[43] Joni 13

¹Ni se bera na Kana ni Lakosivia, ni sa kila o Jisu ni sa lako mai na Nona gauna me lako tani yani mai na vuravura oqo ka lako ki vei Tamana, sa lomani ira na wekana ena vuravura oqo, sa lomani ira tiko o Koya me yacova na i otioti.

²Sa oti na vakayakavi, na tevoro sa biuta oti e lomai Jutasa Isikarioti na luvei Saimoni me veretaki Jisu.

³Sa kila o Jisu ni sa solia na ka kecega ki ligana o Tamana, ni sa lako talega mai vua na Kalou o Koya, ka sa lako tale tiko yani vua na Kalou,

⁴sa tucake mai na vakayakavi, sa biuta vakatikitiki na nona kote “ taura na i oro ka vauci Koya.

⁵Ni sa oti oqo, sa sova na wai ki na dua na dave ka tekivu me savata na yavadratou na tisaipeli ka vakamamacataka ena i oro sa vauci oti tiko e tolona.

⁶Sa qai lako mai vei Saimoni Pita, ka sa tarogi Koya o Pita, "Turaga Koni sa savata talega na yavaqu?"

⁷Sa sauma o Jisu ka vaka: "Na ka Au sa cakava tiko oqo, dou sa sega ni kila oqo, o ni na qai kila ni sa oti vakalailai e dua tale na gauna."

⁸Sa tukuna vua o Pita, "Sa sega ni dodonu Mo ni cakava oqo vei au," sa sauma o Jisu, "Kevaka Au sa sega ni cakava oqo vei iko, sa sega na nomu tikina vei Au."

⁹Sa tukuna vua o Pita, "Turaga me kua ni yavaqu walega, na ligaqu kei na uluqu talega."

¹⁰Sa tukuna vua o Jisu, "O koya sa sili, e dodonu me savata ga na yavana, sa savasava taucoko oqori, o sa savasava taucoko o iko, ia, sa sega ga ni kemuni taucoko."

¹¹Ni sa kila o Koya se o cei ena veretaki Koya; sa tukuna "dou sa sega ni savasava kece."

¹²Ni sa savata oti na yavadratou ka taura tale na Nona kote ka dabe sobu, sa qai tukuna vei iratou; "Dou sa kila na veika Au sa cakava oqo vei kemudou?

¹³"Dou sa kacivi Au Me'u nomudou Qasenivuli ka nomudou Turaga, Sai Au dina, me vaka dou sa tukuna.

¹⁴"Kevaka Au sa nomudou Turaga ka nomudou Qasenivuli ka sa savata talega na yavamudou, e dodonu talega mo dou dau veivuiyava vakataki kemudou.

¹⁵"Au sa vakaraitaka e dua nai vakarau, mo dou dau cakava me vaka Au sa cakava vei kemudou.

¹⁶"Sa dina sara Au sa tukuna vei kemudou, na dauveiqaravi sa sega ni levu mai vua na nona turaga; se o koya sa talai me levu mai vei koya sa veitalai.

¹⁷"Kevaka dou sa kila na veika oqo, dou na marau vakalevu kevaka dou sa dau cakava oqo.

¹⁸"Au sa sega ni vosa ena vukumudou kece, Au sa kila o cei Au sa digitaka; ia, me vakayacori ga na i Vola Tabu, "O koya sa kana madrai vata kei Au sa leqeti Au.

¹⁹"Au sa tukuna oqo ni se bera ni yaco, ni sa na qai yaco oqo, dou na qai vakabauta ni sai Au ga

²⁰"Sa dina sara, Au sa tukuna vei kemudou, o koya sa ciqomi koya Au sa tala mai, sa ciqomi Au. O koya sa ciqomi Au, sa ciqomi Koya sa talai Au mai."

²¹Ni sa tukuna oti na veika oqo o Jisu, sa leqa vakalevu na yalona ka tukuna, "Sa dina sara, Au sa tukuna vei kemudou, e dua ga vei kemudou ena veretaki Au."

²²E ratou sa veiraici na tisaipeli ni ratou via kila se o cei sa vosa kina o Koya.

²³E dua sa kabi voleka sara ki vei Jisu, na tisaipeli ga sa daulomana vakalevu o Jisu.

²⁴Sa tarogi Jisu o Pita se o cei sa vosa tiko kina o Koya.

²⁵Sa kabiti Jisu matua sara, ka tarogi Koya, "Turaga o cei sara mada oqo?"

²⁶Sa sauma o Jisu, "O koya ga Au na solia vua na madrai Ni'u sa tonia oti." Ni sa tonia oti na Madrai, sa solia sara vei Jutasa Isikarioti na luvei Simioni.

²⁷Ni sa oti o ya, sa curumi koya o Setani. Sa vosa vua o Jisu, "Na ka o na cakava, cakava sara vakatotolo."

²⁸Sa sega ni dua ena teveli ni kana o ya sa kila na i balebale ni nona vosa vua.

²⁹E so era nanuma, baleta ni tiko vei Jutasa na kato ni i lavo, sa tukuna kina vua o Jisu, "Volia mai na vei ka e gadrevi ena solevu" se na veika e dodonu me soli vei ira na dravudravua.

³⁰Ni sa taura oti na madrai, sa lako yani vakatotolo ki tuba. Sa bogi sara mai.

³¹Ni sa lako ki tuba, sa tukuna o Jisu, "Sa qai vakarokorokotaki na Luve ni Tamata, ia na Kalou sa vakarokorokotaki vata kei Koya.

³²Kevaka sa vakalavelaveti na Kalou mai Vua, na Kalou talega ena laveti Koya cake vakai Koya vakatotolo sara.

³³"Kemudou na gone, Au na tiko vata kei kemudou vakalailai ga. Dou na vakasaqarai Au, me vaka Au sa tukuna vei ira na Jiu, "Na vanua Au sa na lako kina, dou na sega ni lako rawa yani kina," Au sa tukuna vei kemudou oqo."

³⁴Nai Vakaro Vou Au sa solia vei kemudou, "Mo dou veilomani vakai kemudou; me vaka Au sa lomani kemudou, dou veilomani vakakina.

³⁵Ena ka oqori, era na kila kecega ni dou sa Noqu tisaipeli, kevaka sa tu vei kemudou na veilomani vaka i kemudou. O Jisu Sa Yalataka Na Veicakitaki Nei Pita

³⁶Sa taro o Pita, "Turaga o ni sa lako ki vei? "Sa sauma o Jisu, " Na vanua Au na lako kina sa sega ni rawa mo lako yani kina ni oti oqo."

³⁷Sa vosa mai o Pita, "Turaga na cava au sega ni rawa ni muri kemuni kina oqo? Au na solia na noqu bula ena Vukumuni."

³⁸Sa sauma vua o Jisu, "O na solia dina na nomu bula ena vukuqu? Sa dina sara, Au sa tukuna vei iko, ena sega mada ni tagi na toa, o na cakitaki Au vakatolu.