[4] Na Kedra I Wiliwili 26

¹Ia ni sa yaco sara na kena gauna, e na kena mai cava na veimate ca, sa qai vosa o Jiova vei Mosese kei Iliesa na luvei Eroni na bete, ka vaka:

²"Mo wiliki ira na i vavakoso taucoko e Isireli mai na yabaki ruasagavulu ka lako cake, mai na veivuvale ni nodra qase, o ira era rawa ni lako kina i valu e Isireli."

³A sa veivosaki vata kei rau o Mosese kei Iliesa na bete e na ulunivanua o Moape e na yasa ni Joritani, ka takosova toka na vanua o Jeriko, ka vaka:

⁴"Mo wiliki ira na tamata mai na yabaki ruasagavulu ka lako cake, me vaka sa vakarota o Jiova vei Mosese vata kei ira na Isireli era a biubiu mai Ijipita."

⁵O Rupeni na ulumatua i Isireli. o ira na luvei Rupeni oqo: o Anoki e na vuvale na Anokaiti; o Palu, e na vuvale na Paluaiti;

⁶O Esironi, e na vuvale na Esironaiti; o Kami, na vuvale na Kamiaiti.

⁷Sai ira oqo na veivuvale mai vei ira na Rupenaiti ka wili rawa vei ira e lewe vasagavulu ka tolu na udolu kamani vitu na drau tolusagavulu.

⁸Ia na luvei Palu o Iliavi.

⁹O ira na luvei Iliavi o Nemueli, Tacani, kei Apirami. Sai ira oqo na Tacani kei na Apirami, ka ra matataka nai vavakoso, era a veivorati vata kei Mosese kei Eroni ka ra a wili vata talega kei Koya, e na nodra a via vorati Jiova;

¹⁰A sa dalaga na vanua ka tilomi ira vata kei Kora ni ra sa mate na i lawalawa o ya, e na nodra vakamai e na bukawaqa era lewe rua na drau limasagavulu na turaga; ka ra sa yaco mei vakatakilakila.

¹¹Ia era a sega ni mate na luvei Kora.

¹²O ira na luvei Simione me vaka na nodra veivuvale: O Nemueli, mai na vuvale na Nemulaiti; o Jamini, mai na vuvale na Jaminaiti; o Jakini, mai na vuvale na Jakinaiti;

¹³o Serai, mai na vuvale na Seraiti: o Saulu, mai na vuvale na Saulaiti.

¹⁴Sa i ira oqo na lewe ni vuvale ni Simionaiti, era lewe ruasagavulu ka rua na udolu rua na drau.

¹⁵O ira na luvei Kata me vaka na nodra veivuvale; o Sefoni, mai na vuvale na Sefonaiti; o Agi, mai na vuvale na Agiaiti; o Suni, mai na vuvale na Sunaiti;

¹⁶O Osini, mai na vuvale na Osinaiti; o Eri, mai na vuvale na Erinaiti;

¹⁷O Aroti, mai na vuvale na Aroaiti; o Areli, mai na vuvale na Arelaiti.

¹⁸Sai ira oqo na lewe ni vuvale mai vei ira na luvei Kata me vaka na kedra i wiliwili taucoko; era lewe vasagavulu na udolu lima na drau.

¹⁹Mai vei ira na luvei Juta o Eri kei Onami; ka rau a mate o Eri kei Onani e na vanua o Kenani.

²⁰Ia o ira na luvei Juta me vaka na nodra veivuvale: o Sela, mai na vuvale na Selanaite: o Peresi, mai na vuvale na Perisaite; o Sera, mai na vuvale na Seraite.

²¹O ira na luvei Peresi; o Esiromi, mai na vuvale na Esironaiti; o Amuli, mai na vuvale na Amulaiti.

²²Sai ira oqo na vuvale i Juta me vaka vei ira era a wiliki rawa; era lewe vitusagavulu ka ono na udolu lima na drau.

²³Mai vei ira na luvei Isakari me vaka na nodra veivuvale; o Tola, mai na vuvale na Tolaite; o Pua mai na vuvale na Punaite.

