[3] Vunau Ni Soro 9

¹Ia sa yaco e na kenai kawalu ni siga sa kacivi Eroni kei iratou na luvena kei ira na nodra qase na Isireli o Mosese.

²Ka sa tukuna vei Eroni, "Mo kauta ena vukumu e dua na luve ni bulumakau tagane mei soro ni valavala ca kei na dua na sipi tagane mei soro kama, sa sega na kena ca, ka vakacabora e na mata i Jiova.

³"Ia vei ira na luve i Isireli mo tukuna, ka vaka, 'Mo ni kauta e dua na luveni me mei soro ni valavala ca, ka dua na luve ni bulumakau kei na lami, me yabaki yadua, ka sega na kena ca, mei sorokama,

⁴'Kei na dua na bulumakau tagane kei na sipi tagane mei soro ni veivinakati, me vakacabori e na mata i Jiova, kei na i soro laukana sa veiwaki vata kei na waiwai; ni na rairai vei kemuni e na siga oqo o Jiova.'"

⁵Era sa kauta mai na veika e vakarota o Mosese mai na mata ni vale ni veitavaki. Ka ra sa toro voleka nai soqosoqo taucoko ka tu e na mata i Jiova.

⁶Sa qai tukuna o Mosese, "Oqo na ka sa vakarota o Jiova mo ni cakava, ena qai rairai vei kemuni na serau i Jiova."

⁷Ka sa tukuna vei Eroni o Mosese, "Mo lako ki nai cabocabo ni soro, vakacabora na nomui soro ni valavala ca kei na nomui soro kama, ka sorovaki iko kei ira na tamata. Vakacabora na nodra i madrali na tamata, ka sorovaki ira, me vaka sa vakarota o Jiova."

⁸Sa lako vakakina o Eroni ki nai cabocabo ni soro ka vakamatea na luve ni bulumakau mei soro ni valavala ca, e na vukuna ga.

⁹E ratou sa qai kauta vua na dra o iratou na luve i Eroni. Ka sa tonia o koya na nona i qaqalo ki na dra, ka boroya na tutu ni cabocabo ni soro e balavu cake, ka sova na dra ki na yavu ni cabocabo ni soro.

¹⁰Ia na uro, na ivi, kei uro kabita tu na yate mai nai soro ni valavala ca sa vakama o koya e na dela ni cabocabo ni soro, me vaka e vakarota vei Mosese o Jiova.

¹¹Na lewena kei na kulina sa vakama o koya e na buka waqa e nai bili ni tikotiko.

¹²Sa vakamatea talega o koya nai soro kama; e ratou sa solia vua na dra o iratou na luve i Eroni, ka sa kureitaka o koya wavokita na i cabocabo ni soro.

¹³E ratou sa qai solia vua nai soro kama, na tikina yadua kei na uluna, ka sa vakama o koya e na dela ni cabocabo ni soro.

¹⁴Ka sa vuya o koya na gacagaca kei na yavana, ka sa vakama e dela ni soro kama e na dela ni cabocabo ni soro.

¹⁵Sa qai kauta o koya na nodra i madrali na tamata, ka taura na me, o ya na nodra i soro ni valavala ca na tamata, ka vakamatea ka vakacabora mei soro ni valavala ca, me vaka na kena e liu.

¹⁶Ka kauta na i soro kama ka vakacabora me vaka na kena i valavala.

¹⁷Sa qai kauta na i soro laukana, ka yakuta e ligana, ka vakama e dela ni cabocabo ni soro, ena yasa ni soro kama vakamataka.

¹⁸Sa vakamatea talega o koya na bulumakau tagane kei na sipi tagane me i madrali ni soro ni veivinakati, e na vukudra na tamata. Ka ratou sa solia vua na dra na luve i Eroni, ka sa kureitaka o koya wavokita na i cabocabo ni soro,

¹⁹Ia na uro ni bulumakau tagane kei na sipi tagane ” na buina uro, kei na uro sa ubia na gacagaca kei na ivi, kei na uro e kabita tu na yate;

²⁰ka ratou sa biuta na uro ki na serena. Sa qai vakama o koya na uro e na dela ni cabocabo ni soro;

²¹ia na seredrau kei na sagadrau i matau sa yalovaka o Eroni mei soro e yalovaki e na mata i Jiova, me vaka e vakarota o Mosese.

²²Sa qai dodoka yani na ligana o Eroni vaka kivei ira na tamata, ka vosa vakalouvinakataki ira, ka lako sobu ni sa vakacabora oti nai soro ni valavala ca, nai soro kama, kei nai soro ni veivinakati.

²³E rau sa curu ki na vale ni veitavaki o Mosese kei Eroni, ka curu tale kitautuba ka vosa vakalouvinakataki ira na tamata. Sa qai rairai vei ira na tamata kecega na serau i Jiova,

²⁴ka sa lako mai na buka waqa mai na mata i Jiova ka kania nai soro kama kei na uro e na dela ni cabocabo ni soro. Ia ni ra sa raica o ira na tamata kecega, era sa kaila ka cuva vakatoboicu.