[40] Maciu 27

¹Ni sa mataka mai, era sa qai bukia na vere kei Jisu me sa vakamatei o ira na bete levu kei ira na qase ni lotu.

²Ni ra sa vesuki koya, era sa qai kauta me la'ki soli ki na liga i Ponito Pailato na kovana. Sa Kunati Koya Ga O Jiutasa

³O Jiutasa, o koya ka volitaki Koya ni sa raica sa na vakamatei dina o Jisu, sa qai veivutunitaka na ka e cakava, ka vakasuka lesu na tolusagavulu na tiki ni siliva vei ira na bete levu kei ira na qase,

⁴Ka tukuna, 'Au sai valavala ca niu volitaki Koya na dra sega cala.' Era sa tukuna vua, na cava me mai neitou kina? Oqori na nomu leqa ga o iko!'

⁵Sa taura o koya na tolusagavulu na tiki ni siliva ka viritaka sobu ena vale ni soro ka lako yani i tuba ka la'ki kunati koya kina.

⁶Ia era sa taura na tiki ni siliva na bete levu ka tukuna, 'sa sega ni vakatarai ena noda lawa me biu ki nai yau ni lotu na ka oqo, baleta ni i sau ni dra.'

⁷Era sa bosea ka lomavata me sa voli kina na tiki ni qele e dau vakayagataki mai vei ira na dautuli kuro, me ra dau la'ki buluti kina na kai veimatanitu tani.

⁸O koya oqo sa vakatokai kina na qele o ya me qele ni dra ka yacova mai na siga ni kua.

⁹Sa mai vakataucokotaki kina na vosa i Jeremaia na parofita, ka vaka, 'era sa taura e tolusagavulu na tiki ni siliva, na kena i voli o Koya sa volitaki, me vaka era a voli koya kina na luvei Isireli,

¹⁰Ka ra sa solia kina dautuli kuro mei sau ni qele, me vaka sa liutaki au kina na Turaga.' O Jisu Ena Mata I Pailato

¹¹Sa la'ki tucake tu o Jisu ena matana na kovana. Ka sa tarogi Koya na kovana ka vaka, 'O iko dina li na nodra Tui na Jiu?' Sa tukuna vua o Jisu, 'Sa dina na ka o tukuna.'

¹²Ni ra sa beitaki Koya na bete levu kei ira na qase ni lotu, sa galu ga o Koya.

¹³Sa tukuna vua o Pailato, 'O sega tiko beka ni rogoca na veika era cavuta tiko me baleti iko o ira qo?'

¹⁴Ia sa kurabui vakalevu na kovana, ni sega sara ga ni bau dua na mala ni vosa me cavuta mai. Nai Sosomi Kei Parapa

¹⁵Ena gauna ni kana vata ni lako sivia sa dau kenai vakarau vua na kovana me sereka vei ira na lewenivanua e dua na kaivesu era digitaka.

¹⁶Ka dua na kaivesu kilai levu ena ca ka tiko ena gauna o ya o Parapa.

¹⁷O koya oqo, ni ra soqoni vata mai sa tukuna vei ira o Pailato, 'O cei o ni vinakata me'u sereka vei kemuni? O Parapa, se o Jisu o koya sa vakatokai na Karisito?'

¹⁸Ni sa kila o koya ni ra kauti Koya mai vua ena vuku ni nodra lomaca.

¹⁹Ni se dabe tikoga o koya ena nona i dabedabe vakaturaga ni lewa, sa vakauta yani vua e dua nai tukutuku na watina, ka vaka, "Mo kakua ni via cakava e dua na ka vua na tamata yalododonu oqori, ni levu na ka rarawa e yacovi au e daidai ena noqu a tadrai Koya ena noqu tadra."

²⁰Ia o ira na bete levu kei ira na qase ni lotu era sa cikevi ira na lewe vuqa, mera kerei Parapa me sereki ka me vakamatei ga o Jisu.

²¹Sa baci tarogi ira tale na kovana, ka vaka, 'O cei vei rau na lewe rua qo o ni vinakata me'u sereka vei kemuni?' Era sa tukuna, o Parapa!'

²²Sa tukuna vei ira o Pailato, 'Na cava me'u na cakava vei Jisu o Koya sa vakatokai na Karisito?' Era sa tukuna kecega mai vua 'Me lauvako ga!'

