[43] Joni 11

¹E dua na tamata mai Pecani, o Lasarusa a sa tauvimate. O Pecani na koro nei Meri kei Maca.

²O Meri oqo, sa lumuti Jisu ena waiwai boi vinaka ka qusia na yavai Jisu ena drau ni uluna, ka gane i Lasarusa o koya sa tauvimate.

³E rau sa lako cake na veitacini yalewa oqo vei Jisu ka tukuna, "Turaga, mo ni rogoca, o koya o ni sa daulomana, sa tauvimate."

⁴Ni sa rogoca oqori o Jisu, sa tukuna sara, "Na tauvimate oqori e na sega ni vakamatei koya, ena vakalagilagi ga kina na Kalou ka na laveti cake kina na Luve ni Kalou.

⁵O Jisu sa dau lomani iratou na veiganeni, o Maca kei Meri kei Lasarusa.

⁶Ni sa rogoca o Jisu ni sa tauvimate o Lasarusa, sa tiko tale me rua na siga e kea.

⁷Sa oti oqo, sa tukuna vei ira na tisaipeli, "Me da lako tale ki Jutia."

⁸Era sa tukuna vua o ira na tisaipeli, "Rapai, sa qai oti ga oqo vakalailai ena nodra via vakaviriki iko ena vatu na Jiu, o sa baci via lako tale ki kea?"

⁹Sa sauma o Jisu, "Sa sega beka ni tinikarua na auwa ena dua na siga? Kevaka e dua sa lako ena siga, ena sega ni tacaqe, baleta ni sa raica na rarama ni vuravura oqo.

¹⁰"Kevaka e dua sa lako ena bogi, sa tacaqe, baleta na rarama sa sega ni tiko vua."

¹¹Sa tukuna vei ira na veika oqo, ni oti sa qai tukuna tale vei ira, "Sa moce ga na wekada o Lasarusa, au sa lako mada Me'u vakayadrati koya."

¹²Era sa tukuna na Nona tisaipeli, Turaga ena vinaka o koya kevaka sa moce ga."

¹³Ia, sa tukuna sara o Jisu ni sa mate, era nanuma ga ni sa vosa tiko o Koya ena vuku ni sa vakacegu tikoga ka moce tiko.

¹⁴Sa qai tukuna vakadodonu sara vei ira, "Sa mate o Lasarusa."

¹⁵"Au sa marau ena vukumuni, Ni'u a sega ni tiko mai kea, mo ni vakabauti Koya kina."

¹⁶O Tomasi, o Titimo talega sa tukuna vei ira na vo ni Tisaipeli, "Me da sa lako yani, me da mate talega vata kei koya."

¹⁷Sa lako mai o Jisu, ka kila, ni sa bogi va oti mai nai bulubulu.

¹⁸O Pecani sa voleka e Jerusalemi, ka sa rua ga na maile na kena voleka.

¹⁹Sa levu vei ira na Jiu sa soqoni yani vei Maca kei Meri me vakacegui rau, ena vuku ni ganedrau.

²⁰O Maca, ni sa rogoca na lako mai nei Jisu, sa lako yani me sotavi Koya, o Meri sa dabe tiko ga mai vale.

²¹Sa vosa o Maca vei Jisu, Turaga kevaka o ni a tiko eke, kea sega ni mate na ganequ.

²²Oqo mada ga au sa kila, na ka o ni na kerea vua na Kalou, na Kalou ena solia.

²³Sa tukuna vei Maca o Jisu, "Na ganemu ena tucake tale."

²⁴Sa sauma o Maca, "Au sa kila ni na tucake tale ena siga mai muri."

²⁵Sa tukuna o Jisu, "Oi Au na tucake tale kei na bula, o koya sa vakabauti au, e dina ni na mate ia ena bula ga.

²⁶"Kei koya sa vakabauti Au ni se bula tiko, ena sega sara ni mate. O sa vakabauta oqo?"

²⁷Sa tukuna vei Jisu, "Io Turaga, au sa vakabauta ni sai kemuni na Karisito, na Luve ni Kalou, o koya e dodonu me lako mai ki vuravura."

²⁸Ni sa cavuta oti na veika oqori, sa lako yani ka kacivi Meri Lo mai ka tukuna vua, "Sa lako mai nai Vakavuvuli ka sa kacivi iko tiko."

²⁹Ni sa rogoca oti o koya na ka oqo, sa tucake sara ka lako mai vei Jisu.

³⁰E se bera tiko ni yaco mai nakoro o Jisu, ni se tiko ga ena vanua rau a sota kina kei Maca.

³¹O ira na Jiu sa tiko vata kei Meri e vale ka vakacegui koya tiko, ni ra sa raica ni sa tucake o Meri ka lako yani ki tuba “ era sa muri koya yani ena vakanananu ni sa lako ki na i bulubulu me tagi kina.

