[4] Na Kedra I Wiliwili 4

¹Sa qai vosa o Jiova vei Mosese kei Eroni ka tukuna:

²"Mo drau wiliki ira na luvei Koacamai vei ira na luvei Livai ena nodra veivuvale kei na vuvale ni nodra qase,

³"Me tekivu mai vei ira era sa yabaki tolusagavulu ka lako cake, me yaco sara vei ira na yabaki limasagavulu, o ira era curu kina cakacaka e na loma ni vale ni veitavaki.

⁴"Sai koya oqo na nodra cakacaka na luvei Koaca e na vale ni Veitavaki ka dusimaki tiko kina na veika eso e vakatabui ka savasava:

⁵"Ni ra sa vakarau biubiu na i soqosoqo me ra lako yani, o Eroni kei rau na luvena me ratou lako mai ka luvata sobu na i ubi ka ubia kina na kato ni Vunau.

⁶"Me ratou qai ubia ena kuli ni manumanu ni wai ka me ratou qai ubia e cake e dua na i sulu me karakarawa taucoko; ka vakarubeca kina na kena qara.

⁷"E na teveli ni madrai dauraici, me ratou qai tevuka vakararaba kina na i sulu karakarawa, mera qai tuva e delana na i yaya ni vakasaqa, na i tavuteke, na beseni, na bilo ni wai, kei na madrai me toka e cake.

⁸"Me ratou na qai tevuka kina e dua na i sulu kulakula, ka me ratou na qai ubia talega e na i ubi ni kuli ni me; ka vakacuruma sara kina kena qara.

⁹"Me ratou na qai ubia na i tutu ni cina ni rarama e na i sulu karakarawa, na kena vauvau, na tere, kei na qaloni taucoko ni waiwai ka ratou dau cakacaka kina.

¹⁰"Me ratou na qai biuta vata kece kei na i yaya taucoko ni vakasaqa ena i ubi ni kuli ni manivusi ni wai ka me qai biu kina kena i vua.

¹¹"Ena i cabocabo ni soro koula, me ratou ubia e cake e dua na i sulu karakarawa, ka me ubia na kuli ni manumanu ni wai; ka me vakacurumi sara kina kena qara.

¹²"Me ratou na qai kumuna taucoko nai yaya ni vakasaqa ka ratou dau vakayagataka e na loma ni vale ni Kalou, biu e na loma ni dua na i sulu karakarawa, ubi yani e na ubi ni kuli ni manumanu ni wai, ka vakacuruma sara yani kina kena i vua.

¹³"Me ratou na qai kauta laivi talega na dravusa mai na i cabocabo ni soro, ka qai ubia yani e delana ena dua na i sulu lokaloka.

¹⁴"Me ratou na qai biuta kece yani e kea na i yaya taucoko ni nodratou cakacaka “ na dari ni qilaiso, na i cula ni lewe ni manumanu, na i sivi, na beseni, kei na i yaya kece ni veiqaravi ena i cabocabo ni soro, ka me ratou na qai ubia yani e cake ena i ubi ni kuli ni manumanu ni wai ka me daramaka yani kina kena i vua.

¹⁵"Ni sa mai cava na nodatou ubia na vale ni Kalou o Eroni kei rau na luvena kei na i yaya kece ni veiqaravi ni vale ni Kalou, ena gauna era sa vakarau cavu tu kina na i soqosoqo me ra sa lako, me ra qai lako mai na luvei Koaca me ra colata; me ratou kakua ga ni tara e dua na i yaya savasava tabu, de ratou na mate vakaidina.

¹⁶"Na i tavi sa lesi kina o Iliesa na luvei Eroni na bete sai koya na waiwai ni cina, na i madrali boivinaka vakamai, na madrali laukana, na waiwai ni i lumu me raica ka wanonova taucoko na vale ni Kalou kei na kena i yaya kece."

¹⁷Sa qai vosa vei Mosese kei Eroni o Jiova ka tukuna:

¹⁸"Mo drau kakua ni vakawabokotaka na nodra veivuvale ni yavusa ni luvei Koaca mai vei ira na Livai;

¹⁹"Ia na ka ga oqo mo drau cakava vei ira me vaka kina ni ra vakabulai ka sega ni ra mate ni ra sa torova yani na veika tabu ka savasava: o Eroni kei rau na luvena me ratou na qai lako yani ka lesia yadudua vei ira na i tavi me ra qarava.

²⁰"Me ratou kakua ga ni curu e loma me ratou la'ki sarava na kena ubi tiko na i yaya tabu ka savasava, de ratou na qai mate vakaidina." Na Nodra i Tavi Na Luvei Keresoni Tagane

²¹Sa qai vosa vei Mosese o Jiova, ka vaka:

²²"Mo na wiliki ira talega na luvei Kerisoni, mai na i yatu vei tamadra kei na nodra veivuvale.

²³"O ira era sa yabaki tolusagavulu ka lako cake, ka vaka talega kina o ira sa yabaki limasagavulu, o na wiliki ira kece, o ira era sa curu me ra veiqaravi, ka cakacaka ena loma ni vale ni veitavaki.

²⁴"Sai koya oqo na nodra cakacaka na luvei Kerisoni ena veiqaravi kei na colacola:

²⁵"Era na colata na i sulu latilati ni vale ni Kalou kei na i ubi taucoko ni vale ni veitavaki, na i ubi ni kuli ni manumanu ni wai talega e tiko kina, kei na i sogo ni vale ni veitavaki,

²⁶"Na i sulu sa bai ni rara, kei na i sogo ni katuba ni rara sa vakabai, o koya sa volita na vale ni Kalou kei na i cabocabo ni soro, na kedra dali, na i yaya kece ni nodra veiqaravi, kei na ka era a buli kina, me ra na cakacaka kina.

