[24] Jeremaia 18

¹Na vosa e a yaco vei Jeremaia mai vei Jiova, ka vaka,

²"Mo tu cake, ka lako sobu ki na nona vale na dautuli bilo, ia Au na tukuna vei iko mai keya na Noqu vosa."

³Au a qai lako sobu ki na nona vale na dautulituli, ka raica, sa ia tiko e dua na cakacaka e na kenai tutu-wiri.

⁴A sa cataki na bilo tete sa cakava tiko, e na liga i koya na dautulituli; ka sa baci cakava tale me bilo tani, me vaka sa vinaka vua na dautulituli me cakava.

⁵Sa qai yaco vei au na vosa i Jiova, ka vaka:

⁶"Me'u sega beka ni veitalia vei kemudou, na mataqali i Isireli, me vaka taki koya na dautulituli oqo?" Sa tukuna o Jiova, "Raica, me vaka na tete e na liga i koya na dautulituli, sa vakakina oi kemudou e na Ligaqu, na mataqali i Isireli!

⁷"Na tiki-ni-siga Au na vosa e na vuku ni dua na vanua, se dua na matanitu, Me'u cavuta, ka basuka, ka vakarusa,

⁸"Kevaka ena lesu na vanua o ya mai na nodra ca, Au a lewa me ra ca kina, Au na qai veivutunitaka na vinaka, Au a tukuna Me'u cakava me ra vinaka kina.

⁹"Ia na tiki-ni-siga Au na vosa e na vuku ni dua na vanua, se dua na matanitu, me'u tara, ka tea,

¹⁰"Kevaka ena caka ca e Mataqu, me sega ni vakarorogo ki na domoqu, Au na qai veivutunitaka na vinaka, Ka'u a tukuna Me'u cakava me ra vinaka kina.

¹¹"Ia oqo, mo vosa vei ira na Juta, kei na lewe i Jerusalemi, ka vaka, 'Sa tukuna vakaoqo o Jiova; "Raica, Au sa tulia na ca kivei kemudou, ia Au sa vakananuma e dua na lewa e na vukumudou, dou dui lesu mada mai na nomudou i tovo ca, ka vakavinakataka na nomudou i tovo kei na nomudoui valavala."'"

¹²Era sa tukuna, "Sa sega sara ni rawa! Keimami na muria ga na neimami lewa, ia na nanuma ni lomai keimami ca keimami na dui cakava."

¹³O koya oqo sa tukuna kina o Jiova; "Dou vakataroga mada vei ira na veimatanitu, se o cei sa rogoca na ka vakaoqo; Sa dua na ka rerevaki sara sa cakava o koya na goneyalewa ni Isireli."

¹⁴E dua li me vakalaiva na uca-vulavula ni Lepanoni me kenai sosomi na wai mai na uluvatu ni vanua? se me biu beka na wai liliwa sa drodro tu me kenai sosomi na wai ni dua na tikina tani?

¹⁵"Ka ni ra sa guilecavi Au na Noqu tamata, ia era sa vakama kina na ka boi vinaka ki na ka lasu, ka ra sa vakatarabetaki ira e na nodra sala, ka sa biu ga nai lakolako makawa, me ra lako vakatikitiki e na sala sa sega ni buluti,

¹⁶me ra vakavuna na kena vakalalataki na nodra vanua, ka me vakasiusiutaki ka sega ni mudu; o ira kece era lako voli yani era na kidacalataka, ka kurea na uludra.

¹⁷Au na vakatolosevi ira e na mata ni meca me vaka e na cagi mai na vualiku; Au na vakanadakui ira e na siga ni nodra rarawa ka sega ni vakanamata vei ira."

¹⁸Era sa qai tukuna, "Me da mai bukia na vere kei Jeremaia, ni na sega ni yali na vunau mai vua na bete, se nai vakavuvuli mai vua na vuku, se na vosa mai vua na parofita. Me da mai vakacataki koya e na yameda, ia me da kakua ni vakarorogo ki na dua na nona vosa."

¹⁹Ni golevi au mai, Jiova, ka rogoca na domodra era veileti kei au!

²⁰Me saumi beka na vinaka e na ca? Ni ra a kelia nai keli me'u mate kina. Mo ni nanuma ni'u a tu e Matamuni me'u vosa vinaka e na vukudra, ka me'u saumaka tani na Nomuni cudru mai vei ira.

²¹O koya mo ni solia kina na luvedra me ra viakana, ka vakadavea na kedra dra e na kaukauwa ni seleiwau; ia me yali vei ira na watidra na luvedra, ka me ra yada talega; ka me ra vakamatei na nodra tagane; ia na nodra cauravou, me ra mate e nai seleiwau e nai valu.

²²Me rogo mai na nodra veivale na tagi, ni Kemuni sa vakauta nai valu me sikiti ira: ni ra sa kelia nai keli me rawai au; ia era sa vunia nai cori me tacori kina na yavaqu.

²³Io, oi Kemuni, Jiova, o Ni sa kila kece na nodra veretaki au me'u mate. Mo ni kakua ni buluta na nodra caka cala, ia na nodra i valavala ca mo ni kakua ni bokoca tani mai na Matamuni, ia me ra vakabalei sobu ga e matamuni; Mo Ni vakayacora vei ira e na gauna ni Nomuni cudru.