[33] Maika 1

¹A vosa sa yaco vei Maika na kai Moreseci ena gauna I Jocame, Easi kei Esekaia e ratou Tui Juta, e raica o ya na ka me baleti Samaria kei Jerusalemi.

²Dou rogoca mai, na mataqali i Isireli! Na vuravura, kei na ka kecega sa tu kina! Me na vakadinadina vei kemudou o Jiova, o Jiova mai na Nona vale tabu.

³Dou raica, o Jova sa biuta mai na Nona tikina; ka lako sobu mai; ena lakova na vei vanua cecere kei vuravura.

⁴Ena waicala ena rukuna na veiulunivanua, ena tatawasewase na vei buca ena vaka na kau ni sa mamaca me kama, ka vaka na wai ni drodrova na vei vanua e baba sobu.

⁵E yaco ena vuku ni talaideredre i Jekope kei nai valavala ca ena mataqali i Isireli. Cava na talaidredre i Jekope? Sega beka ni o Samaria? Cava na veivanua cecere i Juta? Sega beka ni o Jerusalemi?

⁶"O koya oqo Au na vakayacora vei Samaria me vaka nai binibini caca ni yaya ena loma ni rara, na vanua ni teivaki vaini: Au na viritaka sobu na kena vatu, Au na qai vorolaka nona yavu.

⁷Na nona matakau Ceuti me vorolaki vakalalai, na i lavo ni nona sauma mai na vei ka ca me vakamai laivi, me rusa nona matakau, ni sa taura mai ena nona saumi na dautagane, me vakasukai kece nai lavo ni dautagane."

⁸O koya oqo au na tagi ka qoqolou, au na lako ni'u luvata noqu i sulu meu luvawale; au na qoqolou me vaka na koli ni veikau ka tagi yaso me vaka na ositereji,

⁹Ni sega ni maca rawa na nona mavoa. Sa dewavi Juta mai; ka curuma mai na matamata ni koro nodra na noqu tamata i Jerusalemi.

¹⁰Mo kua ni tukuna i Kaca, me kua sara na tagi; ka vakatoqiqi yani ena qele ni o sa yaco ki Peciafira.

¹¹Vei kemudou na kai Sefiri dou na vakaluvaiwaletaki. Mo dou madua ni dou lako tiko; o ira na kai Senani era na sega ni lako rawa, o Peci-eseli ena tagi yaso, ni oi kemudou sa kauta tani na nona veika kece.

¹²O ira na kai Maroci era vinakata na tiko vinaka, ia sa yaco mai kina matamata i Jerusalemi na veivakaleqai mai vei Jiova.

¹³Vei kemuni na kai Lakisi, mo dou vesuka vakaukauwa na qiqi ni valu ena dua na manumanu totolo, (ni dou kauta mai nai valavala ca vei ira na goneyalewa ni Saioni). Sa yaco kina vei Isireli me vakacalai mai vei iko.

¹⁴O koya oqo mo solia, e dua na i yau vei Moreseci-kaca; ni mataqali Ekisipi sa mai talanoa lasu tiko vua na Tui Isireli.

¹⁵Au na kauta mai e dua na kemu i sosomi vei kemudou na kai Maresa; na lagilagi i Isireli ena lako mai ki Etulama.

¹⁶Dou tagica sara na ulumudou, ena vukudra nomudou gone vakasamemeni; me toro taucoko na vuti ni yago me vaka na ikeli, mo dou drulua tu ni dou sa kau vakabobula.