[4] Na Kedra I Wiliwili 31

¹A sa vosa o Jiova vei Mosese, ka vaka:

²"Mo cudruvaki ira na kai Mitiani e na vukudra na Isireli. Ni oti o ya o sa na qai toki yani vei ira na wekamu."

³Sa qai vosa o Mosese vei ira na tamata, ka vaka, "E so vei kemudou me ra vakaiyaragitaki ira kina i valu, ka me ra kaba vakaivalu yani vei ira na kai Mitiani ka ra veisausaumi e na vuku i Jiova vei ira na kai Mitiani.

⁴"Me ra tau yadua na udolu mai na veiyavusa kece e Isireli me ra talai yani kina i valu."

⁵A ra sa mani digitaki mai na veiwasewase e Isireli era lewe dua na udolu mai na veiyavusa, ka ra sa lewe tinikarua na udolu era sa vakaiyaragi tu kina i valu.

⁶A sa talai ira yani o Mosese kina i valu, e ra lewe dua na udolu mai na veiyavusa, sa talai ira yani vata kei Finiasi na luvei Iliesa na bete, kei na vosa ni veidinadinati tabu vata kei na davui ni sikinala e ligana.

⁷A ra sa qai ia na veiqedravu e na i valu kei ira na kai Mitiani, me vaka a vakarota o Jiova vei Mosese, ka ra sa vakamatei ira taucoko na tagane.

⁸A ra sa vakamatei ira talega na tui ni vanua o Mitiani ka ra wili talega kina o ira era mate e na nodra vakamatei ” o Ivi, Rikemi, Suri, Uri, kei Repa, o iratou na lewe lima na tui e Mitiani. o pelami na luvei Piori era sa vakamatei koya talega e nai seleiwau.

⁹Ia o ira na Isireli era sa qai vesuki ira bula na yalewa taucoko ni Mitiani, ka ra wili talega kina na gone lalai, ka ra sa kauti ira talega na nodra bulumakau mei toki ni valu, kei na nodra manumanu, kei na veika kecega era taukena.

¹⁰Era sa vakama e na bukawaqa na nodra veikoro era tiko kina, kei na nodra koro vakabai kecega,

¹¹Era kauta kece nai toki ni valu kei na ka kecega era taukena “ na tamata kei na manumanu.

¹²Era sa qai kauti ira na tamata vesu, na nodra i yau, kei nai toki ni valu vei Mosese, kivei Iliesa na bete, kei ira talega na i vavakoso kece e Isireli, kina nodra i tikotiko e na vanua buca levu ni vanua o Moape e na yasa ni Joritani, ka takosovi Jeriko.

¹³A sa lako yani o Mosese, o Iliesa na bete, kei ira taucoko nai liuliu e na nodra i vavakoso, me ra la'ki veitata kei ira e na taudaku ni nodra i tikotiko.

¹⁴A sa cudru o Mosese vei ira era vakaitutu e na mataivalu, o ira era kavetani ni yadrau, kara se qai lesu mai e nai valu.

¹⁵A sa tukuna vei ira o Mosese: "O ni sa vakabulai ira kece tikoga na yalewa?

¹⁶"Raica, o ira na yalewa oqo era a vakavuna vei ira na Isireli, e nai vakavuvuli vaka Pelami, me ra caka ca vei Jiova ena veika e yaco vei Piori, sa yaco kina na mate ca e na kedra maliwa na i vavakoso i Jiova.

¹⁷"Ia oqo, mo ni vakamatei ira taucoko na tagane kei ira na gone lalai, ka vakamatei ira kecega na yalewa era sa tiko vata kei na dua na tagane.

¹⁸"Ia mo ni maroroi ira ga me nomudou goneyalewa era se sega ni tiko vata kei na dua na tagane.

¹⁹"Ia oi kemudou, mo dou tiko yani e na taudaku ni tikotiko me vitu na siga; o koya e sa vakamatea oti e dua ga na tamata, se o cei ga e tara e dua e vuetaki, mo dou vakasavasavataki kemudou kei ira era kau vakavesu mai e nai katolu kei nai kavitu ni siga.

²⁰"Me vakasavasavataki kece nai sulu, na ka kecega era buli e na leca, na veika kece era tali e na vuti ka ni me, kei na ka kecega era buli e na kau."

²¹Sa qai vosa oiliesa na bete vei ira taucoko na tagane era a tiko kina i valu me ra la'ki vala, "Sai koya oqo na veiyalayalati ni vunau ka vakarota o Jiova vei Mosese:

²²"Na koula ga, na siliva, na varasa, na kaukamea, na kava, kei na uma,

²³"Na ka kecega e sega ni kama yavu rawa e na bukawaqa, mo dou va kama e na buka, era na qai savasava; me ra na qai sava e na wai ni veivakasavasavataki. Ia na ka kecega era sega ni kama yavu rawa mo na qai biuta i wai.

²⁴"Mo dou na qai savata na nomudou i sulu e na i ka vitu ni siga ka mo dou savasava, ia ni oti o a mo dou qai curu mai kina i tikotiko."

