[3] Vunau Ni Soro 3

¹'Ni sa nonai madrali e dua nai soro ni veivinakati, kevaka sa vakacabora o koya e dua na bulumakau, se ka tagane se yalewa, me vakacabora e na mata i Jiova e dua sa sega na kena ca.

²'Ia me tabaka na ulu ni nonai madrali e na ligana, ka vakamatea mai na katuba ni vale ni veitavaki; ia o ira na bete, na luve i Eroni, me ra na kureitaka na dra vakavolivolita na i cabocabo ni soro.

³'Me qai vakacabora o koya mai nai soro ni veivinakati e dua nai madrali sa vakacabori e na buka waqa vei Jiova. Na uro e ubia na gacagaca, kei na uro kecega sa tu e na gacagaca,

⁴'Kei na ivi ruarua kei na uro sa tu e batibatina, kei na uro e kabita na yate e na dela ni ivi, o koya me na kauta tani;

⁵'Ia o ira na luve i Eroni me ra vakama e nai cabocabo ni soro e na dela ni soro kama, e dela ni kau sa toka e dela ni buka waqa, me ka sa vakacabori e na buka waqa, me boi vinaka vei Jiova.

⁶'Ia kevaka sa nona i madrali me i soro ni veivinakati vei Jiova na sipi se na me, se ka tagane se yalewa, me cabora o koya e dua sa sega na kena ca.

⁷'Kevaka sa vakacabora na lami me nona i madrali, me na cabora e na mata i Jiova.

⁸'Ia me tabaka o koya na ulu ni nonai madrali e na ligana, ka vakamatea e na mata ni vale ni veitavaki; ia o ira na luve i Eroni me ra kureitaka na dra wavokita na i cabocabo ni soro.

⁹'Me na vakacabora o koya na i madrali ni veivinakati, nai madrali sa vakacabori e na buka waqa vei Jiova, na kena uro kei na uro taucoko e buina me tava laivi o koya voleka ki na suitu. Kei na uro sa ubia na gacagaca kei na uro kecega sa tu e na gacagaca,

¹⁰'Kei na ivi ruarua kei na uro sa tu e batibatina, na uro e kabita tu na yate e na dela ni vi, o koya me kauta tani;

¹¹'Me qai vakama e na dela ni cabocabo ni soro o koya na bete me kakana, nai madrali sa vakacabori e na buka waqa vei Jiova.

¹²'Ia kevaka e nonai madrali na me, me cabora o koya e na mata i Jiova.

¹³'Ia me tabaka na uluna e na ligana ka vakamatea e na mata ni vale ni veitavaki; ia o ira na luve i Eroni me ra kureitaka na dra wavokita nai cabocabo ni soro.

¹⁴'Me na vakacabora o koya eso na tikina me nonai madrali, mei soro vakacabori e na buka waqa vei Jiova. Na uro e ubia na gacagaca kei na uro kece sa tu e na gacagaca,

¹⁵'Kei na ivi ruarua kei na uro sa tu e na batibatina, kei na uro e kabita tu na yate kei na ivi, o koya me na kauta tani;

¹⁶'Ia me qai vakama e dela ni cabocabo ni soro na bete me kakana, nai madrali e vakacabori e na buka waqa me ka boi vinaka; sa nei Jiova na uro kecega.

¹⁷'Oqo sa kenai lesilesi me sega ni mudu e na nomudou veitabatamata e na nomudou i tikotiko kecega: mo dou kakua ni kania na uro se na dra.'"