[3] Vunau Ni Soro 1

¹Ia oqo sa kacivi Mosese o Jiova, ka vosa vua mai na vale ni veitavaki, ka tukuna,

²"Mo vosa vei ira na Isireli, ka tukuna vei ira: 'Kevaka e dua vei kemudou sa vakacabora nai madrali vei Jiova, dou kauta mai na nomudou qele ni manumanu “ na bulumakau se sipi se na me.

³'Kevaka sa nonai madrali na bulumakau mei soro kama, me vakacabora o koya na ka tagane sa sega na kena ca; me vakacabora ena yalo e galala mai na katuba ni vale ni veitavaki e na mata i Jiova.

⁴'Me qai tabaka o koya na ulu ni soro kama e na ligana, ka na ciqomi nai soro me vinakati kina o koya ka me nonai bulubulu.

⁵'Me na vakamatea o koya na bulumakau e na mata i Jiova; ia o ira na bete, na luve i Eroni, me ra kauta na dra ka kureitaka wavokita nai cabocabo ni soro sa tu mai na katuba ni vale ni veitavaki.

⁶'Ia me drudruga o koya nai soro kama ka tava vakalalai na lewena.

⁷'O ira na luve i Eroni na bete me ra vakawaqaca na buka waqa e na dela ni cabocabo ni soro, ka tuva vakavinaka na buka e dela ni buka waqa.

⁸'Ia o ira na bete, na luve i Eroni, me ra qai tuva vakavinaka na veitikina, na uluna, kei na kena uro, e na dela ni buka sa toka e na cabo-ni-soro;

⁹'Ia na kena gacagaca kei na yavana me vuya e na wai. Me qai vakama kecega na bete e na dela ni cabocabo ni soro mei soro kama, sa vakacabori e na buka waqa, me ka boi vinaka vei Jiova.

¹⁰'Kevaka e nonai madrali ”na sipi se na me ” mei soro kama, me na vakacabora o koya na ka tagane sa sega na kena ca.

¹¹'Me na vakamatea o koya e na yasa ni cabocabo ni soro vaka ki na vualiku e na mata i Jiova; ia o ira na bete, na luve i Eroni, me ra kureitaka na kena dra wavokita nai cabocabo ni soro.

¹²'Me tava talega vakalalai, io na uluna kei na kena uro; me qai tuva vakavinaka na bete e na dela ni kau sa toka e dela ni buka waqa mai na dela ni cabocabo ni soro;

¹³'Ia na gacagaca kei na yavana me vuya e na wai. Me qai kauta kecega na bete ka vakama e na dela ni cabocabo ni soro; oqo nai soro kama, sa vakacabori e na buka waqa, me ka boi vinaka vei Jiova.

¹⁴'Ia kevaka sa nonai madrali na manumanu vuka mei soro kama vei Jiova, me qai cabora o koya na soqe se na luve ni ruve me nonai madrali.

¹⁵'Me kauta na bete ki nai cabocabo ni soro, ka wirica na domona, ka vakama e na dela ni cabocabo ni soro; ia me sova yani na kena dra ki na yasa ni cabocabo ni soro.

¹⁶'Me qai tunaka ka vutia ka biuta ki na yasa ni cabocabo ni soro vaka ki na tokalau, e na tikina sa biu kina na dravusa.

¹⁷'Ka me tava na tabana, ia me kakua ni tawasea laivi; me qai vakama na bete e na dela ni cabocabo ni soro, e na dela ni kau sa toka e dela ni buka waqa. Oqo nai soro kama, sa vakacabori e na buka waqa, me ka boi vinaka vei Jiova.