[41] Marika 11

¹Ni ratou sa volekati Jerusalemi ka ratou se yaco tiko mai Pecivaki kei Pecani mai na ulunivanua ni veiolive, sa vakatala e lewe rua na nona tisaipeli;

²A sa tukuna vei rau, drau lako kina koro sa tiko mai ena yasana kadua; ni drau sa curuma yani drau na raica e dua na asa lailai ni vesu tiko ka se bera ni bau dua me vodoka, drau sereka ka kauta mai.

³"Kevaka e mani dua me tarogi kemudrau, a cava drau sa kitaka kina na ka oqo? Drau tukuna, sa gadreva na Turaga, 'Ena vakasuka tale mai eke o koya."

⁴A rau sa lako yani ka kunea na asa lailai ni vesu tu ena dua na mata ni katuba ena yasa ni gaunisala, ka rau sereka sara.

⁵Ia sa tu e kea eso ka tukuna vei rau, "A cava drau sereka kina na asa lailai?"

⁶A rau sa tukuna vei ira na ka sa vakarota mai vei rau o Jisu. Era sa laivi rau me rau lako yani.

⁷Rau kauta mai na asa lailai vei Jisu ka tevuka e delana na nodrau i sulu, a sa dabe kina o Koya.

⁸Ka lewe vuqa sa tevuka na nodra i sulu e gaunisala, ka so era musuka na taba ni kau mera vakotora e gaunisala.

⁹O ira na liu tiko kei ira na muria tiko mai era sa kailavaka, ka vaka: "Osana!" 'Sa kalouvinaka o Koya sa lako mai ena yaca ni Turaga!'

¹⁰Sa kalouvinaka na matanitu nei Tamada o Tevita ni sa lako mai ena yaca ni Turaga! Osana vua sa cecere sara!"

¹¹A sa curu yani ki Jerusalemi o Jisu ka lako sara kina vale ni soro. Sa vakaraica na veika kece era tu, ka ni sa totolo tiko na gauna, sa qai lako yani ki Pecani kei iratou na lewe tinikarua.

¹²Ni ratou sa biuti Pecani mai ena siga ka tarava, a sa via kana o Koya.

¹³A sa raica mai vakayawa o Koya e dua na vunilolo ka vakadrauna vinaka, sa toro voleka kina me raica na vuana. Ni sa yaco kina, e sega sara tu ga ni vua, ia na drauna walega, ka ni se bera tiko na vulai lolo.

¹⁴Sa tukuna o Jisu, "Na vuamu me sa cava eke na kena laukana tiko." E ratou sa rogoca na Nona tisaipeli.

¹⁵A ratou sa lako mai ki Jerusalemi. Ka sa curu o Jisu kina vale ni soro ka tekivu me cemuri ira tani na veivoli tiko e loma ni vale ni soro, sa vukica sobu na teveli ni veisau i lavo kei na nodra teveli na volitaki ruve.

¹⁶Sa sega ni qai dua tale me vakatara o Koya, me kauta e loma nivale ni soro na nona i voli.

¹⁷A sa vakavulici ira, ka vaka, "Sa sega li ni a volai, na noqu vale ena vakatokai me nodra vale ni masu na veimatanitu kecega? Ia dou sa cakava me qara ni daubutako."

¹⁸Ni ra sa rogoca na daunivolatabu kei ira na bete levu era sa vakasaqara e dua na gaunisala mera vakamatei Koya kina; ni ra sa rerevaki koya, baleta na nodra qoroqoro na lewe vuqa ena nona i vakavuvuli.

¹⁹Ni sa lutu mai na karobo, a sa lako tani mai o Koya ena koro.

²⁰Ena mataka lailai ni ratou lako sivita na vuni lolo, ka ratou raica ni sa malai sara ga mai na wakana.

²¹Sa qai nanuma mai o Pita, ka tukuna Vua, "Rapai, raica! na vuni lolo o a cudruva sa malai vakadua."

²²Sa tukuna vei iratou o Jisu, ka vaka, "Dou vakabauta na Kalou."

²³"Ni'u sa tukuna vakaidina veikemudou, ke dua e tukuna kina ulunivanua oqo, mo toso laivi ka biu kina wasawasa ka sega ni vakatitiqa e yalona, ia me vakabauta na ka e tukuna ni na yaco, ena vakayacori na cava ga e cavuta.

²⁴"O Koya oqo ka'u tukuna tiko kina veikemudou, a ka kecega dou kerea ena nomudou masu, dou vakabauta, ni dou sa rawata, dou na taukena dina.

²⁵"Ni dou sa tucake ka masu, ke dua e caka cala veikemudou dou vosoti koya, me vaka na nona vosota nomudou caka cala na Tamamudou mai lomalagi.

²⁶"Ia kevaka dou sa sega ni rawa ni veivosoti, ena sega ni rawa vaka kina me vosoti kemudou, na Tamamudou mai Lomalagi ena nomudou caka cala."

²⁷E ratou sa qai lako tale mai ki Jerusalemi. Ni sa lako tiko o koya kina vale ni soro, a ra sa lako mai vua o ira na bete levu, na daunivolatabu, kei ira na qase.

²⁸A ra sa tarogi Koya, ka vaka, "A lewa mai vei o cakava tiko kina na veika oqo? O cei e solia vei iko na lewa mo cakava na veika oqo?"

²⁹Ia sa vosa vei ira o Jisu, ka vaka, "Au na tarogi kemudou se o cei na nona vakatulewa Au cakava tiko kina na veika oqo:

³⁰"E vu mai lomalagi, se mai vei ira na tamata, na veipapitaisotaki i Joni? Dou sauma mai vei Au."

³¹Era vakasamataka, ka veivosakitaka vakai ira ka vaka, "Kevaka eda na tukuna, 'E vu mai lomalagi, ena tukuna o koya, cava ga dou sega ni via vakabauti Koya kina?"

³²Ia kevaka eda tukuna, "Mai vei ira na tamata" “ ni o ira mada ga na tamata era wiliki Joni tu me dua na parofita, a ra sa rerevaki ira tale kina na tamata.

³³Era sa qai saumai vei Jisu, ka vaka, "Keitou sa sega ni kila rawa." A sa tukuna vei iratou o Jisu, "Ena sega ni rawa talega vei Au me'u tukuna veikemudou, se vakatulewa i cei Au cakava tiko kina na vei ka oqo."