[43] Joni 4

¹Ni sa kila o Jisu na nodra sa rogoca na Farisi ni sa levu sa papitaisotaka o Jisu mai vei Joni.

²(E dina mada ga ni sega ni veipapitaisotaki o Jisu, o iratou ga na Nona tisaipeli)

³Sa biuti Jutia ka lako ki Kaleli.

⁴Ia, sa lako curumi Samaria yani.

⁵Sa yaco yani ki na dua na koro mai Samaria o Saika, voleka ki na dua na vanua sa solia o Jekope vei Joseva na luvena.

⁶Sa tiko e kea na toevu ni wai nei Jekope. Sa oca sara o Jisu ena Nona lako voli mai, ka sa mai cegu sara ena toevu oqo, ni sa i ka ono tiko ni auwa.

⁷Sa lako mai e dua na yalewa ni Samaria me mai taki wai, sa vosa vua o Jisu, "Solia mada vei Au e dua na wai, Me'u gunu."

⁸E ratou se lako ki na koro oiratou na Nona tisaipeli me voli kakana.

⁹Sa sauma mai na yalewa ni Samaria vei Koya, "E rawa vakacava vei iko na Jiu mo kere wai mai vei au na Samaria?," ni rau sa sega ni veiwekani vinaka na Jiu kei na Samaria.

¹⁰Sa vosa yani o Jisu ka vaka: "Kevaka walega o sa kila na i solisoli ni Kalou, kei Koya sa vosa tiko yani oqo vei iko, 'Solia mai me'u gunu,' o na kerekere Vua, ka na solia vei iko o Koya na wai sa tiko kina na bula."

¹¹Sa vosa vei Jisu na yalewa, "Kemuni, sa sega na ka Mo ni taki kina, ni sa rui titobu na toevu. o ni sa kauta mai vei na wai sa tiko kina na bula?

¹²"O ni sa levu cake beka vei koya na tamai keimami o Jekope, o koya sa solia vei keimami na toevu oqo, ka sa gunu talega mai kina "O Koya kei iratou na luvena kei na nona manumanu kecega?"

¹³Sa sauma vua o Jisu ka vaka: "Yalewa o koya sa gunu mai na wai oqo, ena via gunu tale,

¹⁴"ia, o koya vakayadua sa gunuva na wai Au na solia vua, ena sega ni karamaca tale. Na wai Au na solia vua, ena vuki me mataniwai vure ka tovure cake tiko ga ki na bula sega ni mudu."

¹⁵Sa vosa vei Jisu na yalewa, "Kemuni, ni solia mai na wai oqori, me'u kua ni karamaca tale, se me'u lako tale mai e ke me'u taki.

¹⁶Sa tukuna vua o Jisu, "Lako kaciva mai na watimu ka drau lako mai."

¹⁷Sa sauma mai na yalewa, "Sa sega na watiqu." Sa tukuna yani o Jisu, 'o sa vosa dina mai ni sa sega na watimu,

¹⁸sa lima oti e liu na watimu, kei koya drau sa tiko vata oqo sa sega ni watimu; o sa vosa dina sara mai."

¹⁹Sa vosa vei Jisu na yalewa, au sa qai kila, ni Kemuni sa dua na parofita.

²⁰Era sa lotu ena ulunivanua oqo o ira na neimami qase, oi kemuni na Jiu, o ni sa tukuna ni kemuni sa daulotu mai Jerusalemi.

²¹Sa tukuna vua o Jisu, "Yalewa, vakabauti Au, sa lako tiko mai na gauna ni kemuni na sega ni lotu ena ulunivanua oqo se mai Jerusalemi vei koya na Tamada.

²²"O ni sa lotu vua o ni sa sega ni kila; keimami sa kila se o cei keimami sa lotu vua, na vakabulai sa neimami na Jiu.

²³"Na gauna sa lako tiko mai, sai koya sara ga oqo, ni o ira na lotu dina, era na lotu vei Tamada vakayalo ena dina talega; o Tamada sa vakasaqarai ira tiko sa vaka oqori.

²⁴"E Yalo na Kalou, o ira na lotu Vua e dodonu me ra lotu vakayalo, ena dina talega."

²⁵Sa vosa vei Jisu na yalewa, "Au sa kila ni sa lako mai na Mesaia" (na Karisito). "Ni sa lako mai o Koya, ena tukuna vei keda na ka kecega."

²⁶Sa tukuna vua na yalewa o Jisu, "Sai Au sara ga sa vosa tiko oqo vei iko, o Koya o sa nanuma tiko.

²⁷E ratou sa basika mai na Nona tisaipeli, ka ratou sa qoroya ni rau veivosaki tiko o Jisu kei na dua na yalewa; sa sega ga ni dua e vosa rawa, me taroga, "Na cava o ni sa vakasaqara, se, ena cava o ni sa veivosaki tiko kina kei na yalewa oqori?"

