[43] Joni 18

¹Ni sa vosataka na veivosa oqo o Jisu, sa lako yani vata kei ira na Nona tisaipeli ki na wai mai Kitironi, sa tiko kina e dua na were ka ra sa lakova yani vata kei ira na tisaipeli:-

²O Jutasa, (o koya e veretaki Jisu) sa kila talega na vanua o ya; ni o Jisu sa dausota vakalevu kei ira na Nona tisaipeli e kea.

³Ni sa tiko vata o Jutasa kei na so nai lawalawa sotia; kei na so mai vei ira na bete levu kei na Farisi, era sa lako vata mai na cina kei na yaragi.

⁴Sa kila oti o Jisu na veika kece ena lako mai Vua “ sa lako yani ka tarogi ira, "O ni sa vakasaqarai cei?"

⁵Era sa sauma vua, "O Jisu mai Nasareci," Sa tukuna yani o Jisu, "Sai Au oqo." o Jutasa talega sa tiko kei ira.

⁶Ni sa tukuna vei ira, "Sai Au oqo" “ era sa suka ki muri ka vakabalei ki ra.

⁷Sa tarogi ira tale, "O cei o ni sa vakasaqara? Era sa tukuna mai,"O Jisu na kai Nasareci."

⁸Sa sauma mai o Jisu, "Au sa tukuna oti, sai Au oqo," kevaka o ni sa vakasaqarai Au, me ra lako o ira oqo."

⁹"me vakayacori kina na veika sa dau tukuni, o ira o ni sa solia mai, Au sa sega ni vakayalia e dua vei ira."

¹⁰O Saimoni Pita sa ucuna cake na nona i Seleiwau ka cebeta na daligana i matau na nona dauveiqaravi na bete levu. Na yaca ni tamata oqori o Maliko.

¹¹Sa tukuna o Jisu vei Pita, "Biuta lesu tale na nomui sele ki na kena taga. Me'u kua beka Ni'u gunu talega mai na bilo sa solia mai vei Au o Tamaqu?"

¹²O ira na sotia kei na nodra i liuliu na Jiu era sa vesuki Jisu ka vauci Koya.

¹³Era sa kauti Koya yani ki vei Anasa, ni sai koya na Momo nei Kaiava na bete levu ni yabaki o ya.

¹⁴O Kaiava sa solia nai vakasala vei ira na Jiu ni sa ka levu oqo, me dua na tamata me mate ena vukudra na tamata.

¹⁵Sa muri Jisu o Saimoni Pita kei na dua tale na tisaipeli. Na tisaipeli oqo sa kilai mai vei ira na bete Levu, sa lako yani vata kei Jisu ki na lomanibai ni bete levu.

¹⁶Sa tucake tu mai o Pita mai na katuba e tuba. O koya na tisaipeli sa kilai tiko mai vei ira na bete levu, sa lako yani vei koya sa raica tiko na katuba, ka sa kauti Pita ki loma.

¹⁷Na goneyalewa sa dauvakatawana na katuba sa tukuna mai vei Pita, "Sa sega beka ni o Nona tisaipeli talega na Tamata oqo?" sa sauma o Pita, "E sega."

¹⁸O ira na dauveiqaravi kei ira na tamata cakacaka era sa tatalai tiko ena bukawaqa ni sa rui batabata me ra vakatakata kina. Sa tiko talega vata kei ira o Pita me tatalai tiko.

¹⁹Na bete levu sa tarogi Jisu me baleti ira na Nona tisaipeli kei na Nona i vakavuvuli.

²⁰Sa sauma vua o Jisu, "Au sa vosa vakadoudou ki vei vuravura, Au dau vakatavuvuli ena vale ni vakasoqoni vata kei na valenisoro na vanua era sa dau sota kina na Jiu. Au sega ni dau tukuna vuni na ka.

²¹"Na cava o ni sa tarogi Au kina? Me ra tarogi ga o ira sa rogoca na veika Au sa tukuna. Era sa kila na ka Au sa dau tukuna."