²³Sa tukuna na kovana, 'Na ka ca cava e cakava o Koya?' Ia sa qai rogolevu ga mai na domodra, ka vaka, 'Me lauvako ga o koya!'

²⁴Ni sa raica o Pailato ni sa sega ni na rawati ira, ka kila ni sa vakarau kacabote e dua na veivala levu, sa kauta mai e dua na beseni wai ka vuluvulu ena matadra na lewe vuqa, ka tukuna, "Oi au me'u kakua ni beitaki ena Nona dra na tamata yalododonu qo. Me sa beitaki ga vei kemuni.'

²⁵Era sa qai tukuna mai na lewe vuqa, ka vaka, 'na Nona dra me bale vei keimami kei ira na luvei keimami.'

²⁶Sa qai sereki Parapa vei ira, ni sa vakanakuitataki Jisu oti, sa qai solia yani me lauvako ena kauveilatai. Era Sa Vakalialiai Jisu Na Sotia

²⁷O ira na sotia ni kovana era sa qai kauti Jisu ki na vale ni yadra vakaivalu, ka kacivaki yani me ra sota taucoko mai na lewe ni mataivalu.

²⁸Era luvata kece na Nona i sulu ka vakasulumi koya ena dua nai sulu balavu damudamu veiwaki.

²⁹Sa qai tali e dua nai sala ni tui ena wa vakavotona, a ra sa vakaisalataki koya kina, kei na dua na gasau ena ligana i matau. Era sa qai tekiduru e matana mera vakalialia, ka tukuna, 'ni sa bula saka, na nodra tui na Jiu!'

³⁰Era kasiviti Koya ka taura na gasau mera mokuta kina na uluna.

³¹Ni ra sa vakalialiai Koya oti, era sa qai luvata tani mai nai sulu balavu, ka daramaka tale vua na nona i sulu dina, ka kauta yani me la'ki lauvako. Na Tui Ena Kauveilatai

³²Ni ra sa curu mai tuba ka lako yani, era sa raica e dua na kai Kirini, na yacana o Saimoni ka ra vakasaurarataki koya me colata na nona kauveilatai.

³³Ni sa yacova mai na vanua sa vakatokai o Kolikoca, na kena i balebale na vanua ni qavokavoka,

³⁴Era sa solia vua na wai wiwi ka veiwaki vata kei na ka sa gaga sara me gunuva. Ia ni sa tovolea o Koya sa bese ni gunuva.

³⁵Era sa qai vakoti Koya, ka veivotayaka na Nona i sulu ena nodra vakawirimadigitaka, me vakataucokotaki kina na vosa ni parofita: "Era sa veivotayaka vei ira na Noqu i ubi, Ka vakawirimadigitaka na Noqu i sulu.'

³⁶Era sa dabe sobu ka yadravi Koya tiko e kea.

³⁷Kei na nodra biuta ena dela ni uluna e cake e dua na yatu vosa ka beitaki kina: "OQO O JISU NA NODRA TUI NA JIU."

³⁸E lewe rua na daubutako e rau lauvako vata kei koya, e dua ena yasana i matau ka dua ena yasana i mawi.

³⁹Era vosavakacacataki Koya ka kurekure na uludra, ni ra tavali tiko e Matana na tamata.

⁴⁰Ka tukuna, 'O iko o via talaraka sobu na vale ni soro ka mo tara cake tale ena tolu ga na siga, mo vakabulai iko mada! Kevaka e dina ni o sa Luve ni Kalou, Mo kevu sobu mai ena kauveilatai.'

⁴¹Era sa vakalialiai koya talega na bete levu, na daunivolatabu kei ira na qase ni lotu, ka tukuna.

⁴²'O Koya sa dauvakabulai ira na tamata eso; e sega mada ga ni rawa me vakabulai koya. Kevaka e nodra Tui dina na Isireli, me kevu sobu sara ga mai oqo ena kauveilatai, keimami sa na qai rawa ni vakabauti koya.

⁴³'Sa dauvakararavi vua na Kalou; me vakabulai Koya sara mada ena gauna oqo: me vaka na Nona; tukuna 'oi Au na Luve ni Kalou.'

⁴⁴Na vosa vata talega o ya e rau cavuta vua na daubutako ka ratou vakoti vata. O Jisu Sa Mate Ena Kauveilatai

⁴⁵Ka sa butobuto taucoko na vanua o ya mai nai ka ono ni auwa kina i kaciwa ni auwa.

