[19] Same 36

¹Nai tukutuku mai na vu ni yaloqu baleta na nona ca na tamata ca: Na rerevaka na Kalou sa sega ni kune e matana.

²Sa dodonu ga vua na ka sa tu e matana, ni sa raica ga na nona ca kei na ka sa cata o koya.

³Na vosa ni gusuna sa ca kecega ka veivakaisini; sa oti na nona yalomatua kei na nona daucaka vinaka.

⁴Sa nakita na ca mai na nona i davodavo; sa vakarautaki koya ena ka sa sega ni vinaka; sa sega ni cata na ca.

⁵Na Nomuni yalololoma Jiova, sa tiko mai lomalagi kei na Nomuni daudina, sa sivia na o.

⁶Na Nomuni yalododonu sa vaka na ulunivanua levu; na Nomuni lewa sa rui ka titobu sara; I Jiova, o ni sa maroroya na tamata kei na manumanu.

⁷I Jiova sa rui ka taleitaki na totoka ni Nomuni yalovinaka, o koya oqo era sa biuta kina na nodra vakararavi na tamata ena yaloyalo ni Tabamuni.

⁸Era sa vakasinaiti ena totoka ni veivakacegui e taucoko ni Nomuni vale. Ka o Ni sa vakagunuvi ira mai na uciwai ni Nomuni veivakamarautaki.

⁹Ni sa mai vei Kemuni nai vurevure ni Bula, ena Nomuni cina keimani sa raica na rarama.

¹⁰Mo Ni dolava tiko ga na Nomuni yalovinaka vei ira sa kilai kemuni, kei na Nomuni yalododonu vei ira sa dodonu sara ena yalodra.

¹¹Me kakua ni tosovi au mai na yavana na tamata dokadoka, me kakua talega ni tosoi au tani na ligai koya na dau caka ca.

¹²E ra sa bale na daucaka ca; Era sa vakabalei vakadua ka sega ni rawa ni tucake tale.