[19] Same 132

¹Jiova, mo Ni nanumi Tevita kei na nona rarawa kecega;

²Ena nona bubului vei Jiova ka yalayala vua na Kalou Cecere i Jekope:

³"Sa tukuna, au na sega ni cabe cake ki vale, se me'u laki davo, me'u moce mada;

⁴Au na sega mada ni moce, se vakatara me'u sosovu,

⁵Me dua mada e liu na Nona tikina o Koya sa Cecere sara, me Nona i tikotiko na Kalou Cecere i Jekope."

⁶E da sa rogoca mai Efiraca, eda sa kunea ena vanua mai veikau.

⁷Me da lako ki na Nona vale; Me da cuva ka lotu ena yavana.

⁸Mo Ni tucake, Jiova, ki na Nomuni vakavakacegu, Oi Kemuni kei na Nomuni kato ni Kaukauwa.

⁹Me ra vakaisulu na Nomuni bete ena yalododonu, ke ira na Nomuni tamata me ra kaila ena reki.

¹⁰Ena vuku i Tevita, mo Ni kua ni vuki tani mai vua o Ni sa lumuta.

¹¹Sa bubului vakaidina o Jiova vei Tevita, ena sega ni vuki tani mai kina, "Au na vakatikora ena nomu i tikotiko vakaturaga na vua dina ga ni yagomu.

¹²Kevaka era sa maroroya na luvemu na Noqu veiyalayalati kei na Noqu i lesilesi au sa vakavulica vei kemudou, na luvedra talega era na dabe ena nomu i tikotiko vakaturaga me sega ni mudu."

¹³Ni sa digitaki Saioni o Jiova, ka sa gadreva me vakaitikotiko kina:

¹⁴"Oqo na vanua ni Noqu vakacegu me sega ni mudu, E ke, Au na tiko kina, Ni'u sa vinakata vakalevu.

¹⁵Au na vakasaututaka vakalevu sara na kena kakana; Au na vakamamautaki ira na kena dravudravua ena madrai.

¹⁶Au na vakaisulutaki ira na kena bete ena veivakabulai kei ira na kena tamata era na kaila ena reki.

¹⁷Mai kea, ena tubu mai kina e dua na i leu nei Tevita; Au na vakarautaka e dua na cina me nei Koya na Noqu i lumuti.

¹⁸O ira na meca, Au na vakaisulutaki ira ena madua, io vei koya na nona i sala ena seraka yani."