[24] Jeremaia 47

¹Sai koya oqo na vosa i Jiova vei Jeremaia na parofita me baleti ira na kai Filisitia, ni sa bera ni samuti Kesa o Fero.

²Sa tukuna vakaoqo o Jiova; "Raica, sa tubu cake na wai mai na vualiku, io sa na dua na dobui levu, ena luvuca na vanua, kei na ka kecega sa tu kina; na koro, kei ira era sa tiko kina: era na qai tagi na tamata, ka ra na qoqolou o ira kecega na lewe ni vanua.

³E na vuku ni vadugu ni yavadra na nona ose kaukauwa, kei na rorogo ni nona qiqi-ni-valu, kei na vadugu ni yava ni nona qiqi-ni-valu, era na sega ni rai kimuri na qase vei ira na luvedra ni sa wadamele na ligadra,

⁴E na vuku ni siga sa yaco mai me vakacacani ira kece kina na kai Filisitia, ka muduka tani mai Taira kei Saitoni nai vukevuke kecega sa vo: ni na vakacacana na kai Filisitia o Jiova, o ira ka vo tiko e na vanua o Kaafitori.

⁵Sa tasi ulu o Kesa; sa muduki laivi o Asikiloni kei ira sa vo e na nodra buca: me bogi vica mada mo tavalaki iko tiko?

⁶"O iko nai seleiwau i Jiova, me bogi vica mada mo qai vakacegu? Mo daramaki mada ki nomu taga, mo cegu, ka tiko vakadua!

⁷Me vakacegu vakaevei, ni sa vakarota vua o Jiova me ia kivei Asikiloni, kei na baravi? Sa lesia o Koya me ia ki ki kea."