "Raica, Au sa tauca na Noqu vosa ki na gusumu.

¹⁰Raica, Au sa lesi iko e na siga oqo ki na veivanua kei na veimatanitu, mo cavuta laivi, ka dreta sobu, mo vakarusa, ka talaraka, mo tara, ka tea."

¹¹Sa yaco tale vei au na vosa i Jiova, ka vaka, "I Jeremaia, na cava o sa raica?" Au mani tukuna, "Au sa raica e dua na taba ni amodi."

¹²Sa qai tukuna vei au o Jiova, "O sa raica vinaka: Ni'u sa tu vakarau Me'u vakayacora na Noqu vosa."

¹³Sa yaco tale me vakarua vei au na vosa i Jiova, ka vaka, "Na cava o sa raica?" "Au a qai tukuna, "Au raica e dua na kuro sa buebue tu, ia sa qara tani yani mai na vualiku."

¹⁴Sa qai tukuna vei au o Jiova, "Ena kacabote mai na vualiku e dua na ca kivei ira kecega na lewe ni vanua.

¹⁵Raica mada! Ni'u sa kacivi ira tiko na veivuvale kecega ni veimatanitu mai na vualiku, sa tukuna o Jiova; "Era na lako mai, ka dui vakatura na nodra i cewacewa vakaturaga e na matamata-ni-koro mai Jerusalemi, volekata na kena bai kecega e vakavolivolita, kei na veikoro kecega vaka-Juta.

¹⁶Au na tukuna na Noqu lewa vei ira e na vuku ni nodra ca kecega, ni ra sa biuti Au, ka vakama nai madrali boi vinaka ki na kalou tani, ka soro ki na cakacaka ni ligadra.

¹⁷"O koya oqo mo qai vakarautaki iko ka tu cake, ka cavuta vei ira na ka kecega Au sa vakarota vei iko. Kakua ni o rere e matadra, de'u vakataqayataki iko e matadra.

¹⁸Mo raica mada, Au sa lesi iko e na siga oqo mo koro kaukauwa, ka mo duru kaukamea, ka bai varasa e na vanua taucoko - vei ira na tui Juta, vei ira na kena turaga, vei ira na kena bete, kei ira na lewe ni vanua.

¹⁹Era na veivala kei iko, ka ra na sega ni gumatua vei iko. Ni'u sa tiko vata kei iko," sa tukuna o Jiova, "Me'u vakabulai iko."