[25] Tagi 5

¹I Jiova, mo ni nanuma na ka sa yacovi keimami; Mo ni raica, io, na neimami vakacacani!

²Na neimami votavota sa soli vei ira na vulagi kei na neimami veivale sa soli vei ira na kai tani.

³Keimami sa luveniyali kei ira na tinai keimami era sa yada.

⁴Keimami sa sauma na wai keimami gunuva kei na neimami kau talega sa volitaki.

⁵Keimami sa cemuri ka cakacaka tiko ka sega ni vakacegu.

⁶Keimami sa solia na ligai keimami vei ira na kai Ijipita kei ira talega na kai Asiria, me keimami vakamamautaki kina ena madrai.

⁷O ira na tamai keimami era sa i valavala ca, ka era sa yali tani, Keimami sa mai colata na kena ca.

⁸Era sa mai lewai keimami na dauveiqaravi, Sa sega e tu me vakabulai keimami mai na ligadra.

⁹Keimami rawata vakadredre na keimami madrai, Baleta nai seleiwau mai na vanua liwa.

¹⁰Sa katakata na yagoi keimami me vaka na lovo, E baleta na tauvimate ni via kana.

¹¹E ra sa rawai vakaukauwa na yalewa ni Saioni, O ira na vada talega ni veikoro e Juta.

¹²Era sa vakaliligi tu na turaga ena ligadra kei ira na qase era sa sega ni dokai.

¹³O ira na cauravou era sa tala vatu kei ira na gonetagane era sa taceba ena cola kau.

¹⁴O ira na qase, sa mai oti na nodra dau mai sotasota ena matamata ni koro, O ira talega na cauravou, sa mai oti na nodra dau mai qiriqiri.

¹⁵Na reki ni yaloi keimami sa mai oti; Na neimami dau meke sa vuki me so mate.

¹⁶Sa lutu tani mai ului Keimami nai sala ni veiliutaki, Na ca levu veikeimami ni keimami sai valavala ca!

¹⁷Oqo na vuna, keimami sa yalolailai kina, ka sa malumu sobu na rai ni matai keimami;

¹⁸Sa lala na ulunivanua o Saioni ka era lako tu kina vakaveitalia na fokisi.

¹⁹Io, sai Kemuni Jiova, sa tudei ka sega ni mudu; Na Nomuni tikotiko vakaturaga sa ka mai na dua nai taba tamata kina dua tale nai tabatamata.

²⁰Ena cava o ni sa guilecavi keimami kina, ka biuti keimami vakadede kina?

²¹Mo ni vakalesui keimami tale vei Kemuni, Jiova, keimami na qai vakatikori lesu tale; me vakavoui tale na neimami veisiga me vaka e liu,

²²Vakavo ga kevaka o ni sa besetaki keimami vakadua. Ka cudruvi keimami vaka ca sara!