³²Ni sa lako mai o Meri vei Jisu, sa raici Koya ka cuva ki Yavana ka tukuna, "Turaga kevaka o ni a tiko eke, ke a sega ni mate na ganequ."

³³Ni sa raica o Jisu ni sa tagi tiko o Meri kei ira na Jiu era sa tiko vata tukuna, sa vutugu sara ena yalona ka rarawa vakalevu.

³⁴Sa tukuna sara mai, "O ni sa buluti koya e vei?" Era sa tukuna sara vua, "Turaga ni lako mai mo ni mai raica."

³⁵Sa tagi o Jisu.

³⁶Era sa tukuna na Jiu, "mo ni raica mada na levu ni Nona sa rui lomani Lasarusa."

³⁷Era sa tukuna sara mai eso, "Na Tamata mada ga oqo e vakavuna na nona rai na mataboko, ena rawa tale beka ga me vakavuna me kua ni mate na tamata oqo?"

³⁸O Jisu sa vutugu tikoga e Lomana, sa lako mai ki na i bulubulu. Sa dua na qara vatu ka sa vakaisogo ena dua tale na vatu.

³⁹Sa tukuna mai o Jisu, "Me kau tani na vatu." O Maca na ganei Lasarusa sa vosa mai vei Jisu ka vaka: "Turaga, oqo e dodonu me sa bona tu na yago, ni sa oti e va na siga na nona mate."

⁴⁰Sa tukuna vua o Jisu, "E sega beka Ni'u a tukuna vei iko, kevaka o sa vakabauta o na raica na lagilagi ni Kalou?"

⁴¹Era sa qai vakaqiqica tani na vatu mai na vanua sa tiko kina na mate. Sa rai cake o Jisu ka tukuna, "Tamaqu, Au sa vakavinavinaka ni o ni sa rogoci Au.

⁴²Au sa kila ni Kemuni sa dau rogoca tikoga, ia, me baleti ira na tamata sa tu oqo, Au sa vosa kina vakaoqo, me ra kila dina ga ni o ni sa talai Au mai."

⁴³Ni sa tukuna tiko na veika oqo, sa kaci yani vakarogolevu,"Lasarusa lako mai!"

⁴⁴O koya sa mate oti “ sa lako mai ni se vesuki tu ga na ligana kei na yavana ena i sulu ni veibulu, na uluna e se ubi tu ga ena i sulu, sa vosa yani o Jisu, mo ni sereki koya ka laiva me lako.

⁴⁵E levu vei ira na Jiu sa lako mai vei Meri, era sa raica na veika oqo “ era sa vakabauti Jisu.

⁴⁶E so vei ira, era sa lako vei ira na Farisi ka tukuna vei ira na veika sa cakava o Jisu.

⁴⁷O ira na Bete levu kei ira na Farisi, era sa soqona e dua na matabose ka tukuna, "Na cava me keimami cakava? Ni sa cakava na Tamata oqo na ka lelevu.

⁴⁸"Kevaka eda na biuti Koya tiko vaka oqo, na tamata era na vakabauti Koya, ka ra na lako mai na kai Roma era na qai mai taura na noda i tikotiko kei na noda vanua.

⁴⁹E dua vei ira na bete Levu na yacana o Kaiava na bete levu ni yabaki o ya, sa tukuna vei ira “ o ni sa sega ni kila e dua na ka,

⁵⁰"Se o ni sa kila beka, ni sa dodonu me mate e dua ena vukudra na tamata, me ra kakua ni rusa kina na veivanua kecega."

⁵¹Sa sega ni kacivaka oqo ena nona kaukauwa ga; ni sa bete levu ni yabaki koya, sa parofisaitaka ni na mate o Jisu ena vuku ni veimatanitu.

⁵²E sega ena vuku ni vanua walega, ena vakasoqoni ira me vaka e dua ga na luveni Kalou era sa veiseyaki yani ki vuravura.

⁵³Mai na siga o ya ka lako yani era sa bosebose vata me vakamatei Koya.

⁵⁴Sa muduka o Jisu na Nona bula veicurumaki kei ira na Jiu ka sa lako sara yani ki na dua na vanua voleka ki na vanua liwa, ki na koro o Ifereimi. Sa tiko mai kea kei ira na Nona tisaipeli.

⁵⁵Na nodra "Lakosivia" Na Jiu sa toro voleka tiko mai, ka ra sa lewe levu sa lako cake ki Jerusalemi me tiko kina ni bera na Lakosivia, me ra vakasavasavataki ira.

⁵⁶Era sa vakasaqarai Jisu, era sa veivosaki vakaira ni ra sa tiko ena valenisoro, "Na cava o ni sa nanuma “ ena sega ni lako mai ena kana magiti?"

⁵⁷O ira na bete levu kei ira na Farisi era sa solia e dua na i vakaro, o ya, kevaka e dua sa kila na vanua sa tiko kina o Koya “ me qai tukuna mai “ me rawa ni ra vesuki Koya.