[25] Tagi 3

¹Sai au na tamata sa raica na veivakararawataki sa vakayacora na Kalou ena nona i titoko ni rarawa katakata.

²Sa liutaki au o koya ka sa cakava me'u lako ena butobuto ka sega ena rarama.

³Io, na ligana sa veicoqacoqa tale kei au ena veigauna kecega ena siga taucoko.

⁴Sa qase mai na yagoqu, na kuliqu talega, sa musuka na suiqu.

⁵Sa tagavi au me vesuki au, ka sa vakavoliti au ena veivakaisini kei na ca.

⁶Sa biuti au o Koya ena vanua butobuto me vaka e dua sa mate makawa tu.

⁷Sa sogoti au o Koya me'u kua ni dro bula: sa cakava o koya me vakabibitaki na kequ i vesu.

⁸Ni'u sa tagi mada ga ka kaila, sa sogota o Jiova na noqu masu.

⁹Sa sogota na noqu sala ena vatu; sa vakavevea na noqu i lakolako.

¹⁰Sa cakava me'u vaka e dua na manumanu kila sa davo tiko me waraka na kena, Sa vaka na laioni sa toka vakarau.

¹¹Sa vukica tani o Koya na noqu sala, ka sa basubasuki au vakalalai.

¹²Sa loveca na nona dakai, ka sa dodoka na nona gasau me vakadodonu mai vei au.

¹³Sa vakayacora me lako mai vakadodonu na nona gasau titi me basuka na ketequ.

¹⁴Au sa yaco me nodra i vakalasa na tamata” me'u nodra sere ni veivakalialiai ena siga taucoko.

¹⁵Sa vakasinaiti au ena yaloca, sa vakagunuvi au ena kau wiwi.

¹⁶Sa vakaramusutaka na batiqu ena vatu ka sa buluti au ena dravusa.

¹⁷Sa vakayawataka na yaloqu mai na vakacegu, au sa sega ni nanuma kina na vinaka ni siga ni mataka.

¹⁸Au sa tukuna kina, "na noqu kaukauwa kei na noqu vakanuinui sa vakayali mai vua na Kalou."

¹⁹Mo ni nanuma na noqu vakararawataki ena noqu veilakoyaki tiko kei na kau wiwi e tubu cala.

²⁰Na yaloqu e se nanuma tikoga ka sa luvu talega e lomaqu.

²¹Au sa qai nanuma tale oqo, ka au sa kila ni se tiko vei au na vakanuinui.

²²E na vuku ni loloma vakavuqa ni Kalou, eda sa sega kina ni vakaoti Ni sa sega ni mudu na nona loloma.

²³Era sa vou tiko ga ena veimataka; Sa rui levu ka cecere na Nomuni yalodina.

²⁴"Sa noqu i votavota o Jiova sa tukuna na yaloqu," O koya oqo au sa nuitaki koya kina!"

²⁵Sa vinaka na Kalou vei ira sa waraki koya, Ki na yalo ga sa vakasaqarai koya.

²⁶Sa vinaka vua na tamata me waraka tikoga vakamalua na veivakabulai i Jiova.

²⁷Sa vinaka vua na tamata me colata nai vua ni se cauravou tiko.

²⁸Me tiko duadua ka tiko vakamalua, ni sa vakatikora oti vua o Jiova;

²⁹Me biuta na gusuna kina kuvu ni soso”me dua beka kina nai nuinui.

³⁰Me solia na baluna ka dua vua sa sabici koya, ni sa sinai ena sega ni veiciqomi.

³¹O Jiova ena sega ni biuta vakadua sara,

³²E dina ni sa vakaraitaka na rarawa, ia ena vakaraitaka tale na loloma me vaka na kena sa rui levu na nona yalololoma.

³³Sa sega ni dau veivakamavoataki vakailoa o koya, se dauveivakayalobibitaki vei ira na luve ni tamata.

