[19] Same 83

¹Mo Ni kakua ni galu na Kalou! Mo Ni kakua ni vesuka na Nomuni tu, Mo Ni kakua ni tiko wale na Kalou!

²O ira na Nomuni meca, era sa yavavala vakalevu o ira sa cati Kemuni, era sa vakararai voli.

³Era sa bosebose vakailawaki, vakavuni, ena vukudra na nomuni tamata, era sa bukia vata na vere me baleti ira na Nomuni ka maroroi.

⁴Era sa tukuna, "Mai, me tarovi, me ra kua ni dua na matanitu, me ra kua ni nanuma tale na yaca i Isireli."

⁵Era bosebose vata ka vakadonuya; me ra sa dua nai to tani, mai vei Kemuni:

⁶Na vale laca nei Itomi: kei Ismeli; Moapi, kei Akiri;

⁷O Kibali, kei Amoni kei Ameleki, na kai Filisitia kei ira mai na vanua o Taia;

⁸O Asiria talega sa to vata kei ira; era sa vukei ira na luvei Loti me ra to mai. Sela

⁹Mo ni tarai ira me vaka vei Mitiani, me vaka vei Sisaria, me vaka vei Jabini ena mata ni wai mai Kisoni,

¹⁰O koya sa vakarusai mai Enatovi, era sa na benu ena vanua.

¹¹O ira na nodra turaga, me vakataki Orepa, me vakataki Sipa, io, na turaga lailai, me vakataki Isipana, kei Salimuna,

¹²Era sa tukuna, "Tou taura na were ni Kalou, me nodatou, me tou taukena."

¹³Noqu Kalou, mo Ni cakava me na vaka na curu ni covulaca, me vaka na qani sila ena cagi kaukauwa!

¹⁴Me vaka sa kama na veikau, kei na yameyame ni buka sa vakama na ulunivanua,

¹⁵Me ra vakacicivi ena Nomuni cagi e veivakasaurarataki, me ra vakarerei ena cava kaukauwa.

¹⁶Me sova ki matadra na madua, me ra na vakasaqara kina na yacamuni, Jiova.

¹⁷Me ra sa vakasesei ka vakataqayataki vakadua, io me ra madua ka vakarusai,

¹⁸Me ra kila kina na tamata, ni sai kemuni, na yacamuni duadua ga, sai Jiova, sa cecere duadua ga e vuravura taucoko.