[40] Maciu 6

¹"Dou qarauni kemudou vinaka mo dou kakua ni loloma vakarairai vei ira na tamata, me ra raici kemudou. Ena sega kina na kemudou i sau mai vua na Tamamudou sa tiko mai Lomalagi.

²"O koya oqo, ni o sa soli ka ni loloma, kakua ni uvu davui me vaka era dau kitaka na dauveivakaisini ena veivale ni lotu kei na veigaunisala, mera vaqoroqoroi kina mai vei ira na tamata. Na ka dina Au tukuna vei kemudou oqo, na kedra i sau sara ga era sa taura tiko e kea.

³Ia ni o sa solia nomu ka ni loloma, me kakua ni kila sara ga na ligamu i mawi na ka sa solia na ligamu i matau.

⁴Me kua ni dua e kila kina na nomu solia nomu ka ni loloma; ni o koya na Tamamu sa raica na ka eda solia ka sega ni kilai, ena sauma vei iko o koya.

⁵Ena gauna o masu kina, me kakua ni vakataki ira na dauveivakaisini. Ni ra dau vinakata mera tucake tu ena veivale ni lotu kei na veitutu ni sala, me laurai vei ira na tamata ni ra masu tu. Na ka dina Au tukuna vei kemudou, ni sa kedra i sau sara ga era sa taura oqori.

⁶"Ia o iko, ni o sa masu, curu ki na nomu rumu, ka sogota mai na katuba qai masu vua na Tamamu sa tiko ena yasana vuni; ni o koya na Tamamu sa raica na ka vuni ena sauma votu vei iko.

⁷"Ni dou sa masu, kakua na vakamacalavakabalavu me vaka era dau cakava na sega ni lotu. Ni ra sa nanuma era na rogoci ena nodra vakayatuyatu vakabalavu.

⁸"O koya oqo mo dou kakua ni tautauvata kei ira. Ni o Tamamudou sa kila oti tu na ka e yaga vei kemudou, ni se bera na nomudou masu.

⁹Na nomudou masu me vaka ga oqo: Tamai keimami mai Lomalagi, Me vakarokorokotaki na Yacamuni.

¹⁰Sa lako mai na Nomuni Matanitu. Me yaco na Nomuni Lewa e vuravura me vaka sa yaco tiko mai Lomalagi.

¹¹Mo ni solia mai vei keimami na kakana e rauti keimami ena siga oqo.

¹²Ni kakua ni cudruvi keimami ena vuku ni neimami valavala ca, me vaka keimami - sa sega ni cudruvi ira era sai valavala ca vei keimami.

¹³Mo ni kakua ni kauti keimami ki na vere, ia mo ni vakabulai keimami mai na vuni “ ca. Ni sa Nomuni na Matanitu kei na Lewa kei na Lagilagi ka sega ni mudu. Emeni.

¹⁴"Na Tamamudou vakalomalagi ena vosoti kemudou kevaka dou vosoti ira sa caka cala vei kemudou.

¹⁵Ia kevaka mo dou sega ni vosoti ira sa caka cala vei kemudou, ena sega talega ni vosota na nomudou caka cala na Tamamudou.

¹⁶Ia ni dou sa lolo kakua ni dou vakataki ira na dauveivakaisini, ena nodra dau vakamataveveku ni ra dau vakaraitaka vei ira na tamata ni ra sa lolo ena kedra i rairai. Na ka dina Au tukuna vei kemudou, ni sa kedra i sau sara ga era sa taura oqori.

¹⁷"Ia o iko, ni o sa lolo, lumuta vinaka na ulumu ka vakasavasavataka vakavinaka - na matamu,

¹⁸Me kakua kina ni ra raica na tamata ni o lolo tiko, ni o koya na Tamamu sa raica - na ka vuni ena sauma votu vei iko.

¹⁹Dou kakua ni binia vei kemudou me nomudou nai yau vakavuravura, na vanua ena kania kina na sarasara kei na tauvi veveka kei na vanua talega era na curuma yani vakaukauwa na daubutako mera butakoca;

²⁰Ia dou binia ga vei kemudou me nomudou nai yau mai lomalagi, na vanua e sega ni rawa ni kania kina na sarasara se me tauvi veveka, se ra curuma vakaukauwa na daubutako mera butakoca.

²¹Ni vanua ena tiko kina na nomudou i yau ena tiko talega kina na yalomudou.

²²Na cina ni yago na mata. Kevaka e vinaka na mata, ena ramase kina na yagomu taucoko.

²³Ia kevaka e ca na matamu, na yagomu taucoko ena butobuto. o koya oqo sa na yaco kina na nomu rarama me butobuto, e sa na wacava na butobuto oqori!

²⁴E sega ni dua me qarava rawa e rua na Turaga; ni na lomani koya kadua ka cati koya kadua, se na dokai koya kadua ka dau vosa becitaki koya kadua. Ena sega ni rawa mo dou qarava na Kalou kei na i lavo.

²⁵"O koya oqo Au sa tukuna vei kemudou, mo dou kakua ni lomaocaocataka tiko na nomudou bula, na cava mo dou kania se cava mo dou gunuva; se cava me vakaisulutaki kina na yagomudou. E sega li ni bibi na bula mai na kakana, e sega li ni bibi na yagoda mai nai sulu?"

²⁶"Dou raici ira mada na manumanu vuka, ni ra sega ni kabukaburaki se tatamusuki, se na nodra via vakumunavata na kakana me la'ki biu kina nodra sova; sa dau vakani ira tu ga na Tamamudou mai Lomalagi. E sega li ni dou bibi cake oi kemudou mai vei ira?

²⁷"E rawa li ni dua vei kemudou ena nona lomaocaoca me tosoya na siga ni nona bula ni sa cava?

²⁸Na cava ga mo dou lomaocaocataka kina nai sulu mo dou daramaka? Dou vakasamataka mada na viavia era tubu tu ena buca, era bula tu mada vakacava: Era sega ni culacula se vakacauocataka e dua na ka.

²⁹Me'u tukuna ga vei kemudou na totoka kei na lagilagi ni sulu i Solomoni, e sega ni tautauvata na kedra i rairai totoka na viavia oqo.

³⁰Kevaka sa vaka tu oqo na Kalou ena Nona kauwaitaka me vakasuluma na viavia ni buca o koya sa tubu ga ni kua ka vakamai ni mataka, e sega li ni bibi cake sara ki Vua mo dou vakaisulutaki, oi kenudou sa lailai na nomudou vakabauta?

³¹"O koya oqo dou kakua ni lomaocaoca, " mo dou tukuna tiko, na cava me keimami kania? 'Se cava me keimami gunuva?' se cava me keimami vakaisulu kina?'

³²"Ni o ira ga na sega ni lotu era dauvakasaqara na veika oqo. O koya na Tamamudou mai Lomalagi sa kila tiko na nomudou gadreva na veika oqori.

³³Ia dou vakasaqara mada ga e liu na matanitu ni Kalou kei na Nona Yalododonu, ena qai soli ga mai vei kemudou na veika kece oqo.

³⁴O koya oqo dou kakua ni lomaocaocataka na veika ni mataka, me qai lomaocaocataki koya ga me baleti koya na siga ni mataka, Mo vakalaiva vua na siga me leqataka nona siga.