[41] Marika 3

¹A sa curu tale o koya ki na vale ni lotu, ka sa tiko kina e dua na tamata sa mate na ligana.

²Ka era sa vakawanonovi Koya sara vakamatua, se na vakabula o koya na tamata oqo ena siga ni vakacecegu, ka me rawa ni ra beitaki koya kina.

³A sa tukuna o koya vua na tamata sa mate na ligana, "kalawa mai liu."

⁴Sa qai tukuna vei ira, e tara li me caka ena siga ni vakacecegu na ka vinaka se na ka ca, me vakabulai na tamata se me vakamatei? Ia era sa vagagalu.

⁵A sa vakaraici ira ena mata cudrucudru, ni rarawataka na lomaqa ni yalodra, sa qai tukuna vua na tamata oqo, "dodoka mai na ligamu!" A sa dodoka yani o koya, ka sa vakabulai na ligana me vaka ga na ligana ka dua.

⁶A ra sa lako yani na Farisi ka la'ki bosea vata kei ira nai tokani i Eroti, na sala mena vakamatei kina o koya.

⁷Ia o Jisu kei ratou na nona tisaipeli e ratou sa mani gole vaka ki wasawasa. A sa lewevuqa mai Kaleli ka yacovi Jutia era sa muri Koya.

⁸Mai Jerusalemi kei Itumea ka yacova na tai kadua ni Joritani; ka yacova sara yani na vanua vaka Taia kei Saitoni, ka sa lewevuqa sara na tamata ni ra sa rogoca na veika sa cakava o Koya era sa lako mai vua.

⁹A sa tukuna vei ratou na nona tisaipeli me ratou vakarautaka rawa tiko vua e dua na waqa, dera lako mai na lewevuqa ka mai veidrigidrigi e Matana.

¹⁰Ka e lewevuqa era sa vakabulai, ka lewevuqa vei ira sa tauvimate era toso voleka Vua mera bau tarai Koya mada ga.

¹¹Ni ra sa raici Koya na yalo velavela, era sa davo e matana ka qoqolou, era tukuna, "O iko na Luve ni Kalou."

¹²Ia a sa vakarota matua vei ira mera kakua ni vakatakilai Koya.

¹³A sa cabe cake kina ulunivanua ka kacivi ira mai vua o ira sa vinakata o koya. Ka ra sa lako mai Vua.

¹⁴Sa lesia e lewe tinikarua o koya, me ra na dau tiko vata tukuna ka me vakatalai ira talega ena kena vunautaki na vosa.

¹⁵Ka me tiko talega vei ira na kaukauwa ni vakabula na tauvi mate kei na cemuri ni tevoro.

¹⁶O Saimone sa vakayacana me o Pita;

¹⁷O Jemesa na luvei Sevete kei Joni na tuakai Jemesa, a sa vakayacani rau me o Boanesi, ka kenai balebale, 'na luve ni kurukuru;"

¹⁸O Adriu, Filipi, Vacolomiu, Maciu, Tomasi, Jemesa na luvei Alivio, Tadeo kei Saimone na Kenaiti;

¹⁹Kei Jiutasa Isikarioti, o koya ka qai soli Koya yani, ka ratou sa lako kina dua na vale.

²⁰A ra sa lako mai na lewevuqa ka sa sega ni ratou kania rawa na kedratou madrai.

²¹Ia ni ra sa rogoca na wekana voleka na ka sa yaco era sa lako mai ka tauri koya, ka era tukuna, "ni sa vaka e ca na uluna."

²²O ira na daunivolatabu ka era lako mai Jerusalemi sa tukuna, ni sa curumi koya tiko o Pielisipupi na nodra turaga na tevoro, o koya ka cemuri ira rawa tiko kina na tevoro.

²³Sa qai kacivi ira mai Vua ka tukuna vei ira e dua na vosa vakatautauvata: "E rawa vakacava vei Setani me cemuri Setani tale?"

²⁴"Kevaka e dua na matanitu mera sa veisei vakai ira, ena sega ni rawata na matanitu o ya me tudei.

²⁵Kevaka sa dui tawase na lewe ni vuvale, na vale o ya ena sega ni rawa ni tudei.

²⁶Kevaka me tucake mai o Setani ka valuti koya ga e sa na yaco kina na tawase ka sega ni tudei rawa, ia ka sa na oti vakadua o koya.

²⁷Ena sega ni rawa e dua me curuma vakaukauwa na vale ni tamata qaqa ka yanaraka na nona i yaya ni vale, ka vakavo ga kevaka me vesuka mada e liu na tamata qaqa. Sa na qai rawa ni yanaraka na nona i yaya ni vale.

²⁸Na ka dina Au tukuna vei kemudou, nai valavala ca kece era cakava na luve ni tamata, kei na nodra vosa kece era vosacataka kina na Kalou;

²⁹"Ia ke dua ga e vosavakacacataka na Yalo Tabu ena sega ni vosoti, ia sa na kenai totogi me lako kina rusa Sega ni mudu."

³⁰Baleta ni ra tukuna, "sa curumi Koya tiko e dua na yalo velavela"

³¹E ratou lako mai vei Jisu na tinana kei na tacina ka ratou mai tucake tu e tautuba, ka ratou vakauta E dua nai tukutuku vei Jisu ni ratou vinakati koya.

³²Era lewevuqa na tamata era sa dabe wavoliti i Koya; ka ra tukuna vua, "raici iratou na tacimu kei na tinamu e ratou sa tu e tautuba ni ratou vakasaqarai iko."

³³Ia sa tukuna vei ira o koya, ka vaka, "O cei li na tinaqu kei na taciqu?"

³⁴Sa qai raici ira yani na dabe wavoliti Koya tiko, ka tukuna, sai koya oqo na tinaqu kei na taciqu!"

³⁵"O koya ga sa cakava na loma ni Kalou sai koya oqo na taciqu, ganequ ka tinaqu."