[4] Na Kedra I Wiliwili 23

¹Sa qai tukuna o Pelami vei Pelaki, "Mo tara vei au e vitu na i cabocabo ni soro e na vanua oqo, ka vakarautaka vei au e ke e vitu na bulumakau kei na vitu na sipi tagane."

²Sa cakava o Pelaki me vaka sa tukuna vua o Pelami, ka rau sa vakacabora ruarua o Pelaki kei Pelami na bulumakau kei na sipi tagane e na i cabocabo ni soro kece o ya.

³Sa tukuna o Pelami vei Pelaki, "Mo tucake tu e na yasa ni nomu i madrali kama, ia au na lako; de dua, e na mai sota vata kei au o Jiova." Ia na ka ga e vakatakila vei au o Koya, au na tukuna vei iko.

⁴A rau sa sota na Kalou kei Pelami, a sa tukuna vei Koya, "Au sa vakarautaka oti e vitu na cabocabo ni soro, ka'u sa cabora e na veicabocabo ni soro yadudua e dua na bulumakau kei na dua na sipi tagane."

⁵Sa qai biuta o Jiova e dua na vosa kina gusu i Pelami, ka tukuna, "Mo lesu tale vei Pelaki, ka la'ki tukuna vua oqo."

⁶A sa lesu tale vei koya, ka sa tucake tikoga o koya e na yasa ni nona i soro, o koya kei ira kece na turaga e Moape.

⁷A sa taura cake na nona vosa vakaibalebale ka vaka: "O Pelaki na tui Moape sa kauti au cake mai Arami. Mai na veiulunivanua e na tokalau, 'Mo rukaki Jekope, vei au. Mo lako mai, ka vosacudrutaki Isireli!'

⁸"Au na rukaki koya vakacava o koya e sega ni rukaki koya na Kalou? Ka'u na vakacacani koya rawa vakacava o koya e sega ni vakacacani koya na Kalou?

⁹Mai na dela ni uluvatu au sa raici koya. Mai na veidelana au sa kunei koya e keya, era sa tiko galili kina e dua na tamata, ka sega ni wiliki ira vata kei na veimatanitu e so.

¹⁰"O cei e rawa ni wilika rawa na kuvu ni sosoi Jekope, se me wilika rawa e dua na i kava ni Isireli? Me'u mate mada e na nodra mate na yalododonu ka me tautauvata kei koya na noqui otioti!"

¹¹Sa tukuna o Pelaki vei Pelami, "Na cava o sa cakava vei au? Au a kauti iko mo rukaki ira na noqu meca, raica, o sa qai vosa vakalouvinakataki ira tale vakalevu sara!"

¹²Sa qai sauma mai o koya ka vaka, "E na sega beka ni'u tu me'u tukuna na ka sa biuta ki gusuqu o Jiova?"

¹³Sa tukuna vua o Pelaki, "Au kerei iko mo lako vata mada kei au kina dua na vanua e rawa ni o na raici ira kina; o na raici ira vakalailai ga, o na sega ni raici ira taucoko; mo rukaki ira e na vukuqu mai keya."

¹⁴Sa qai kauti koya mai kina vanua o Sofimi, kina vanua cecere e Pisika, ka tara sara kina e vitu nai cabocabo ni soro, ka vakacabora sara kina e yadua na bulumakau kei na sipi e na vei cabocabo ni soro kece.

¹⁵Sa qai tukuna o koya vei Pelaki, "Mo tucake tiko e ke kei na nomu i soro kama me'u la'ki sota vata kei Jiova e keya."

¹⁶Sa sota vata kei Jiova o Pelami, a sa biuta e gusuna e dua na vosa, ka vaka; "Mo lesu tale vei Pelaki ka tukuna vua oqo."

¹⁷Sa lako mai vei koya ka sa tu o koya e keya, ka tu tikiva na nonai soro kama, ka ra tiko vata kei koya na turaga ni Moape. Sa vosa o Pelaki ka tukuna vua, "Na cava e sa tukuna mai o Jiova?"

¹⁸Sa cavuta na nona vosa vakaibalebale ka vaka: "Tucake, Pelaki, ka rogoca! Mo vakarogoci au, na luvei Sipori!

¹⁹"Sa sega ni tamata na Kalou me rawa Vua me lasu se me luve ni tamata, me rawa Vua me veivutuni. Sa sega beka ni tukuna, ka na sega beka ni vakayacora? Sa sega beka ni vosa oti, ka na sega beka ni vakavinakataka?

²⁰Rogoca, Sa soli vei au e dua na i vakaro me'u veivakalouvinakataki; E sa veivakalouvinakataki o Koya, ka sa sega ni rawa vei au me'u vakasuka tale.

²¹"Sa sega ni vakaraica o Koya na nodra cala na Jekope. Ka sega talega ni vakadikeva na nodra ca na Isireli. o Jiova na nodra Kalou sa tiko vata kei ira. Kei na kaila ni Tui sa maliwai ira.

²²Na Kalou e kauti ira tani mai Ijipita sa tu vei Koya na kaukauwa e vaka e dua na bulumakau tagane.

²³"Sa sega ni vakadraunikautaki rawa o Jekope se sa sega talega ni tarai rawa oisireli ena kalouvu. Oqo, sa na tukuni ga kina ena vukui Jekope kei Isireli “ 'O, na veika ga sa cakava na Kalou!'

²⁴Raica, sa tucake e dua na kawa tamata me vaka na laione yalewa, ka ra laveti ira cake me vaka na laione. E na sega ni davo sobu me yacova ni sa tilomi ira rawa na kena. Ka gunuva na nodra dra na vakamavoataki."

²⁵Sa qai vosa o Pelaki vei Pelami, "Kevaka o sa sega ni vosacudrutaki ira, ia mo vosa vakalouvinakataki ira!"

²⁶Sa qai sauma yani o Pelami vei Pelaki, "E sega li ni'u a tukuna vei iko, ka vaka; 'Na ka kecega e tukuna vei au o Jiova, e dodonu me'u cakava'?"

²⁷Sa qai tukuna o Pelaki vei Pelami, "Au kerei iko sara vakabibi mo lako mai, Au na kauti iko tale kina dua na vanua; de dua e na qai vinaka beka vua na Kalou mo na vosacudrutaki ira mai keya e na vukuqu."

²⁸A sa kauti Pelami o Pelaki kina delana cecere e Piori, ka raica sobu tu na vanua lala.

²⁹Sa qai tukuna o Pelami vei Pelaki, "Mo tara vei au eke e vitu na i cabocabo ni soro, ka vakarautaka vei au e vitu na bulumakau kei na vitu na sipi tagane."

³⁰A sa cakava o Pelaki me vaka sa tukuna vua o Pelami, ka vakacabora sara e yadua na bulumakau kei na sipi tagane e na veicabocabo ni soro kece.