[19] Same 51

¹Mo ni yaloloma mai vei au, na noqu Kalou, me vaka na Nomuni yalovinaka; me vaka na Nomuni yalololoma, mo ni bokoca na noqu caka cala.

²Mo ni silisavai au sara mai na noqu cakacaka vakasisila, ka vakasavasavataki au mai na noqui valavala ca.

³Au sa vakadinadinataka na noqu caka cala, ka sa tu ga e mataqu na noqu i valavala ca.

⁴Vei kemuni, vei Kemuni duadua ga au sai valavala ca kina, au sa cakava na ka ca oqo e Matamuni”Mo ni kune kina ni o ni sa vosa, ka sega ni beitaki ni o ni sa lewa.

⁵E dina, au sa vakatuburi e nai valavala vakasisila, io, ena i valavala ca sa kunekunetaki au mai kina o tinaqu.

⁶Io, o Ni sa vinakata na dina mai na vu ni yalo, kei na ka vuni sara, o Ni na vakatakila kina vei au na yalomatua.

⁷Me'u vakasavasavataki ena sovu, au na qai savasava; me'u silisavai, au na qai vulavula cake sara mai na uca cevata.

⁸Me'u vakarautaki me'u rogoca na reki kei na marau, me ra marau tale kina na sui sa ramusu oti.

⁹Mo ni ubia na matamuni mai na noqu i valavala ca, ka qusia laivi na noqu cakacaka vakasisila kecega.

¹⁰Mo ni bulia vou tale e lomaqu e dua na yalo savasava, na Kalou, ka mo Ni vakavouia tikoga na yalo oqo sa dei tiko e lomaqu.

¹¹Me'u kua ni kautani mai Matamuni, kua talega ni kauta tani na Nomuni Yalo Tabu mai vei au.

¹²Me vakalesui tale vei au, na reki ni noqu sa vakabulai; ka me'u tarai cake tikoga ena Yalomuni na Yalo Tabu Vinaka.

¹³Au na qai vakatavulica vei ira na daucaka cala na Nomuni sala, kei ira nai valavala ca era na vakabulai.

¹⁴Na Kalou, mo Ni vakabulai au mai na veibeitaki ni vakadave dra, na noqu i Vakabula. Na yamequ ena lagata vakarogolevu na Nomuni yalododonu.

¹⁵I Jiova, me dolavi na tebenigusuqu, me'u dalaga vakalevu ni'u seretaka ka vakatakila na Nomuni cecere.

¹⁶O ni sa sega ni gadreva nai soro kei nai soro kama, o Ni sa sega ni marautaka, de na rawarawa vei au me'u solia.

¹⁷Nai soro vei Jiova na yalo sa bibivoro ka kakavorovoro nai soro vaka oqo”na Kalou, o Ni na sega sara ni beca.

¹⁸Cakava na ka vinaka, ena Nomuni marautaki Saioni; tara tale na bai kei Jerusalemi.

¹⁹O Ni na qai marautaka nai soro ni yalododonu, nai soro kama kei nai soro e taucoko; Era na vakacabora na bulumakau e taucoko mei soro, ena Nomuni i cabocabo ni soro.