[41] Marika 1

¹Nai vakatekivu ni tukutuku vinaka kei Jisu Karisito na Luve ni Kalou.

²Me Vaka sa vola na parofita: "Ka raica, Au sa tala na noqu i talai me liu e matamu, Ena vakarautaka na nomu sala e matamu."

³"A domo ni dua sa kacikaci ena loma ni vanua liwa: 'Sa vakarautaka na sala i Jiova' Ka vakadodonutaka na nona salatu."

⁴Sa lako mai o Joni ena vanua liwa, ka veipapitaisotaki ka vunautaka tale tikoga na veivutuni me bokoci kina nai valavala ca.

⁵A ra sa lako kece vua na vanua vakaJutia, kei ira mai Jerusalemi mera papitaisotaki mai vua ena uciwai o Joritani, ni ra sa vakatusa na nodra i valavala ca.

⁶A sa vakaisulu o Joni ena i sulu vuti ni kameli, ka sai vau ni tolona nai vesu kuli ni manumanu, ka sa dau kania na vodre kei na denioni ni veikau.

⁷Sa dau tukuna ena nona i vunau, ka vaka, "E dua sa muri au tiko mai ka sa levu cake mai vei au, na wa ni nona i vava mada ga au sa sega ni yacova yani na kenai vakatagedegede me tu kina na dodonu vei au me'u sereka.

⁸Oi au na papitaisotaki kemudou ena wai, ia o Koya ena qai mai papitaisotaki kemudou ena Yalo Tabu.'

⁹Ena dua na siga a sa lako mai o Jisu mai Nasareci ena vanua vaKaleli, ka mai papitaisotaki Koya o Joni ena Joritani.

¹⁰Ka vakasauri, ni sa lamata cake mai wai, sa raici lomalagi ni sa tadola tu ka raica ni sa rairai sobu mai vua na Yalo Tabu me vaka na ruve.

¹¹A sa dua na vosa sa rogo mai lomalagi, 'O iko na Luvequ na Noqu ka lomani, Au sa dau marau vakalevu ena vukumu.'

¹²Ka vakasauri nona sa kauti Koya kina vanua liwa na Yalo Tabu,

¹³A sa tiko o Koya mai na vanua liwa me vasagavulu na siga, ka dau temaki koya o Setani, kei ira na manumanu kila era sa tiko vata kaya; era sa qaravi Koya na agilosi.

¹⁴Ni sa biu kina vale ni veivesu o Joni, a sa lako mai ki Kaleli o Jisu ka vunautaka nai tukutuku vinaka ni matanitu ni Kalou,

¹⁵Ka tukuna, 'sa mai vakataucokotaki na gauna oqo, ka sa voleka na matanitu ni Kalou. Dou veivutuni, ka vakabauta nai tukutuku vinaka.'

¹⁶Ena nona a taubale voli ena baravi mai Kaleli, e a raici Saimone kei Adriu na tuakana ni rau viritaka tiko na nodrau lawa ki wasaliwa; ka ni rau sa gonedau.

¹⁷A sa tukuna vei rau o Jisu, 'drau muri Au, ka'u na vakayacori kemudrau mo drau gonedau ni tamata.

¹⁸A sa vakasauri na nodrau sa biuta na nodrau lawa ka muri Koya.

¹⁹Ni toso tale yani vakalailai ki liu mai na vanua e tu kina, e a raici Jemesa na luvei Sevete, kei Joni na tuakana, ni rau tiko ena loma ni waqa ka oneva tiko na nodrau lawa.

²⁰A sa kacivi rau yani vakasauri, ka rau sa biuti tamadrau tu mai waqa kei ira na tamata cakacaka, ka muri Koya.

²¹A ratou sa lako ki Kapenaumi, ka donumaki na siga ni vakacecegu, a sa lako o Koya ki na vale ni lotu ka vakatavuvuli.

²²Ka ra sa kurabui ena nona i vakavuvuli, ni vakavulici ira o Koya me vaka e dua sa tu vua na vakatulewa kece, ka sega ni vakataki ira na daunivolatabu.

