[24] Jeremaia 14

¹A vosa i Jiova sa yaco vei Jeremaia e na vuku ni dausiga.

²"Sa tagi o Juta, a kena veimatamata-ni-koro sa malumalumu; era sa loaloa ka dabe e na qele; ia sa lako cake na tagi i Jerusalemi.

³O ira talega na nodra turaga era sa talai ira na nodra lalai ki na wai: era sa yaco ki nai keli, ka sega ni kunea na wai; era sa lesu ka maca wale na medra bilo; era sa madua ka taqaya, ka ra sa ubia na uludra.

⁴Ni sa kakaca na qele, ni sa sega na uca ena vanua, era madua nai vakatau-ni-were, era sa ubia na uludra.

⁵Io, na teiri talega sa vakasucu e na teitei, ka sa biuta, ni sa sega na co.

⁶Na asa kila talega, era sa tu mai na talasiga, era dramica na cagi me vaka na gata lelevu; sa malumalumu na matadra, ni sa sega na co."

⁷Kemuni Jiova, o Ni sa beitaki keimami dina e na neimami caka cala, ia Mo Ni cakacaka e na vuku ni yacamuni ga: ni sa ka levu na neimami dauvuki; keimami sai valavala ca vei kemuni.

⁸Kemuni ga era dauvakararavi kina na Isireli, na nodra i vakabula e na gauna ni rarawa. E na vuku ni cava o Ni sa vaka na vulagi e na vanua, ka vaka na tamata sa daulako tu sa tiko walega me moce e na bogi?

⁹E na cava o Ni sa vaka na tamata sa taqaya, ka vaka na qaqa sa sega ni ia rawa na veivakabulai? ia, oi kemuni, Jiova, o Ni sa tiko kei keimami, na Yacamuni talega keimami sa vakayacani kina; Mo ni kakua ga ni biuti keimami!

¹⁰Sa tukuna vakaoqo o Jiova vei ira na tamata oqo, "Sa vaka ga oqo na nodra vinakata me ra lako sese, era sa sega ni tarova na yavadra, ia o Jiova sa sega kina ni vinakati ira; ena nanuma oqo na nodra caka cala, ka cudruva na nodra i valavala ca."

¹¹Sa qai tukuna vei Au o Jiova, "Mo kakua ni masulaki ira na tamata oqo me ra vinaka.

¹²"Ni ra sa lolo, Au na sega ni rogoca na nodra tagi, ni ra sa vakacabora nai soro kama kei nai madrali; Au na sega ni vinakati ira, ia Au na vakarusai ira ga e nai seleiwau, kei na viakana, kei na mate dauveiveitauvi."

¹³Au sa qai tukuna, "Ulei, noqu Turaga Jiova! Raica, o ira na parofita era sa tukuna vei ira, 'Dou na sega ni raica nai seleiwau, ena sega talega vei kemudou na viakana; ni'u na solia vei kemudou e na yasana oqo me sautu dina ga.'"

¹⁴A sa tukuna vei Au o Jiova, "Sa ka lasu ga era parofisaitaka e na Yacaqu o ira na parofita. Au a sega ni talai ira, Au a sega ni vakaroti ira, au a sega talega ni vosa vei ira. Era sa parofisaitaka ga vei kemudou na raivotu lasu, kei na vosa mana lasu, kei na ka wale, kei nai lawaki ni lomadra.

¹⁵"O koya sa tukuna kina o Jiova e na vukudra na parofita era sa ia na parofisai ena Yacaqu, ia oi Au, Au a sega ni talai ira, ka ra sa tukuna ga, 'Nai seleiwau kei na dausiga ena sega ni yaco ki na vanua oqo' ” 'Era na vakarusai ga na parofita o ya e nai seleiwau kei na dausiga!

¹⁶'Ia na tamata era sa dauparofisai vei ira era na biu tu ki na saqata ni koro o Jerusalemi e na vuku ni dausiga kei nai seleiwau; ena sega talega e dua me buluti ira; o ira, se na watidra, se na luvedra tagane, se na luvedra yalewa, ia Au na sovaraka ga vei ira na nodra ca.'

¹⁷"Ia mo tukuna vei ira na vosa oqo; 'Me dave sobu na wai mai na mataqu e na siga kei na bogi, ia me kakua ni cegu. Ni sa ramusu na luvena yalewa na noqu tamata e na dua na rusa levu, ka sa yaviti vakaca sara.

¹⁸Kevaka Au sa lako yani ki na were, raica, era sa davo no o ira na vuetaki e nai seleiwau! Kevaka Au sa curu yani ki na koro, raica, era sa davo no o ira na mate e na viakana! Io, o ira vata na parofita kei na bete era sa lako voli ga ki na dua na vanua era sa sega ni kila.'"

¹⁹O Ni sa biuti ira sara beka na Juta? Sa vakasisilataki ira beka na Saioni na Yalomuni? Ena cava o Ni sa cudruvi keimami, ka keimami sa sega ni vakabulai rawa tale? Keimami a yadrava na vakacegu, ka sa sega ni yaco e dua na ka vinaka; Keimami tukuna me yaco na gauna ni veivakabulai, ia raica, sa yaco ga na ka rarawa.

²⁰Kemuni Jiova, keimami sa vakatusa na neimami ca, kei na caka cala ni neimami qase, ni keimami sai valavala ca vei Kemuni.

²¹Mo ni kakua ni cati keimami, e na vuku ni Yacamuni, Mo Ni kakua ni vakarogocataka na Nomuni tikotiko vakaiukuuku. Mo ni nanuma, ka Mo Ni kakua ni vakatawayagataka na nomuni veiyalayalati kei keimami.

²²Sa dua beka na nodra ka lasu na veimatanitu me vakatauca rawa na uca? Se sa solia rawa beka na uca o lomalagi? Sai kemuni duaduaga, Jiova, na neimami Kalou se sega? O koya keimami na vakararavi kina vei Kemuni, ni sai Kemuni ga sa cakava na ka kece oqo.