²⁴O Jasupi, mai na vuvale na Jasupaiti; o Simironi, mai na vuvale na Simironaiti.

²⁵Sai ira oqo na lewe ni vuvale i Isakari o ira era sa wiliki rawa mai vei ira; era lewe onosagavulu ka va na udolu tolu na drau.

²⁶O ira na luvei Sevuloni me vaka na nodra veivuvale, o Sereti, mai na vuvale na Sereaiti; o Eloni, mai na vuvale na Elonaiti, o Jaleili, mai na vuvale na Jalelaiti.

²⁷Sa i ira oqo mai na vuvale na Sevulonaiti o ira era sa wiliki rawa mai vei ira; era lewe onosagavulu na udolu lima na drau.

²⁸O ira na luvei Joseva me vaka na nodra veivuvale, mai vei Manasa kei Ifereimi:

²⁹Oqo na luvei Manasa; o Makiri, mai na vuvale na Makiraiti; ia o Makiri e tamai Kiliati; e Kiliati, ka kawa ni vuvale na Kiliaite.

³⁰Oqo o ira na luvei Kiliati; o Jeesa, mai na vuvale na Jeesaraiti; o Eleki, mai na vuvale na Elekaiti;

³¹O Asirieli, mai na vuvale na Asirelaiti; o Sikemi, mai na vuvale na Sikemaiti;

³²O Semita, mai na vuvale na Semidaiti; o Eferi, mai na vuvale na Eferaiti.

³³Ia o Silofeati na luvei Eferi e sega na luvena tagane, ka vakaluveni yalewa ga; ia na yacadratou na luvena yalewa o Silofeati kei Mala, Noa, Okala, o Milika, kei Tirisa.

³⁴Sai ira oqo na lewe ni vuvale i Manasa; ia o ira e wili rawa vei ira era lewe limasagavulu ka rua na udolu vitu na drau.

³⁵Oqo o ira na luvei Ifereimi me vaka na nodra veivuvale: o Sucila, mai na vuvale na Sucilaiti; o Bekeri, mai na vuvale na Bekaraiti; o Taani, mai na vuvale na Taanaiti.

³⁶Oqo o ira na luvei Sucila; o Erani, mai na vuvale na Eranaiti.

³⁷Sa o ira oqo na vuvale ka ra luvei Ifereimi o ira era sa wiliki rawa mai vei ira: era lewe tolusagavulu ka rua na udolu lima na drau. O ira oqo na luvei Joseva me vaka na nodra veivuvale.

³⁸O ira na luvei Penijamini me vaka na nodra veivuvale, o Bela, mai na vuvale na Belalaiti; o Asiveli, mai na vuvale na Asivelaiti; o Airami, mai na vuvale na Airamaiti;

³⁹O Sufami, mai na vuvale na Sufamaiti; o Ufami, mai na vuvale na Ufamaiti.

⁴⁰Ia na luvei Bela o Arati kei Nemani: O Arati, mai na vuvale na Arataiti; o Nemani mai na vuvale na Neamaiti.

⁴¹Sai ira oqo na luvei Penijamini me vaka na nodra veivuvale; ia o ira era wili rawa mai vei ira era lewe vasagavulu ka lima na udolu ono na drau.

⁴²Sai ira oqo na luvei Tani me vaka na nodra veivuvale: O Suami, mai na vuvale na Suamaiti. Oqo o ira na luvei Tani me vaka na nodra veivuvale.

⁴³Na veivuvale taucoko vei ira na Suamaiti, mai na kedra i wiliwili kece era sa wiliki rawa era lewe onosagavulu ka va na udolu va na drau.

⁴⁴Sa i ira oqo na luvei Aseri me vaka na nodra veivuvale: o Jimina, mai na vuvale na Jiminaiti; o Jesui, mai na vuvale na Jesuiti; o Peria, mai na vuvale na Periaite.