²³A sa dua na tamata sa tiko ena loma ni vale ni lotu ka sa curumi tu ena yalo velavela ka sa qoqolou kina,

²⁴Ka tukuna, "laivi keimami ga! na cava mo via sagai keimami kina, Jisu na kai Nasareci? O sa lako beka mai mo mai vakarusai keimami? Oi au sa kilai iko vinaka “ na nona Le dua Yalosavasava na Kalou!"

²⁵Ia sa vunauci koya o Jisu, ka tukuna, "mo tiko lo, ka mo lako tani mai vua!"

²⁶Sa qai sasakurekuretaki koya na yalo velavela ka qolou ena domo levu, a sa qai lako tani mai vua.

²⁷A ra sa qoroqoro na tamata kecega ka ra veitarogitaka vakai ira, ka vaka, "vakacava na ka sa yaco oqo? A vakavuvuli vou cava beka oqo? Ni vosa ga, sa talairawarawa vua na yalo velavela."

²⁸Ka sa sega kina ni bera ni sa tete na kena i rogorogo kina veivanua wavolivolita na vanua va Kaleli.

²⁹Ni ratou sa biuta mai na vale ni lotu, a ratou sa la'ki curu sara kina vale i Simone kei Adriu ka tomani koya o Jemesa kei Joni.

³⁰Ia na tinai wati Saimone sa davo tiko ka ni tauvimate, ka ra sa tukuna vua nai tuvaki ni veika sa yaco tiko e vale.

³¹Sa qai lako mai o koya ki yasana ka taura na ligana ka vakaduria cake, vakasauri ga na kena sa takali na tauvimate mai vua ka sa veiqaravi tale vei iratou o koya.

³²Ni sa la'ki dromu na siga ena yakavi, ka e lewevuqa sa kau mai Vua era sa tauvimate ka so e curumi tevoro.

³³A ra sa osota na mata ni katuba na lewe ni koro taucoko.

³⁴Ka lewevuqa vei ira sa tauva na veimate ca eso sa vakabulai ira o koya, ka cemuria tani e levu na tevoro; a sa sega ni vakatara o koya mera vosa na tevoro, baleta ni ra kilai Koya.

³⁵Ni se qai mataka caca se bera ni kida mai na rarama, a sa duri cake o koya ka lako kina dua na vanua me tiko taudua ga kina; ka sa masu kina.

³⁶O Saimone kei ira sa tiko vata tukuna era sa vakasaqarai Koya.

³⁷Ni ra sa kunei Koya, era sa tukuna vua, "O ira taucoko na tamata era sa vakasaqarai kemuni."

³⁸Ia sa tukuna vei ira o koya, "medatou lako mada ki na koro e tarava, ka me'u rawa ni la'ki vunau kina, baleta nai naki ga oqo Au lako mai kina."

³⁹A sa vunau o koya ena veivale ni lotu taucoko e Kaleli, ka cemuria na tevoro.

⁴⁰A sa lako mai vua e dua na vukavuka ka vakamamasu vua ena nona tekiduru sobu, ka tukuna, "kevaka mo ni vakadonuya, oi au me'u vakasavasavataki."

⁴¹Sa yavalati Jisu na loloma, ka dodoka yani na ligana, ka tarai koya, ka tukuna, "Au sa vinakata, mo savasava mai."

⁴²Ni sa cavuta oti na vosa, ka vakasauri na kena sa takali vua na vukavuka, ka sa vakasavasavataki tu.

⁴³A sa tautaunaka sara ga vakabibi vua ka vakatalai koya yani,

⁴⁴Ena Nona tukuna vua, 'raica me kakua ni dua mo tukuna kina, ia mo lako yani ka la'ki vakaraitaki iko vua na bete, ka cabora na nomu i soro ni veivakasavasavataki me vaka nai vakaroi Mosese, me vakadinadinataka vei ira."

⁴⁵Ni sa lako yani na tamata oqo sa sega ni qai tarovi koya rawa, ena nona sa vakatetea raraba yani na veika sa yaco vua, ka sa sega kina ni rawa vei Jisu me curuma na loma ni koro, ia a sa la'ki tikoga ki na vanua liwa; ka ra sa lako mai vua na tamata mai na veiyasana kecega.