²⁸Sa biuta tu na nona i takitaki na yalewa, ka sa lako yani ki na koro ka tukuna vei ira na tamata,

²⁹"Ni lako mai ka mai raica na Tamata sa tukuna vei au na veika kecega au sa cakava. O Koya beka li oqo na Karisito?"

³⁰Era sa lako tani mai na koro ka lako mai Vua.

³¹Era sa vakauqeti koya na Nona tisaipeli ka tukuna, "Rapai ni mai kana."

³²Sa tukuna vei ira o Jisu, "Sa tu na kakana Me'u kania, ia, dou sa sega ni kila."

³³Era sa veivosaki na tisaipeli ka vaka: "E dua beka sa kauta mai na kakana me kana kina o Koya?"

³⁴Sa tukuna vei iratou o Jisu, "Na Kequ kakana Me'u cakava na loma i Koya sa talai Au mai, ka Me'u vakaotia na Nona cakacaka.

³⁵"Dou sa sega beka ni tukuna, ni se vo tiko e va na vula me qai ia na tatamusuki? Raica, Au sa tukuna vei kemudou, dou veiraiyaki mada ka raica na were, era sa matua tu me ra tamusuki!

³⁶'O koya sa tatamusuki sa rawata na kena i sau, ka kumuna vata na vuata ki na bula sega ni mudu. Me rawa kina vei koya sa tea kei koya sa musuka me rau reki vata.

³⁷"Sa dina kina na veika sa dau tukuni tiko 'sa dua sa kakaburaki ka sa dua tale sa tamusuka.'

³⁸"Au sa talai kemudou mo dou la'ki tamusuka na ka dou sa sega ni oca kina; e so era sa cakacaka, ia, dou sa curu kina ena nodratou cakacaka"

³⁹Sa levu sara vei ira na kai Samaria ena koro Levu o ya, era sa vakabauti Jisu ena vuku ni veika sa tukuna na yalewa. "Ni sa tukuna o Koya na veika kece au sa cakava."

⁴⁰Ni ra sa lako mai vei Jisu na kai Samaria, era sa kerei Koya me ra tiko vata mada; sa tiko vata kei ira o Jisu me rua na siga.

⁴¹Sa levu tale era sa vakabauta ena vuku ni Nona vosa.

⁴²Era sa qai tukuna vua na yalewa, "Keimami sa vakabauta oqo e sega tale ena vuku ni nomu vosa, ni keimami sa rogoca dina oqo ka kila ni sai koya dina oqo na Karisito nai vakabula kei vuravura.

⁴³Ni sa oti e rua na siga ena Nona tiko mai kea, sa lako sara ki Kaleli.

⁴⁴Sa vakatusa vakai Koya o Jisu ni sa sega ni dokai na parofita ena nona vanua.

⁴⁵Ni sa lako mai o Koya ki Kaleli, era sa ciqomi Koya, ni ra sa raica na veika kece sa cakava o Koya mai Jerusalemi ena Solevu; ni ra a tiko mai kea.

⁴⁶Sa lako tale mai o Jisu e Kena, mai Kaleli, na vanua sa vukica kina na wai me waini. Sa dua na turaga sa tauvi mate vakalevu na luvena mai Kapenaumi.

⁴⁷Ni sa rogoca o Koya, ni sa lako mai o Jisu mai Jutia ki Kaleli, sa lako Vua ka kerei Koya me lako mada mai me vakabulai na luvena, ni sa voleka sara tu ga ni mate.

⁴⁸Sa tukuna vua o Jisu, "Kevaka o ni sa raica sara na i vakatakilakila kei na veivakurabuitaki, o ni na sega ga ni vakabauta?"

⁴⁹Sa tukuna vei Jisu na turaga ni vanua oqo, "Io saka, Mo ni lako mai de qai mate na luvequ!"

⁵⁰Sa tukuna vua o Jisu, "Mo lako ga, sa bula na luvemu." Sa vakabauta na vosa sa tukuna o Jisu na turaga oqo, ka lako yani.

⁵¹Ni sa lako tiko yani o koya, sa sotavi koya na nona dauveiqaravi ka tukuna, "Sa bula na luvemu!"

⁵²Sa qai vakataroga na gauna sa bula kina o koya, era sa tukuna vua, "Ena siga e nanoa ni rauta tiko nai ka vitu ni auwa, sa biuti koya na katakata."

⁵³Sa kila o tamana na gauna vata ga o ya sa vosa kina o Jisu ka tukuna vua "Sa bula na luvemu." Sa vakabauta o Koya kei na nona vuvale.

⁵⁴Oqo tale na i karua ni veika sa cakava o Jisu ni sa lako tani mai o Koya e Jutia ki Kaleli.