[19] Same 38

¹I Jiova, Ni kua ni vunauci au ena Nomuni rarawa, Ni kua ni vakavulici au ena nomuni cudru!

²Na Nomuni gasau sa cokai au e loma sara, sa tabaki au sobu na Ligamuni.

³Sa dadaga na yagoqu ena vuku ni Nomuni cudru, sa sega na bula vinaka vei au, ena vuku ni noqu i valavala ca.

⁴Na noqu caka cala, sa ula baleta na uluqu, sa rui bibi me vaka nai colacola bibi.

⁵Na noqu mavoa sa rui bona ka nana, baleta na noqu lialia.

⁶Au sa leqa vakalevu, au sa vakacuvari sobu vakaukauwa, ena siga taucoko au sa rarawa tiko.

⁷Sa tutubu vakalevu mai na toloqu, sa dadaga na lewequ.

⁸Au sa sautanini vakalevu ka sega ni toso rawa. Au sa vutugu vakalevu ena vuku ni yavavala ni yaloqu.

⁹Jiova, na noqu gagadre kece sa tu vei Kemuni: kei na ka au daucegulevutaka sa sega ni ka vuni vei Kemuni.

¹⁰Sa tavatukituki na utoqu, sa yali noqu kaukauwa; na rai talega ni mataqu sa buwawa, ni ra sa lako tani vei au.

¹¹O ira na noqu daulomani kei ira na noqu i tokani era sa tu vakayawa vei au.

¹²O ira sa vakasaqara me'u ca, era sa viria na kequ dai, o ira sa vakasaqara me'u vakacacani era sa veivakasewasewani tiko. Era sa nakita tiko na veivakacalai ena veisiga.

¹³Ia, oi au, au sa vaka e dua na daliga vara, au sa sega ni rogoca; au sa vaka talega e dua na galu sa sega ni dola gusu.

¹⁴Io, au sa vaka e dua sa daliga vara, kei koya sa galu ka sega ni vosa rawa.

¹⁵Io, oi Kemuni ga Jiova, au sa vakanuinui kina; o Ni na rogoca, Jiova na noqu Kalou.

¹⁶Ni'u sa tukuna, "Mo Ni rogoci au, de ra qai marau, de qai sisi na yavaqu, me ra qai vakacerecerei ira vakai ira me veicoqa kei au."

¹⁷Au sa vakarau me'u bale, na noqu rarawa sa tu ga e mataqu ena gauna kecega.

¹⁸Au na tukuna na noqu cala, sa vakararawataki au na noqu i valavala ca.

¹⁹Ia, o ira na meca era sa ca ka kaukauwa, o ira sa cati au era sa vakalevutaki ira vakatawadodonu.

²⁰O ira sa sauma na vinaka ena ca, era sa kequ meca, baleta ni'u sa muria na ka e vinaka.

²¹I Jiova, mo Ni kua ni biuti au; noqu Kalou mo Ni kua ni yawa mai vei au!

²²Mo Ni totolo ka vukei au mai, Jiova na noqu i Vakabula!