[33] Maika 7

¹Isa Oi au! Ni'u sa vaka na tamata dau beti vuanikau ena vula i katakata, ka vaka nai rairai ni dua na dau tamusuki vuni vaini, ni sa sega ni dua na i kau lolo me laukana rawa ena ka sa gadreva na lomana me kania.

²Ni sa takali mai vuravura na tamata yalodina, sa sega tale ni qai kune e dua na tamata lomadina ka era sa tamata lasulasu ka dau vakadave dra; ka era vakasasa taka na tacidra ni ra vakayagataka na lawa.

³Era gumatua ni caka ca ena ligadra O o ira na veiliutaki era vinakata na i sau ni nodra cakacaka, me ra qai cakacaka, o ira na dau ni lewa era vinakata nai lavo ena sala ni veivaqumi, kei ira na turaga bale era bulataka tu ga na i valavala vakabutobuto; ka era sa qai dua vata mera cakacaka ena i tovo oqo.

⁴Na tamata e vinaka toka vei ira, na nona bula sa vaka tale na co gadrogadro; o koya sa bau dodonu tu, na nona bula sa vaka nai sele gata ruarua na muana; ka sa roro tiko mai na siga mo na vakarusai kina, ka mo ni na veilecayaki ka yatayata tu kina.

⁵Kakua ni o vakabauti koya na nomui tokani, kua ni o nuitaka e dua drau dau veivolekati; mo qarauna ga na ka e cavuta mai na gusumu vei koya e davo volekati iko.

⁶Na gone tagane sa sega ni bau dokai tamana, na goneyalewa sa daubeci tinana, oi rau na veivugoni yalewa sa sega ni rau bau veilomani vakadua; na kedra meca sai ira ga na nodra lewe ni matavuvale.

⁷O koya oqo, au sa na rai ga vei Jiova; au na waraki Koya na Kalou ka noqu i vakabula; ena rogoci au na noqu Kalou.

⁸O iko na kequ meca, mo kakua ni marau ena vuku ni noqu bula; ka ni'u sa davo sobu, au na tucake tale; Ni'u tiko ena vanua butobuto, ena noqu rarama o Jiova.

⁹Au na ciqoma na cudru ena vakatauca mai vei au o Jiova, ena vuku ni noqu i valavala ca vua, au na vakaraitaka na noqu cala me vukei au ena nona lewa dodonu, ka tuberi au kina veivakararawataki; me'u na raica kina na nona yalododonu.

¹⁰Me na qai raica kina o koya na kequ meca, ka madua o koya ka dau tukuna vei au, "E vei o Jiova na nomu Kalou?" Na mataqu ena raici koya; ni sa butubuturaki sobu me vaka na qele malumu ena gaunisala.

¹¹Ena siga me sa tara cake kina na nomu bai vatu, ena qai vakatauci kina e dua na lewa ka mena vakauti ena vei tutu vava ni vuravura.

¹²Ena siga o ya era na lakovi iko mai o ira mai Asiria kei na vei vanua lelevu tale eso, o ira mai na loma ni vanua me yacova na Uciwai, mai na wasawasa e dua kina mua ni ulunivanua ki na dua na mua ni ulunivanua.

¹³Ena vaka matematetaki na qele ena vukudra na tawana tiko, me i sau ni nodra i valavala.

¹⁴Mo vakatawai ira na nomu tamata ena nomu i titoko, o ira na nomu i votavota, ka era dau vakatawana tu ga na veikau, ena vanua o Kameli; me ra vakani tale mada mai Pasani kei Kiliati, me vaka e dau caka tu e liu.

¹⁵"Me vaka na siga Au kauti kemudou tani kina mai Ijipita, Au a qai vakaraitaka eso na vei ka e veivakurabuitaki."

¹⁶O ira na veimatanitu era na raica ka madua ena vuku ni nodra kaukauwa; era na sogota sara na gusudra; kei na daligadra mera kua ni rogoca.

¹⁷Era na ceguva na kuvu ni qele me vaka na gata; ka dolo e ketedra, era na rerevaki Jiova na noda Kalou, ka era na rere dina ni ra raici kemudou.

¹⁸O cei li na Kalou me vakataki Kemuni, me vosota na caka cala, ka sa buluta na nodra talaidredre na kena e vo ni nona i votavota? Ka sega ni dau cudru tiko me sega ni mudu, baleta ni dau marautaka me yalololoma tiko.

¹⁹Ena yalololoma tale mai vei keda o koya, ena guilecava na noda caka cala. Na neimami valavala ca o ni na viritaka kina boto ni wasawasa.

²⁰O ni na vakatakila vei Jekope na dina, kei na yalololoma vei Eparama, ka me vaka na nomuni a bubului vei ira na neimami qase ena gauna sara yani e liu.