[4] Na Kedra I Wiliwili 6

¹Sa qai vosa na Kalou vei Mosese ka tukuna,

²"Mo vosa vei ira na luvei Isireli ka vaka: 'Kevaka sa vakacabora e dua na i madrali e dua na tagane se dua na yalewa, me sa vosa bubului kina me sa Tawasei, me tawasei koya kina vua na Kalou,

³'Me qai tawasei koya mai na gunu waini kei na vei yaqona tale eso, me qai gunuva ga o koya na vakabulagitaki ka caka mai na so tale na gunu; me kakua tale ga ni gunuva na wai wiwi se kania na vua ni vaini sa drokadroka se vakasigani.

⁴'Ena veisiga kece e tawasei kina, me kakua sara ga ni kania e dua na ka mai na vua ni vaini, na sorena se na kulina.

⁵'Ena veisiga yadudua ni nona bubului me sa tawasei, ena sega ni tara na uluna e dua na i koti ni ulu, me yacova ni sa vakacavari na siga e tawase kina me nona na Kalou, ena savasava o koya. Me qai laiva tikoga na drau ni uluna me tubu tiko me balavu.

⁶'Ena veigauna kece e tawase tiko kina o koya me nona na Kalou, me kakua sara ni torova yani e dua na yago ni mate.

⁷'Me kakua talega ni vakadukadukalitaki koya e matadrau na nona i tubutubu, ena vukudrau na tacina se ganena, ke rau mani mate, baleta na nona tawase, me nona na Kalou, sa toka sara ga oqori e uluna.

⁸'Na veisiga kecega ni nona tawase ena vakatabui me savasava tikoga vua na Kalou.

⁹'Ia kevaka e mani mate vakasauri e dua ena yasai koya sa tawase, ka sa mani vakadukara kina na uluna sa tabu tasi, me qai tasia laivi o koya na drau ni uluna ena siga ni nona vakasavasavataki, ena kavitu ni siga me qai tasia laivi kina.

¹⁰'Ena i ka walu ni siga me qai kauta mai e rua na soqe se rua na ruve gone vua na bete, ki na katuba ni vale ni veitavaki;

¹¹'Me na vakacabora na bete e dua mei soro ni valavala ca kei na kenai karua mei soro e vakamai, ka me vakacabori me baleti koya, ni sai valavala ca o koya e na vuku ni yago ni mate; ka na vakasavasavataka talega na uluna ena siga vata ga o ya.

¹²'Ena vakatabuya o koya vei Jiova na veisiga kece e tawase tiko kina, ka me kauta mai e dua na luve ni sipi tagane ka se qai yabaki dua mei soro ni caka cala, ia na veisiga ni nona tawase, me na qai kau mai o koya kina katuba ni vale ni veitavaki.

¹³'Sai koya oqo na lawa me baleti ira sa tawasei ira, ni sa mai vakayacori oti na veisiga ni nona tawase, me na qai kau mai o koya ki na katuba ni vale ni veitavaki.

¹⁴'Me na qai mai vakacabora na nonai madrali vei Jiova; dua na luve ni sipi tagane se qai yacova na yabaki dua ka se sega ni ca, mei soro kama, ka dua na sipi yalewa se qai yabaki dua sa sega ni ca mei soro ni valavala ca, ka dua na sipi mei soro ni veivinakati,

¹⁵'Me dua na kato ni madrai ka sega ni vakatubu, na keke e caka ena valawa vulavula makare ka veiwaki kei na waiwai, kei na keke mamare e so ka sega ni vakatubutaki ka lumuti e na waiwai, kei na madrali e laukana kei na kena e liviraki.

¹⁶'Ka na qai kauta mai na bete e na matai Jiova me vakacabora na nona i soro ni valavala ca kei na nona i soro kama;

¹⁷'Me qai vakacabora na sipi yalewa mei madrali ni veivinakati vei Jiova; vata kei na kato ni madrai sega ni vakatubu; ka na vakacabora talega na bete nai madrali laukana kei koya e liviraki.

¹⁸'Ia, o koya sa tawase tu me qai tasia na uluna ka vakatabui tu ena mata ni katuba ni vale ni veitavaki, ka me qai kumuna na drau ni uluna tabu ka biuta yani kina bukawaqa ena ruku ni madrali ni veivinakati.

¹⁹'Me qai taura na bete na vatuvatu ni taba ni sipi sa vakasaqari tu, kei na dua na keke sa sega ni vakatubutaki mai na kena kato, vata kei na dua na keke mamare sega ni vakatubu, ka biuta kina ligai koya sa tawase tu ni sa oti na nona tasia na uluna ka a tabu tu,

²⁰'Ia, na bete ena qai yalovaka me wili mei soro e yalovaki e na matai Jiova; era na vakatabui ka savasava vua na bete, kei na serena na i soro e yalovaki kei na saga ni madrali e lavelaveti. Ni oti oqo e sa na qai rawa vua sa tawase tu me gunu waini.'

²¹"Sai koya oqo na lewa e vauci koya sa tawase tu ka bubului kina vua na Kalou me tawasei koya, kei na veika tale e so, e rawa ni vakaitavi kina na ligana; me vaka na bubului e a cakava, e dodonu kina vua me vakayacora me vaka sara ga na lawa ni nona tawasei."

²²Sa vosa tale na Kalou vei Mosese ka tukuna;

²³"Mo vosa vei Eroni kei rau na luvena, ka vaka, 'Oqo na i valavala mo dou vosa vakalouvinakataki ira kina na luvei Isireli, Tukuna vei ira:

²⁴"Me vakalouvinakataki kemuni o Jiova, ka maroroi kemuni;

²⁵"Me cilavi kemuni nai serau ni mata i Jiova, ka me yalololoma talega vei kemuni;

²⁶Me laveta cake o Jiova na Nona veivakadonui vei kemuni Ka me vakacegui kemuni."'

²⁷"Me rawa kina ni ra toqa na Yacaqu ena kedra maliwa na luvei Isireli, ka'u na vakalouvinakataki ira."