[3] Vunau Ni Soro 7

¹'E vaka talega oqo nai vunau ni soro ni caka cala (oqo sa ka tabu sara):

²'Ena yasana era sa vakamatea kina na i soro kama me ra vakamatea kina nai soro ni caka cala. Ia na kena dra me kureitaki wavokita nai cabocabo ni soro.

³'Ka me cabora o koya na kena uro kecega. Na buina uro kei na uro sa ubia na wawa,

⁴'Kei na ivi ruarua kei na uro sa tu ena batibatina, kei na uro sa kabita na yate e na dela ni ivi, oqo me kau tani;

⁵'Ka me vakama o koya na bete e na dela ni cabocabo ni soro me ka sa cabori e na buka waqa vei Jiova. Oqo nai soro ni caka cala.

⁶'O ira kecega na tagane vei ira na bete era na kania. Me laukana e na tikina tabu. Sa ka tabu sara.

⁷'Nai soro ni caka cala e tautauvata kei na i soro ni valavala ca; sa dua ga na kedrau i vunau: na bete sa cakava na veibulubuluti ena nona ga.

⁸'Ia na bete sa vakacabora na nonai soro ni valavala ca e dua na tamata, ena nona na bete o ya na kuli ni soro kama sa vakacabora o koya.

⁹'Kei na i soro laukana kecega sa vavi e na lovo kei na ka kece sa tavu e na i tavuteke, se nai tavuteke kaukamea, ena nona na bete sa vakacabora.

¹⁰'Kei nai soro laukana kecega, sa veiwaki vata kei na waiwai se mamaca, ena nodratou kecega na luve i Eroni, me ra duivota vakatautauvata.

¹¹'Ia oqo na vunau ni soro ni veivinakati ena vakacabora vei Jiova e dua na tamata:

¹²'Kevaka sa cabora mei madrali ni vakavinavinaka, me cabora vata, kei nai soro ni vakavinavinaka, na keke e sega ni vakai-vakatubu sa veiwaki vata kei na waiwai, kei na keke mamare sara sa boro e na waiwai, se na keke e caka e na valawa qaqi vinaka sa waki vata kei na waiwai.

¹³'Me kena i kuri ni keke, me nona i madrali me cabora talega na madrai e vakai-vakatubu kei na i madrali ni vakavinavinaka mai na nonai soro ni veivinakati.

¹⁴'Ia mai na ka oqori me na vakacabora o koya e dua na keke mei madrali e lavelaveti vei Jiova. Oqo ena nona na bete sa kureitaka na dra ni soro ni veivinakati.

¹⁵'Na lewe ni soro ni veivinakati e ka ni vakavinavinaka me na laukana ga e na siga e vakacabori kina. Me kakua na vakavoca o koya me yacova na mataka.

¹⁶'Ia kevaka e ka ni bubului se i madrali ni yalayala, me na laukana ga e na siga e vakacabora kina o koya na nonai madrali; ia e na mataka me laukana talega na kena vo;

¹⁷'Na lewe ni nonai madrali ni vakavinavinaka sa vo tu e na kenai katolu ni siga me vakamai e na bukawaqa.

¹⁸'Ia kevaka e dua na lewe ni nonai madrali ni soro ni veivinakati sa laukana e na kenai katolu ni siga, e na sega ni vakadonui, se me na yaga vei koya e vakacabora; ena ka vakasisila vua sa vakacabora, ia na tamata e kania ena cudruvi e na nona caka ca.

¹⁹'Na lewena e tara e dua na ka sa sega ni savasava me kakua ni laukana. Me vakamai e na bukawaqa. Ia na lewena savasava sa vo, me ra kania o ira kece sa savasava.

²⁰'Ia na tamata sa kania na lewe ni madrali ni soro ni veivinakati sa tabu me nei Jiova, ni sa dukadukali o koya, ena muduki tani na tamata o ya mai vei ira na kai nona.

²¹'Io na tamata talega e tara e dua na ka sa sega ni savasava, na ka e sega ni savasava vua na tamata, na manumanu sega savasava, se dua na ka e sega ni savasava e vakasisilataki, se dua e kania na lewe ni madrali ni veivinakati sa tabu me nei Jiova, ena muduki tani na tamata o ya mai vei ira na kai nona.' " Na Uro Kei Na Dra Me Na Kakua Ni Laukana

²²Sa vosa talega vei Mosese o Jiova, ka tukuna,

²³"Mo vosa vei ira na luve i Isireli, ka vaka: 'Dou kakua ni kania e dua na uro, ni bulumakau se sipi se me.

²⁴'Ia na uro ni manumanu sa mate vakadodonu ga, kei na uro ni manumanu era dresulaka na manumanu kila, e tara me vakayagataki e na ka tani eso; ia dou kakua sara ni kania.

²⁵'Ni o koya ena kania na uro ni manumanu sa dau-vakacabori e na buka waqa vei Jiova, io na tamata e kania ena muduki tani mai vei ira na kai nona.

²⁶'E vakakina mo dou kakua talega ni kania na dra e na nomudou veivale kecega, se dra ni manumanu vuka se manumanu e yavai va.

²⁷'O koya ena kania na dra, ena muduki tani na tamata o ya mai vei ira na kai nona.'"

²⁸Sa vosa talega vei Mosese o Jiova, ka tukuna,

²⁹"Mo vosa vei ira na luve i Isireli, ka tukuna: 'O koya sa vakacabora na nonai madrali ni soro ni veivinakati vei Jiova me kauta mai na nona i madrali vei Jiova mai na nona i soro ni veivinakati.

³⁰'Ena ligana me kauta na ka sa vakacabori e na buka waqa vei Jiova. Me kauta na uro kei na serena, me yalovaka na serena mei soro e yalovaki e na mata i Jiova.

³¹'Ia na bete me vakama na uro e na dela ni cabocabo ni soro, ia na serena me kedratou o Eroni kei na luvena.

³²'Ia na sagana i matau mo dou solia vua na bete mei soro e lavelaveti mai na i madrali ni nomudou i soro ni veivinakati.

³³'O koya vei iratou na luve i Eroni, sa cabora na dra ni soro ni veivinakati kei na uro, ena kena i votavota na sagana i matau.

³⁴'Na serena sa yalovaki kei na sagana sa lavelaveti Au sa taura mai vei ira na Isireli, mai na nodra i madrali ni soro ni veivinakati, ka'u sa solia vei Eroni na bete kei iratou na luvena mai vei ira na luve i Isireli me kena i lesilesi ka sega ni mudu.'"

³⁵Oqo sa vakatabui me kei Eroni kei iratou na luvena, mai na i madrali sa vakacabori e na buka waqa vei Jiova, e na siga sa kauti iratou kina o Mosese me ratou bete vei Jiova.

³⁶O Jiova sa vakarota me ra solia vei iratou o ira na luve i Isireli, e na siga sa lumuti iratou kina o Koya, me kenai lesilesi me sega ni mudu e na nodra veitabatamata.

³⁷Sa vakaoqo na vunau ni soro kama, na i soro laukana, nai soro ni valavala ca, na i soro ni caka cala, na vei-vakatabui, kei na i soro ni veivinakati me cabori,

³⁸O koya sa vakarota vei Mosese o Jiova mai na Ulunivanua o Saineai, e na siga sa vakaroti ira kina na Isireli me ra vakacabora na nodra i soro vei Jiova e na Lekutu mai Saineai.