[24] Jeremaia 37

¹A sa buli o Setekaia na luve i Josaia nai sosomi kei Konaia na luve i Jioiakimi, o koya ka lesia o Nepukanesa me tui e na vanua o Juta.

²Ia o koya, kei ira na nona tamata, kei ira na lewe ni vanua, era sa sega ni vakarorogo ki na vosa i Jiova, sa vosataka o Jeremaia na parofita.

³Ia o Setekaia na tui sa talai Jiukali na luve i Selemaia kei Sefanaia na luve i Meesea na bete vei Jeremaia na parofita, me tukuna, "Mo masulaki keda mada vei Jiova na noda Kalou."

⁴Ia o Jeremaia sa veicuruyaki tiko vei ira na tamata: ni ra sa sega ni vakacurumi koya ki na vale ni veivesu.

⁵Ia sa qai lako tu mai Ijipita nai valu i Fero: ia ni ra sa rogoca na kenai tukutuku o ira na kai Kalitia era buku druadrua ni koro mai Jerusalemi era sa cavu tu ka lako tani e Jerusalemi.

⁶Sa qai yaco vei Jeremaia na parofita, na vosa i Jiova, ka vaka,

⁷"Sa tukuna vakaoqo o Jiova, na Kalou ni Isireli; 'Dou vosa vakaoqo vei tui Juta, o koya ka talai kemudou vei Au me mai tarogi Au; "Raica, nai valu i Fero ka lako mai me mai vukei kemudou, ena lako tale ki Ijipita kina nodra vanua.

⁸"A ra sa na lesu tale mai na kai Kalitia, ka veivala kei na koro oqo, ka rawa, ka vakama e na bukawaqa."'

⁹"Sa tukuna vakaoqo o Jiova; 'Dou kakua ni vakacalai kemudou, ka tukuna, "Era na lako tani vakaidina vei keda o ira na kai Kalitia," ni ra na sega ni lako tani.

¹⁰'Ia kevaka dou sa yaviti ira nai valu kecega ni kai Kalitia era veivala kei kemudou, me vo ga o ira na vuetaki, ka era na dui tucake ga na tamata yadua mai na nona vale laca ka vakama na koro oqo e na bukawaqa.'"

¹¹A sa yaco, ni sa lako tani nai valu ni kai Kalitia mai Jerusalemi e na vuku ni valu i Fero,

¹²Sa qai lako tani e Jerusalemi o Jeremaia me lako ki na vanua o Penijamini, me takali tani o koya mai vei ira na tamata.

¹³Ia ni sa yaco o koya kina Matamata ni Koro i Penijamini, sa tiko maikea e dua na kavetani ni valu sa vakatawa, na yacana o Irija, na luve i Selemaia, na luve i Enanaia: a sa tauri Jeremaia na parofita, ka tukuna, "O sa vuki vei ira na kai Kalitia!"

¹⁴A sa tukuna o Jeremaia, "Sa lasu! au sa sega ni vuki vei ira na kai Kalitia." Ia sa sega ni vakadinati koya: ka sa tauri Jeremaia o Irija, ka kauti koya vei ira na turaga.

¹⁵A ra sa cudru vei Jeremaia o ira na turaga, ka yaviti koya, ka biuti koya kina vale ni veivesu e na vale i Jonacani na vu-ni-vola: ni ra sa lesia na vale o ya me vale ni veivesu.

¹⁶Ia ni sa biu o Jeremaia kina vale sa keli, kei na kena veiqara, ka sa tiko kina o Jeremaia ka bogi vuqa,

¹⁷Sa qai talaki o Setekaia na tui, ka kauti koya tani mai kina: a sa tarogi koya lo o koya na tui e na nona vale, ka vaka, "Sa dua li na vosa mai vei Jiova?" Ka sa tukuna o Jeremaia, "Sa dua:" ka sa vaka, "O na soli kina liga i tui Papiloni!"

¹⁸Sa baci tukuna tale o Jeremaia vei Setekaia na tui, "A cava na ka ka'u sa cala kina vei kemuni, se vei ira na tamata oqo, ni dou sa biuti au kina vale ni veivesu?

¹⁹"Ia sa E vei na nomudou parofita era sa ia na parofisai vei kemudou, ka tukuna, 'Ena sega ni lako mai na tui Papiloni me vala kei kemudou, kei na vanua oqo'?

²⁰"Ia oqo mo ni rogoca mada, noqu turaga na tui, me vakabau mada na noqu vakamamasu; ka mo ni kakua ni vakasukai au tale kina vale i Jonacani na vunivola, de'u mate kina."

²¹Sa qai tukuna o Setekaia na tui me ra kauti Jeremaia kina lomanibai ni vale ni veivesu, ka solia vua e dua nai buli madrai e na veisiga mai na nodra tiki ni koro na dauvavimadrai, ka me oti sara mada na madrai e na koro. Ka sa tiko ga o Jeremaia e na lomanibai ni vale ni veivesu.