[3] Vunau Ni Soro 24

¹Sa qai vosa vei Mosese o Jiova, ka tukuna:

²"Mo vakaroti ira na Isireli, me ra kauta mai vei iko na waiwai olive makare sa lautuki, me yaga ena cina, me caudre tikoga kina na cina.

³" Mai taudaku ni lati ni kato ni Vakadinadina, ena vale ni veitavaki, o Eroni sa na veiqaravi kina mai na yakavi me yacova na mataka, ena mata i Jiova e veisiga; oqo sa kenai lesilesi ka sega ni mudu ena nomudou veitabatamata.

⁴"Me vakarautaka tikoga o koya na veicina e nai tutu-ni-cina makamakalivata, e na mata i Jiova.

⁵"Ia mo kauta na madrai droka vinaka, ka vavia e tinikarua na keki: me rua na omeri ena dua na keki.

⁶"Mo qai tuva me yatu rua, me yaono na yatu yadua, ena dela ni teveli makamakalivata ena mata i Jiova.

⁷"Mo qai viritura na drega dina me vakamai ena dela ni yatu kadua, me tu ki na madrai me dauveivakananumi, io nai madrali sa cabori ena buka waqa vei Jiova.

⁸"Me vakatura vinaka tikoga o koya ena mata i Jiova ena veiSiga ni Vakacecegu kecega, ena vukudra na Isireli ena veiyalayalati sa sega ni mudu.

⁹"Ia ena kedratou o Eroni kei na luvena; me ra kania ena tikina tabu: Ni sa nona ka sa tabu sara mai na vei madrali sa cabo vei Jiova ena bukawaqa, oqo nai vakaro ka sega ni mudu."

¹⁰A sa dua na luve ni yalewa ni Isireli, sa kai Ijipita na tamana, sa lako yani ki na kedra maliwa na Isireli; ka rau a veivala e na i tikotiko, na luve ni yalewa ni Isireli oqo, kei na dua na tagane ni Isireli.

¹¹A sa vosavakacacataka na Yaca i Jiova o koya na luve ni yalewa ni Isireli ka ruru. A ra sa kauti koya vei Mosese: (ia na yaca i tinana o Silomeci, na luve i Tipiri, ena mataqali i Tani.)

¹²A ra sa sogolati koya mada me vakatakilai vei ira na loma i Jiova.

¹³A sa vosa vei Mosese o Jiova, ka tukuna,

¹⁴"Mo kauti koya sa ruru ki nai bili ni tikotiko; ia o ira kecega sa rogoci koya, me ra tabaka na uluna ena ligadra, me ra qai vakavirika ena vatu o ira nai soqosoqo taucoko.

¹⁵"Ia mo vosa vei ira na Isireli, ka vaka, 'O koya yadua sa rukaka na nona Kalou me cudruvi ena vuku ni nonai valavala ca.

¹⁶'Ia o koya sa vosa vakacacataka na yaca i Jiova, me sa vakamatei vakaidina; era na vakavirika vakaidina ena vatu o ira nai soqosoqo taucoko: na vulagi se nai taukei, ni sa vosavakacacataka na yaca o ya, ena vakamatei.

¹⁷'Ia o koya sa mokuta mate e dua na tamata, me vakamatei vakaidina o koya.

¹⁸'Kei koya sa mokuta mate na manumanu e yavai va, me sauma na manumanu o ya ena dua sa tautauvata.

¹⁹'Ia kevaka sa vakamavoataka na kai nona e dua na tamata, ena caka vua me vaka sa kitaka o koya.

²⁰'A mavoa mei sau ni mavoa, a mata mei sau ni mata, a bati mei sau ni bati: me vaka sa vakamavoataka e dua na tamata o koya, ena caka vaka talega kina vua.

²¹'Io o koya sa vakamatea na manumanu e yavai va, me sauma me vakatautauvata: ia o koya sa vakamatea na tamata, me vakamatei.

²²'Me dua ga na nomudou lawa, vei koya na vulagi, vei koya nai taukei: ni sai au o Jiova na nomudou Kalou.'"

²³A sa vosa vei ira na Isireli o Mosese, era qai kauti koya ka ruru ki nai bili ni koro, ka vakavirika ena vatu, A ra sa kitaka na Isireli, me vaka ka vakarota vei Mosese o Jiova.