⁴⁶Ni sa yacova mai nai kaciwa ni auwa sa kaci o Jisu ena domolevu, ka vaka, 'Ilai, Ilai, Lamasapakicanai?' Na kenai balebale, 'Noqu Kalou, Noqu Kalou, ena cava o ni sa dro ka vakanadakui Au kina?'

⁴⁷E so vei ira na tu voleka e kea ni ra sa rogoca na vosa qo, era sa tukuna, 'na Tamata qo sa kacivi Ilaijia tiko!'

⁴⁸Sega ni bera sa cici e dua vei ira ka taura mai e dua na tiki ni sulu, ka tonisua ena wai wiwi vakaviviga kina dua na gasau ka solia yani Vua me gunuva.

⁴⁹Era sa tukuna na kena vo, 'laivi Koya mada; meda raica ena lako dina mai o Ilaijia me mai vakabulai Koya se ga.'

⁵⁰Sa qai kaci tale ena domo levu o Jisu ka solia yani na yalona.

⁵¹Ka raica, nai lati ni vale ni soro sa sei rua mai cake ki ra; ka uneune na vanua ka kakavidavida na veivatu,

⁵²Sa tadola na veibulubulu; ka lewe levu na tamata yalododonu era moce tu sa vakaturi cake tale;

⁵³Ni sa lako tani mai e nai bulubulu ni sa vakaturi cake tale o Koya, era sa lako ki na koro tabu ka rairai vei ira e lewe vuqa.

⁵⁴Na turaga ni valu kei ira na tiko vata kei koya, ena nodra yadravi Jisu tiko, ni ra sa raica na uneune ni vanua kei na ka sa yaco, era sa rere dina, ka tukuna, 'Sa dina sa luve ni Kalou o Koya.'

⁵⁵E lewe vuqa na marama ka muri Jisu sara mai Kaleli era dau qaravi koya, era tu e kea ka vakaraica tu mai vakayawa.

⁵⁶Ka dua vei ira o Meri Makitalena, o Meri na tinai Jemesa kei Josese, kei na tinadrau na luve i Sevete. Sa Buluti O Jisu Ena I Bulubulu Nei Joseva

⁵⁷Ni sa yakavi mai, sa lako mai e dua na tamata vutuniyau mai Arimacea, na yacana o Joseva, ka dua talega o koya na tisaipeli i Jisu.

⁵⁸Na tamata oqo sa lako vei Pailato ka kerea na yagoi Jisu. Sa qai vakarota o Pailato me soli vua na yagoi Jisu.

⁵⁹Ni sa kauta o Joseva na Yagona, sa qai la'ki solega ena dua nai sulu lineni savasava.

⁶⁰Ka la'ki vakadavora na yagona ena nona i bulubulu vou ka taya o koya mai na veivatu; a sa vaqiqica kina e dua na vatu levu mei sogo ni qara ni bulubulu, ka sa qai lako.

⁶¹E rau tu e kea o Meri Makitalena kei na Meri kadua, ka rau dabe me veibasai toka kei nai bulubulu. Sa Tuvani Ira Na Mata Yadra O Pailato

⁶²Ena siga ka tarava, o ya ni oti na siga ni vakavakarau, era sa soqoni vata yani kina vei Pailato o ira na bete levu kei ira na Farisi.

⁶³Era sa tukuna, 'ia saka, keimami sa vakasamataka na Nona vosa na dauveivakacalai oqo ni se bula tiko, ena Nona tukuna, 'Ni oti e tolu na siga Au na tucake tale.

⁶⁴'O koya oqo mo ni vakarota me yadravi vinaka nai bulubulu me yacova ni oti e tolu na siga, de ra qai lako mai na Nona tisaipeli ka butakoca na Yagona ena bogi ka ra laki tukuna vei ira na tamata, ni sa tucake tale o Koya mai na mate! Sa na qai ca sara vakalevu na veivakacalai oqo ka se bau lailai e liu.'

⁶⁵Sa tukuna vei ira o Pailato, 'Sa tu oqori vei kemudou na yadra (sotia); dou lako yani ka me yadravi sara vakavinaka me vaka dou sa kila.'

⁶⁶Era sa lako ka sogota vakavinaka nai bulubulu, dregati na vatu ka tuvani na mata yadra ena yasa ni bulubulu.