[3] Vunau Ni Soro 26

¹'Dou kakua ni cakava vei kemudou na kalou lasu, se nai vakatakarakara e ceuceu se vakaduria na matakau, se na vatu sai vakatakarakara, e na nomudou vanua, mo dou cuva kina: ni sai au o Jiova na nomudou Kalou.

²Dou vakabauta na noqu veiSiga ni Vakacecegu, ka vakarokorokotaka na noqu vale tabu: Oi au o Jiova.

³'Kevaka dou sa muria na ka ka'u sa lesia, ka vakabauta na noqu vunau, ka cakava,

⁴Au na qai vakatauca vei kemudou na uca e na kena vula, ka na vuataka na kena vuata na vanua, ka vuataka na vuana na kau ni veiwere.

⁵Ia na nomudou samu sila ena yacova na vula e veti kina na vua ni vaini, ia dou na vetia tiko na vua ni vaini ka yacova na kaburaki sila, ia dou na kania na kemudou me mamau kina, ka tiko vakasautu e na nomudou vanua.

⁶Ia ka'u na solia na sautu e na vanua, dou na davo sobu kina ka sega e dua me vakarerei kemudou: au na vakaotia tani talega e na vanua na manumanu ca, ena sega talega ni lakova na nomudou vanua nai seleiwau.

⁷Ia dou na vakasavi ira na nomudou meca, a ra na bale e nai seleiwau e na matamudou.

⁸Ia e lewe lima vei kemudou ena vakasava rawa na lewe drau, ka dua na drau vei kemudou ena vakasava rawa e lewe tini na udolu: ia era na bale e nai seleiwau na nomudou meca e na matamudou.

⁹'Ni'u na golevi kemudou, ka vakaluveataki kemudou, ka vakalewevuqataki kemudou, ka vakataudeitaka vei kemudou na noqu veiyalayalati.

¹⁰Ia dou na kania tiko na ka sa tu dede, ka kauta kituba na ka sa tu dede me vakasosomitaki e na ka vou.

¹¹Ia ka'u na vakaduria na noqu vale e na kemudou maliwa: ia ena sega ni cati kemudou na yaloqu.

¹²Ia ka'u na lako voli e na kemudou maliwa, ia ka'u na nomudou Kalou, ia dou na noqu tamata.

¹³Sai au o Jiova na nomudou Kalou, ka'u a kauti kemudou tani mai na vanua o Ijipita, mo dou kakua ni nodra bobula tiko; ia ka'u sa sereka nai vesu dou a vauci kina, ka qisi kemudou mo dou lako vakadodonu.

¹⁴'Ia kevaka dou sa bese ni vakarorogo vei au, ka bese ni kitaka na vunau kecega oqo,

¹⁵Ka sa beca ga na noqui lesilesi, se sa cata na noqu lewa na lomamudou, mo dou kakua kina ni kitaka na noqu vunau kecega, ka sa vakacataka ga na noqu veiyalayalati,

¹⁶Au na qai kitaka na ka oqo vei kemudou; au na vakayacora na domobula, na lila balavu, kei na katakata, me tauvi kemudou, me kania na matamudou, ka vakararawataka na lomamudou: ia ena sega ni yaga ni dou sa kaburaka na nomudou sila, ni ra na kania na nomudou meca.

¹⁷Ia ka'u na rai vakatani vei kemudou, ia dou na vakamatei e na matadra na nomudou meca: a ra na lewai kemudou o ira era sa cati kemudou; ia dou na dro ni sa sega e vakasavi kemudou.

¹⁸'Ia kevaka dou sa bese tiko ni vakarorogo vei au, ni sa yaco na veika oqo, au na qai cudruvi kemudou vakavitu cake e na vuku ni nomudoui valavala ca.

¹⁹Ia ka'u na muduka na kaukauwa dou sa totoka kina; ka cakava na lomalagi me vaka na kaukamea vei kemudou, kei na nomudou qele me vaka na parasa.

²⁰Ia dou na oca walega: ni na sega ni vakalewe na nomudou vanua, ka sega ni vuataka na vuana na kau ni vanua.

²¹'Ia kevaka dou na lako vakatani vei au, ka bese ni vakarorogo vei au; au na qai vakayacora na mate ca vakavitu cake vei kemudou e na vuku ni nomudou i valavala ca.

²²Ia ka'u na vakatala na manumanu sega lasa ki na kemudou maliwa, a ra na butakoca na luvemudou, ka vakamatea na nomudou manumanu e yavai va, ka vakalewelailaitaki kemudou; ia ena sega ni lakovi na nomudou veisalatu.

²³'Ia kevaka dou sa bese tiko ni vakavinakataki mai vei au, ni sa yaco na veika oqo, ka sai valavala vakatani tiko vei au,

²⁴Ka'u na qai valavala vakatani talega vei kemudou, ia ka'u na cudruvi kemudou vakavitu tale, e na vuku ni nomudoui valavala ca.