²⁵A sa vosa o Jiova vei Mosese, ka vaka:

²⁶"Mo wilika mai na veika era a tokitaki mai “ na tamata kei na manumanu - o iko kei Iliesa na bete kei ira na turaga qase ena i soqosoqo;

²⁷"Ka mo wasea rua na i toki, vei ira era a vakaitavi e na i valu, ka ra a lako mera la'ki vala, kei ira kece na i soqosoqo.

²⁸"Ka vota nai vakacavacava e nei Jiova kivei ira na tamata i valu ka ra a lako yani me ra la'ki vala; me dua mai na vei ya lima na drau na tamata, na bulumakau, na asa, kei na sipi;

²⁹"Mo taura mai na kedra veimama, ka solia vei Iliesa na bete mei madrali e lavelaveti vei Jiova.

³⁰"Mai na nodra veimama na Isireli mo qai taura e dua mai na limasagavulu, kau mai vei ira na tamata, na bulumakau, na asa, kei na sipi, mai na manumanu kece, ka solia vei ira na Livai era vakaraica tiko na vale i Jiova."

³¹E rau sa cakava vakakina o Mosese kei Iliesa na bete me vaka sa vakaroti Mosese kina o Jiova.

³²Na vo ni yau ka ra a tokitaki mai ka ra a kauta mai na tamata i valu e ono na drau vitusagavulu ka lima na udolu na sipi,

³³vitusagavulu ka rua na udolu na bulumakau,

³⁴onosagavulu ka dua na udolu na asa,

³⁵kei na tolusagavulu ka rua na udolu taucoko na tamata, o ira na yalewa era se sega ni tiko vata kei na tagane.

³⁶Ia na kena veimama, na nodra i votavota o ira era lako kina i valu, na kedra i wiliwili e tolu na drau tolusagavulu ka vitu na udolu lima na drau na sipi;

³⁷Ia na ka mei vakacavacava vei Jiova e na sipi e ono na drau vitusagavulu ka lima.

³⁸Na bulumakau e tolusagavulu ka ono na udolu, ka mani vitusagavulu ka rua e i vakacavacava vei Jiova.

³⁹Na asa e rauta ni tolusagavulu na udolu, lima na drau ia na i vakacavacava vei Jiova e onosagavulu ka dua.

⁴⁰Na tamata era lewe tini ka ono na udolu ka ra i vakacavacava vei Jiova era lewe tolusagavulu ka rua na tamata.

⁴¹A sa solia o Mosese nai vakacavacava e nei Jiova nai soro e lavelaveti ki vei Iliesa na bete, me vaka sa vakaroti Mosese kina o Jiova.

⁴²Ia mai na kedra veimama ni tamata e Isireli, ka tawasei ira mai o Mosese vei ira na a laki vala -

⁴³na veimama ka nodra na i soqosoqo e tolu na drau tolusagavulu ka vitu na udolu lima na drau na sipi,

⁴⁴Tolusagavulu ka ono na udolu na bulumakau,

⁴⁵tolusagavulu na udolu lima na drau na asa,

⁴⁶kei na tini ka ono na udolu na tamata -

⁴⁷ia mai na kedra veimama na Isireli sa kauta mai o Mosese e dua mai na lewe limisagavulu, mai na tamata kei na manumanu ka solia vei ira na Livai, ka ra qarava tiko na vale i Jiova, me vaka sa vakarota o Jiova vei Mosese.

⁴⁸Ia o ira na i liuliu era veiliutaki ena veiudolu ni mataivalu, ka kavetani ni veiudolu kei na kavetani ni yadrau, era sa toro voleka mai vei Mosese;

⁴⁹A ra sa tukuna vei Mosese, "Oi keitou na nomu tamata keitou sa wiliki ira oti na tamata i valu ka ra vakarurugi tiko e na ruku ni neitou veiliutaki, ka sega ni dua vei keimami me yali.

⁵⁰"Keitou sa mani kauta mai kina oqo e dua na i madrali vei Jiova, na veika kece era sa kunea na tamata yadua na koula totoka, na qato kei na i taube na mama kei na sau ni daliga, me keimami cabora e dua na i madrali vei Jiova."

⁵¹E rau sa ciqoma o Mosese kei Iliesa na bete na koula mai vei ira, kei ira kece na i yau talei e so.

⁵²Ia na koula taucoko me ra i madrali ka ra vakacabora vei Jiova, mai vei ira na kavetani ni veiudolu kei ira na kavetani ni yadrau, e rauta taucoko ni tini ka ono na udolu vitu na drau limasagavulu na uma i lavo.

⁵³(o ira na tamata i valu era sa taura nai toki, me dui nodra yadudua.)

⁵⁴Ia o Mosese kei Iliesa na bete e rau sa ciqoma na koula mai vei ira na kavetani ni veiudolu kei na veiyadrau, ka rau sa kauta mai kina vale ni veitavaki me kedra i vakananumi na Isireli vei Jiova.