³⁴Me butu qaqi ira ena ruku ni yavana, o ira kece na kaivesu e vuravura,

³⁵Me vukica tani na lewa dodonu me nodra na tamata, ena matai koya sa cecere sara,

³⁶Me vakagolea tani na tamata mai na nona i lakolako”sa sega ni vakadonuya o Jiova.

³⁷O cei oqo sa vosa tiko ka sa yaco, ni se bera ni vakatara me yaco o Jiova?

³⁸Sa sega beka ni lako mai na gusu i Jiova na ca kei na vinaka talega?

³⁹Ena cava era sa dau vakaulubale kina na tamata bula, Na tamata sa totogi ga me baleta na nona i valavala ca?

⁴⁰Me da lako mada ka vakaraica tale na noda i lakolako, ka me da lesu tale vua na Kalou;

⁴¹Me da laveta cake na ligada kei na yaloda vua na Kalou sa tiko mai lomalagi.

⁴²Keimami sa talaidredre ka lako tani; o na sega ni vosota.

⁴³O ni sa ubi Kemuni ena cudru ka vakasaqarai keimami; O ni sa veivakamatei ka sega ni loloma.

⁴⁴O ni sa ubi Kemuni ena o, me kua kina ni lako vei kemuni na masu.

⁴⁵O ni sa cakava me keimami sa dukalevu kai benubenu e matadra na tamata.

⁴⁶Era sa dolava na gusudra vei keimami na meca.

⁴⁷Na rere, na veicoriti, na veivakacacani kei na veivakarusai sa lako mai vei Kemuni.

⁴⁸Sa drodro vakalevu na wai ni mataqu, me baleta na nodra sa vakarusai tiko na goneyalewa ni noqu tamata.

⁴⁹Sa drodro tu ga na wai ni mataqu, sa sega ni muduki rawa,

⁵⁰Me yacova sara ni sa rai sobu mai na Kalou me kila.

⁵¹Na wai ni mataqu sa vakaleqa vakalevu na yaloqu me baleti ira na goneyalewa ni noqu koro.

⁵²O ira na meca era sa vakasasataki au me vaka e dua na manumanu vuka ni sa sega na vuna.

⁵³Era sa vakagalui au tiko ena loma ni qara, ka vakaviriki au ena vatu.

⁵⁴Sa vakadrodroi mai uluqu na wai, au sa tukuna kina "ni'u sa oti vakadua!"

⁵⁵I Jiova, au sa kaciva yani na Yacamuni, mai na boto ni qara.

⁵⁶O ni sa rogoca na domoqu, "mo ni kua ni vakadidi vara ki na noqu tagi, na noqu tagica na veivuke."

⁵⁷O ni sa voleka sara ena noqu tagi yani, o ni a tukuna kina, "me'u kua ni rere!"

⁵⁸I Jiova, o ni sa cakacaka vakaukauwa ena vuku ni yaloqu; o ni sa kauta lesu tale mai vei au na bula.

⁵⁹I Jiova, o ni sa kila se'u a leqa vakacava; mo ni raica ka lewa ga.

⁶⁰O ni sa raica kece na nodra yaloca, Na nodra nakinaki me baleti au.

⁶¹I Jiova, o ni sa rogoca na nodra veivakacacani na ka kece era tuvana me baleti au,

⁶²Na tebenigusudra na meca, kei na nodra vakasolokakana ena vukuqu ena siga taucoko.

⁶³Mo ni raica ga na nodra dabe kei na nodra tucake; era sa seretaki au ena nodra sere ni veivakacudrui.

⁶⁴I Jiova, Mo ni sauma lesu vei ira me vaka na cakacaka ni ligadra.

⁶⁵Mo ni solia vei ira na yalo sa ubi tu. Na Nomuni veivakaloucataki me sa tu vei ira!

⁶⁶E na Nomuni cudru, me sa cici muri ira, ka vakarusai ira, ena ruku i lomalagi i Jiova.