²⁵Ia ka'u na vakayacora vei kemudou nai seleiwau, sa na cudrutaka na veiyalayalati, ka dou na soqoni vata kina e na nomudou loma ni veikoro; ia ka'u na tala na mate ca vei kemudou; ia dou na soli ki na ligadra na meca.

²⁶Ni'u sa vakaotia na madrai dou sa bula kina, ena qai lewe tini na yalewa sa na vavia na kemudou madrai e na dua na lovo, a ra na vakarautaka na bibi ni kemudou madrai, ni sa bera ni vota; ia dou na kana, ka sega ni mamau.

²⁷'Ia kevaka dou na sega ni vakarorogo vei au, ni sa yaco na ka kece oqo, kai valavala vakatani tiko vei au,

²⁸Ka'u na qai valavala vakatani vei kemudou e na cudru rerevaki; ia oi au, ka'u na cudruvi kemudou vakavitu tale, e na vuku ni nomudoui valavala ca.

²⁹Ia dou na kania na lewedra na luvemudou tagane; kei na lewedra na luvemudou yalewa.

³⁰Au na vakarusa talega na nomudou veitikina cecere, ka taya sobu na nomudou veimatakau e vaka na mata-ni-siga, ka biuta na yagomudou ni sa mate ki dela ni yagodra na nomudou matakau: ia ena cati kemudou na yaloqu.

³¹Ia ka'u na vakalalataka na nomudou veikoro, ka vakarusa na nomudou veivale tabu, ka'u na sega ni boica na nomudoui madrali boi vinaka.

³²Au na vakarusa talega na vanua: a ra na kurabui kina o ira na nomudou meca era tiko kina.

³³Ia ka'u na vakasesei kemudou ki na veimatanitu, ka ucuna nai seleiwau me muri kemudou: ia na nomudou vanua ena lekutu wale, ka na lala na nomudou veikoro.

³⁴Sa na qai marautaka na veiSiga ni Vakacecegu na vanua, ni sa veikau tu, ni dou sa tiko e na nodra vanua na nomudou meca; sa na qai vakacegu na vanua, ka marautaka na kena Siga ni Vakacecegu.

³⁵E na gauna kece sa veikau kina, ena vakacegu”ka ni sa sega ni vakacegu e na nomudou gauna ni vakacecegu, ni dou a tiko kina.

³⁶'Ia ka'u na tala na rere me kania na lomadra era sa vo vei kemudou, e na vanua ni nodra meca; ia na rorogo ni drau-ni-kau sa cagina voli ena vakubutaki ira; a ra na dro, me vaka ni ra drotaka nai seleiwau; a ra na bale ni sa sega e vakasava.

³⁷A ra na veibaleti, me vaka sa muri ira na i seleiwau, ni sa sega e vakasava: ia ena sega vei kemudou na kaukauwa mo dou tu kina e na matadra na nomudou meca.

³⁸Ia dou na rusa e na kedra maliwa na veimatanitu, ia ena kani kemudou na nodra vanua na nomudou meca.

³⁹Ia o ira sa vo vei kemudou, ena waicala yani na yalodra, e na vuku ni nodra i valavala ca, e na nodra vanua na nomudou meca; ia e na vuku ni nodra i valavala ca na nodra qase talega, ena waicala kina na yalodra.

⁴⁰'Ka ra na vakatusa na nodra i valavala ca, kei nai valavala ca ni nodra qase, kei na nodra caka cala era sa kitaka vei au, ka ni ra sai valavala vakatani vei au,

⁴¹Ni'u sai valavala vakatani talega vei ira, ka kauti ira ki na vanua ni nodra meca; kevaka sa qai malumalumu mai na lomadra sa sega ni cilivi, a ra sa qai vakadonuya nai sau ni nodra i valavala ca”

⁴²Au na qai nanuma na noqu veiyalayalati kei Jekope; kei na noqu veiyalayalati talega kei Aisake, kei na noqu veiyalayalati kei Eparaama, ka'u na nanuma; ka'u na nanuma talega na vanua.

⁴³Era na takali mai na nodra vanua, ia na vanua ena marautaka na kena gauna ni vakacecegu, ni sa veikau mai ni ra sa takali kina: a ra na vakadonuya nai sau ni nodra i valavala ca, ni ra sa beca na noqu lewa, ka sa cata na noqui lesilesi na yalodra.

⁴⁴Ia ni sa oti kece na ka oqo, ka ra na tiko e na vanua ni nodra meca, au na sega ni biuti ira laivi, se cati ira me'u vakarusai ira sara, ka me vakacacataka na noqu veiyalayalati kei ira: ni sai au o Jiova na nodra Kalou.

⁴⁵Ia e na vukudra ga, ka'u na nanuma na veiyalayalati kei ira na nodra qase, o ira ka'u a kauta tani mai na vanua o Ijipita e na matadra na veimatanitu, me'u nodra Kalou: Oi au o Jiova.'"

⁴⁶Oqo nai lesilesi, kei na lewa, kei na vunau, sa cakava o Jiova e na Ulunivanua o Saineai, e na gusu i Mosese, me veiyalayalati kina o koya kei ira na Isireli.