[20] Vakaibalebale 15

¹Na vosa vakamalua sa cemuria tani na cudru katakata, Na vosa vakaukauwa sa vakacaudreva na cudru.

²Na yamedra na yalomatua sa vakayagataki vakavuku, Na gusudra na yalowai sa sovaraka na lialia.

³Na mata i Jiova sa tiko ena veiyasana kecega, Sa vakaraica tiko na vinaka kei na ca.

⁴Na vosa vinaka sa vunikau ni bula, Na vosa vakatani sa voroka na yalo.

⁵Na lialia sa cata nai vakasala i tamana, O koya sa ciqoma na veivakadodonutaki sa yaloqaseqase.

⁶Ena nodra vale na yalododonu sa tu kina nai yau, Na nodra i lavo na tamata ca sa tu kina na leqa.

⁷Na tebenigusuna na yalomatua sa kaburaka na vuku, Sa sega ni vaka koya na yalodra na lialia.

⁸Na i soro ni tamata ca sa ka vakasisila ena mata i Jiova, Na nodra masu na yalododonu sa ka taleitaki Vua.

⁹Na nodra sala na tamata ca sa ka vakasisila ena mata i Jiova, Sa lomani ira ga sa muria na yalododonu.

¹⁰E ra na kuita vakararawa o ira sa biuta na sala, E ra na mate, o ira sa cata ni vakadodonutaki.

¹¹O Eli kei na Veivakarusai e rau sa tu ruarua ena mata i Jiova, Sa qai vaka cava li na yalodra na luve ni tamata.

¹²Na lialia sa cata me vakadodonutaki koya e dua, se me na lako o koya ki na nodra tikina na vuku.

¹³Na yalo mamarau sa vakarairaivinakataka nai rairai ni tamata, Na yalo rarawa sa vakavorotaka na yalo.

¹⁴Na yaloi koya sa vuku ena vakasaqara na kila ka, Na gusu i koya na lialia sa kana tiko ena dauveivakalialiai.

¹⁵Na nodra siga kece na vakararawataki sa ca ga, O koya sa marau tiko na yalona, sa kana ka marau tu.

¹⁶Sa vinaka ni lailai na ka, ni sa tu vata na rerevaki Jiova, Sa ca nai yau levu ni sa tu vata na veileti.

¹⁷Sa vinaka na kana rourou ena vanua sa tiko kina na veilomani, Sa ca na kana bulumakau ena vanua sa tiko kina na veileti.

¹⁸Na tamata cudrucudru sa vakauqeta na veileti; Na tamata malua ka berabera ni cudru sa vakadaroya na veileti.

¹⁹Na nodra sala na vucesa sa vaka na vanua sonisoni, Na nodra sala na yalododonu sa dodonu sara na kena salatu.

²⁰Na gone yalomatua sa vakamarautaka na tamana, Na gone yalowai sa vakararawataki tinana.

²¹Na reki, sa ka lialia vua sa sega ni vakayalo na nona rai, Na tamata vuku sa lako vakadodonu tiko.

²²Ni sa sega na bose, sa sega ni yaco na ka. Sa dau yaco na ka ni ra sa lewe levu na daubose.

²³Sa vakamarautaka na tamata na i sau ni taro ni gusuna, Sa vinaka ga na vosa e vosataki taudonu!

²⁴Na sala ni bula sa liwavi koya cake na yalomatua, me rawa ni gole tani mai eli sa tu mai ra.

²⁵O Jiova ena vakarusa na nodra vale na dokadoka, ena vakadeitaka na nodra i yalayala na yada.

²⁶Na nodra vakanananu na tamata ca sa ka vakasisila, Na nodra vosa na savasava sa ka e veivakacegui.

²⁷O koya sa kocova nai yau sa vakacacana na nona vale vakataki koya. O koya sa cata na veivaqumi ena bula.

²⁸Na yalo i koya na yalododonu, sa vulica me dau sauma vakacava, Na gusu i koya na tamata ca, sa vosa ca tikoga.

²⁹O Jiova sa yawa mai vei ira na tamata ca, O Jiova sa rogoca na nodra masu na yalododonu.

³⁰Na rarama ni mata sa vakamarautaka na yalo, Nai tukutuku vinaka sa vakabulabulataka na uto ni sui.

³¹Na daliga sa rogoca na veivakadodonutaki kina bula, E na tiko vata kei ira na yalomatua.

³²O koya sa bese ni vakavulici, sa besetaka na yalona dina.

³³Na rerevaki Jiova sai koya nai vakavuvuli ki na yalomatua, Ni se bera na dokai, sa liu na yalomalumalumu.