[7] Turaganilewa 12

¹O ira na Ifereimi era sa soqoni vata ka takoso yani me donui Safoni ka tukuna vei Jefica, "Ena cava o sa takoso mai kina ka valuti ira na Amoni ka sega mada ga ni kacivi keimami me lako vata kei iko? Keimami na vakama sobu na nomu vale vei iko ena yameyame!"

²Sa tukuna vei ira o Jefica, "O ira na noqu tamata kei au, keimami sa sasaga dina vakadredre me valuti ira na Amoni, keimami sa kacivi kemuni, o ni sa sega ni sereki keimami mai na ligadra.

³"Ni'u sa raica ni kemuni sa sega ni rawa ni kauta mai na veisereki vei au, au sa vakararavi ga ki na ligaqu ka takoso ki vei ira na Amoni, o Jiova ga sa soli ira kina ligaqu. Ena cava o ni lako cake mai kina oqo ka via valuti au ena siga oqo?"

⁴Sa soqoni ira vata na tamata e Kiliati o Jefica me vala kei Ifereimi. Era sa vakadrukai ira na Ifereimi na Kiliati baleta ni ra sa tukuna tiko, "Oi kemudou na kai Kiliati, sai vakaraitaki ga kei Ifereimi ena kedra maliwa na Ifereimi, ena kedra maliwa talega na Manasa."

⁵O ira na kai Kiliati era sa taura nai tatakoso ena Joritani ni bera ni ra yaco mai na Ifereimi, Kevaka sa dro bula e dua na Ifereimi ka mai tukuna, "Me'u takoso mada," me na qai tukuna vua e dua na Kiliati; "O sa lako beka mai vei ira na Ifereimi,?" kevaka sa tukuna mai, "E sega."

⁶Me ra qai tukuna vua, "Mo tukuna mada 'Shibo Leca'!" ka me sauma mai vaka oqo "Sibo Leca", ni sa vakaoqo na kenai cavucavuti vei ira na Ifereimi. Kevaka sa vaka o ya me na qai kau o koya ki nai tatakoso ka vakamatei koya kina. Era sa bale mate mai kea e vasagavulu ka rua na udolu na Ifereimi.

⁷Sa vakatulewa e Isireli o Jefica me ono na yabaki. Sa qai mate o Jefica na Kiliati ka sa buluti ena dua na koro levu e Kiliati.

⁸Sa taravi koya o Ipisani mai Peceliema sa vakatulewa e Isireli.

⁹Sa tolusagavulu na luvena tagane,ka sa soli ira yani na tolusagavulu na luvena yalewa me ra vakawatitaki, ka kauti ira mai e tolusagavulu na goneyalewa me vakawati kei ira na luvena tagane. Sa vakatulewa e Isireli me vitu na yabaki.

¹⁰Sa mate o Ipisani ka sa buluti mai Peceliema.

¹¹Sa taravi koya mai o Eloni mai vei ira na Sevuloni. Ka sa vakatulewa e Isireli me tini na yabaki.

¹²Sa mate o Eloni na luvei Sevuloni, ka sa buluti mai Aijaloni, ena vanua o Sevuloni.

¹³Sa taravi koya mai o Apitoni na luvei Ileli na Piraconi, sa vakatulewa e Isireli.

¹⁴Sa vasagavulu na luvena tagane ka tolusagavulu na makubuna tagane, ka, ra sa vodo tiko ena vitusagavulu na luve ni asa. Sa lewai Isireli tiko me walu na yabaki.

¹⁵O Apitoni na luvei Ileli na Piraconi sa mate ka bulu ena dua na koro levu mai Kiliati.