²²Ni sa tukuna tiko na veika oqo, sa dua vei ira na tamata cakacaka sa robaki Jisu ena ligana ka tukuna, "E dodonu li mo vosa vaka oqori vua na bete Levu?"

²³Sa sauma o Jisu, "Kevaka Au sa tukuna na ka ca, me dua na kena i vakadinadina; kevaka Au sa cakava na ka vinaka, na cava dou sa via mokuti Au kina?"

²⁴Ia o Anasa sa vakatalai Koya yani vei Kaiava na bete levu.

²⁵Sa tucake o Pita ni sa tatalai tiko. Era sa tukuna vua, "Sa sega beka ni o a dua talega vei ira na Nona tisaipeli?" Sa cakitaka o Pita ni sa tukuna ni sega.

²⁶Sa dua vei ira na dauveiqaravi vua na bete levu, sa wekana voleka talega na tamata sa musuki laivi na daligana mai vei Pita, sa tukuna mai, "Sa sega beka ni'u raici iko mai na were vata kei Koya?"

²⁷Sa qai caki tale o Pita; ka vakasauri sa tagi sara na toa.

²⁸Era sa qai kauti Jisu mai vei Kaiava kina buturara levu e vakatokai na Paraetoriumi, ni se mataka lailai tikoga. Ia era sega ni mani yaco rawa sara o ira kina Paraetoriumi de ra qai rogorogo ca, me rawa kina vei ira mera vakaitavi talega ena Lako Sivia.

²⁹Sa lako yani ki vei ira o Pailato ka tukuna, "Na veibeitaki cava o ni sa kauta mai kina na Tamata oqo?"

³⁰Era sa sauma mai ka tukuna vei Pailato, "Kevaka sa sega ni Tamata caka ca oqo, keimami na sega ni kauti Koya cake mai vei iko."

³¹Sa vosa mai o Pailato, "Mo ni kauti Koya ga ka lewai Koya me vaka na i Vunau" Era sa tukuna mai na Jiu vua, "Na i vunau sa sega ni vakatarai keimami me keimami vakamatea e dua,"

³²me vakayacori ga kina na veika sa tukuna oti o Jisu, me vakaraitaka kina na mate ena mate kina o Koya.

³³Sa lako tale yani o Pailato ka kacivi Jisu, ka tarogi koya, "O sa nodra Tui beka na Jiu?"

³⁴Sa sauma yani vua o Jisu, "O sa vosa tiko beka ga ena vukumu ena ka oqo, se ra sa tukuna eso tale vei iko na ka oqo me baleti Au?"

³⁵Sa vosa mai o Pailato ka vaka: "Oi au beka na Jiu? O ira na kai Nomu, kei ira na bete levu era sa kauti Iko mai vei au. Na cava o sa cakava?"

³⁶Sa sauma mai o Jisu, "Na noqu matanitu sa sega ni ka ni vuravura oqo. Kevaka sa ka ni vuravura oqo, era na vala na Noqu tamata, Me'u kua ni soli yani kina vei ira na Jiu; sa sega ni ka ni vanua oqo na Noqu matanitu."

³⁷Sa tukuna kina o Pailato vei Jisu, "O sa Tui dina li?" Sa sauma o Jisu. "O sa tukuna dina mai Ni'u sa Tui. Oqo ga Au sa sucu mai kina, oqo ga Au sa lako mai kina ki vuravura, Me'u mai I vakadinadina ni Dina. O ira vakayadua sa tiko vua na dina, sa rogoca na Domoqu."

³⁸Sa taro tale yani o Pailato, "Na cava na dina?" Ni sa tukuna tiko oqo “ sa lako yani ki vei ira na Jiu, ka tukuna vei ira, "Au sa sega ni raica Vua e dua na cala."

³⁹"Sa dua na nomuni i tovo “ o ya me dau sereki e dua ena gauna ni Lakosivia." "O ni sa vinakata beka me'u sereka vei kemuni na Nodra Tui na Jiu?"

⁴⁰Era sa kaci kece yani vakadomoilevu ka tukuna, "Sega ni o Koya na Tamata oqo, o Parapa ga! Sa daubutako o Parapa.