²⁷"O Eroni kei rau na luvena me ratou na lesia na i tavi taucoko ni cakacaka me ratou na qarava na luvei Kerisoni, na nodratou cakacaka kece kei na veiqaravi. Mo na qai vota vei iratou, ni cakacaka oqo e nodratoui tavi vakatabakidua.

²⁸"Sai koya oqo na nodratou cakacaka na vuvale ni luvei Kerisoni ena loma ni vale ni veitavaki. E ratou na cakacaka tiko ena ruku ni nona veiliutaki o Icama na luvei Eroni na bete.

²⁹"Mo na wiliki ira talega na luvei Merari ena nodra veivuvale me muria mai na i yatu ni nodra qase.

³⁰"O ira era sa yacova na yabaki tolusagavulu ka lako cake, kei ira talega era sa yacova na yabaki limasagavulu, mo na wiliki ira, o ira yadudua era sa curu kina veiqaravi me ra cakava na cakacaka ni vale ni veitavaki.

³¹"Sai koya oqo na veika me ra na kauta tiko me wili vaka nodra i yaya ni cakacaka e na loma ni vale ni veitavaki; na lalaga ni vale ni Kalou, na kena i tatarovi, na duru, kei na kena i sema,

³²"Na duru ni vale taucoko, na kedra i tatarovi, na kedra i vakadei, na kedra dali, na i yaya kece ni loma ni vale kei na ka e dau caka kina; ka mo na qai cavuta na yacadra ka vota yadudua vei ira na i yaya e dodonu me ra na colata.

³³"Sa i koya oqo na i tavi me ra qarava na vuvale ni luvei Merari, na i tavi taucoko e na loma ni vale ni veitavaki, e na ruku ni nona veiliutaki o Icama na luvei Eroni na bete."

³⁴Ia, o Mosese, Eroni, kei ira era veiliutaki ena nodra i soqosoqo, era sa qai wiliki ira na luvei Koaci ena nodra veivuvale kei na veivuvale ni nodra qase,

³⁵O ira era sa yacova na yabaki e tolusagavulu ka lako cake, ka yaco sara kina yabaki limasagavulu, kei ira yadudua era sa cakacaka tiko ena loma ni vale ni veitavaki;

³⁶O ira oqo era sa wiliki rawa ena nodra veivuvale e rauta tiko ni ra lewe rua na udolu vitu na drau limasagavulu.

³⁷Sa o ira oqo era sa wiliki rawa ena vuvale i Koaca, o ira era rawa ni veiqaravi ena loma ni vale ni veitavaki, ka rau a wilika o Mosese kei Eroni me vaka na i vakaroi Jiova ena liga i Mosese.

³⁸Ia, o ira kece sa wiliki rawa ena vuvale i Kerisoni kei ira na nodra qase kei na nodra veivuvale.

³⁹Vua sa yabaki tolusagavulu ka lako cake, kei ira talega sa yacova na yabaki limasagavulu, o ira yadudua talega era sa curuma na vale ni veitavaki mera veiqaravi kina O

⁴⁰O ira kece era sa wiliki mai na nodra veivuvale, kei na veivuvale ni nodra qase e rauta tiko ni ra lewe rua na udolu ono na drau tolusagavulu.

⁴¹Sai ira oqo era a wiliki mai ena nodra veivuvale na luvei Kerisoni, kei ira era rawa ni cakacaka e na vale ni veitavaki, ka rau a wilika o Mosese kei Eroni me vaka na i vakaro i Jiova.

⁴²O ira na veivuvale i luvei Merari era sa wiliki vaka matavuvale mai na i yatu ni vuvale ni nodra Qase,

⁴³O ira era sa yabaki tolusagavulu ka lakocake ka yacova sara na yabaki limasagavulu, o ira yadudua era sa curuma na yalava ni cakacaka ni veiqaravi ena loma ni vale ni veitavaki O

⁴⁴O ira kece era a wiliki kei na nodra veivuvale e rauta taucoko ni ra lewe tolu na udolu rua na drau.

⁴⁵Sai ira kece oqo era a wiliki ena nodra veivuvale na luve i Merari, ka rau a wilika o Mosese kei Eroni me vaka na vosa i Jiova ena liga i Mosese.

⁴⁶O ira era a wili rawa mai vei ira na Livai, me vaka e rau a wiliwili kina o Mosese, Eroni, kei ira na veiliutaki e Isireli, e na nodra veivuvale kei na i yatu mai vei ira nodra qase,

⁴⁷Mai vei ira sa yacova na yabaki tolusagavulu ka lako cake, kei ira sa yabaki limasagavulu, o ira yadudua era sa lako mai me cakacaka ka veiqaravi kei na i tavi ni kena colati na nodra i colacola bibi, ena loma ni vale ni veitavaki.

⁴⁸Na kedra i wiliwili taucoko era sa wili rawa e rauta tiko ni ra lewe walu na udolu lima na drau walusagavulu.

⁴⁹Me vaka na i vakaro i Jiova, era sa wiliki rawa e na liga i Mosese, me vaka na nodra dui i tavi kei na cakacaka yadudua; ia, era sa wili rawa ga mai vei koya me vaka sa vakarota o Jiova vei Mosese.