⁴⁵Mai vei ira na luvei Peria, o Epa mai na vuvale na Epaiti; o Malikieli, mai na vuvale na Malikieliti.

⁴⁶Ia na yaca ni luvei Aseri yalewa o Sera.

⁴⁷Sai ira oqo na veivuvale ni luvei Aseri o ira era sa wiliki rawa mai vei ira; era sa lewe limasagavulu ka tolu na udolu va na drau.

⁴⁸Oqo o ira na luvei Nafitalai me vaka na nodra veivuvale; o Jasili, mai na vuvale na Jasilaiti; o Quni, mai na vuvale na Qunaiti;

⁴⁹o Jeseri, mai na vuvale na Jesiraiti; o Silemi, mai na vuvale na Silemaiti.

⁵⁰Sai ira oqo na veivuvale i Nafitalai me vaka na nodra vuvale; ia o ira era sa wili rawa mai vei ira era lewe vasagavulu ka lima na udolu va na drau.

⁵¹Sai ira oqo era sa wiliki rawa mai vei ira na Isireli: era lewe ono na drau na udolu vitu na drau tolusagavulu.

⁵²Sa qai vosa o Jiova vei Mosese, ka vaka:

⁵³"Vei ira oqo e sa na votai kece na qele me nodra i votavota, me vaka na i wiliwili ni yacadra.

⁵⁴"Vei ira na mataqali era lewe levu mo vota vei ira me levu toka na nodra i votavota, kei ira na mataqali lailai me soli vei ira na i votavota e lailai. Me soli yadua na nona i votavota me vaka na kedra i wiliwili era a wiliki kina.

⁵⁵"Ia na vanua me wasewasei e na vakawiri madigi; ka me votai vei ira me vaka na yaca ni nodra veimataqali ni nodra qase.

⁵⁶"Me vaka na vakawiri madigi me qai votai vei ira na nodra i votavota o koya e levu o koya talega e lailai."

⁵⁷Sai ira oqo era a wiliki mai vei ira na Livai me vaka na nodra veivuvale: o Kerisoni, mai na vuvale na Kerisonaiti; o Koaca, mai na vuvale na Koaciti; o Merari, mai na vuvale na Meraraiti.

⁵⁸Oqo na nodra vuvale na Livai; na nodra vuvale na Lipinaiti, na vuvale na Epironaiti, na vuvale na Maliti, na vuvale na Musaiti, kei na vuvale na Koraiti. A sa tamai Amirami o Koaca.

⁵⁹Na yaca ni wati Amirami o Jokaveti na luvei Livai, ka a sucu mai vei Livai mai Ijipita; ka ratou sucu mai kina na kawa i Amirami vei koya, o Eroni, Mosese, kei Miriama na ganedrau.

⁶⁰O Eroni e sucu mai kina o Netava, kei Apiu, Iliesa kei Icama.

⁶¹E rau a mani mate o Netava kei Apiu e na nodrau cabora na bukawaqa tani e na mata i Jiova.

⁶²O ira era sa wili rawa vei ira e rauta ni ra lewe ruasagavulu ka tolu na udolu, o ira kece na tagane era se qai vula dua ka lako cake; ka ra a sega ni wili me okati vata kei ira na Isireli, baleta ni a sega ni votai vei ira me dua na nodra i votavota mai vei ira na Isireli.

⁶³Sa ira oqo era a wiliki mai vei Mosese kei Iliesa na bete, ka rau a wiliki ira na Isireli e na veibuca e Moape e na bati ni Joritani, ka takosovi Jeriko.

⁶⁴Mai vei ira kece oqo e sega ni tiko kina e dua na tagane ka ra a wiliki mai vei Mosese kei Eroni na bete e na gauna era a wiliki kina na Isireli mai na Vanua Liwa e Saineai.

⁶⁵Ni a sa tukuna mada vei ira o Jiova, "Era na mate vakaidina e na vanua liwa." Sa mani sega tale ni dua vei ira e vo, ka vakavo ga o Kelepi na luvei Jefune kei Josua na luvei Nuni.